Julekyss

Her i heimen vert det baka fint lite til jul. Derimot vert det både laga og konsumert store mengder konfekt, og då aller helst av typen som innheld marsipan. No har eg laga ein ny type konfekt; marengs eller pikekyss, eller som det heiter nett no; julekyss. Marengs er i utgangspunktet ein passe kjedeleg søtsak, men med marsipan og sjokolade vert det noko heilt anna. Nydelege vart dei! Her er oppskrifta, freidig henta frå Odense Marcipan sine nettsider.

3 stk eggekviter
1/2 ts eddik
150 g melis
125 g marsipan
1-2 ss kakao
 
Pynt:
200 g mørk sjokolade

Pisk eggekvitane stive med eddik og halvparten av melisen. Riv marsipanen på eit rivjern og bland den med resten av melisen og kakaoen. Marsipan- og marengsmassen blandast godt saman. Bruk den uhorveleg smarte dekor-pennen (som du sjølvsagt har, eller iallfall dreg for å kjøpe!) til å lage små, yndige munnfullar på ei steikeplate med bakepapir. Steik julekyssa på 150 °C i 20-25 min. Smelt sjokoladen over vassbad og smør den på botnen av kakene.

Saftig sjokoladekake med squash

Kaker med grønsaker er ein fin ting; dei blir så innmari saftige! No er jo allereie potet og gulrot i kaker ein kjend sak, men andre grønsaker som rødbetar og squash er også fine å bruke som kake-ingrediens. I dag har eg baka sjokoladekake med nettopp squash, og som i tillegg innheld deilige krydder som kanel og kardemomme - og ikkje minst både kakao og hakka sjokolade. Saftig, krydra og herleg! Her er oppskrifta:

2 store egg

1 1/2 dl sukker

1 vaniljestang (snitt den på langs og skrap ut frøa)

1/2 dl eplesyltetøy (eg hadde berre plommesyltetøy og det fungerte veldig greitt!)

1/4 ts salt

2 dl kveitemjøl

1/2 dl kakao

1 1/2 ts bakepulver

1 ts kanel

1/4 ts malt kardemomme

4 dl finrevet squash

100 g mørk sjokolade, hakka

Forvarm steikeomnen til 180 grader. Bruk ei lita langpanne eller ildfast form, ca. 20x20 cm. Smør forma eller dekk den med bakepapir. Bland saman egg, sukker, vanilje, eple/plomme-syltetøy og salt. Sikt i mjøl, kakaopulver og bakepulver. Bland saman med ein slikkepott. Vend inn revet squash og ha til slutt sjokoladen i. Hell røra i forma og steik i ca. 40 min. Kjenn med ein tannpirkar/fyrstikk om den er ferdig. Avkjøl på rist og dryss over melis.

Den løyndomsfulle hagen

Midt i Oslo by, godt gøymd blant høge forretningsbygg og blokker, veit eg om ei lita perle av ein hage.  Den fine, grøne plassen er sjølvsagt ein godt bevart hemmelegheit, men hit kan eg altså gå og plukke masse bær; syrlige rips, søte solbær og sure stikkelsbær! Nett slik eg kunne gjere i min barndoms hage på Vestlandet. Heilt finfint! Og ikkje minst, heilt gratis!

Sukra rips med vaniljesaus blanda med piska kremfløyte er for meg den ultimate sommar-desserten. Den slår til og med jordbær med fløyte!

God sommar! :-)

Rosa cupcakes

Cupcakes er visstnok "so last year". Til og med dei søte, små og fargerike makronane er avleggs. No er det Cake Pops som den store, nye trenden. Så langt har ikkje eg kome, men eg kjem truleg med eit blogg-innlegg om desse små kakene på pinne til neste år ein gong, når ytterlegare ein kaketrend har oppstått... Eg er  altså framleis på Cupcakes-stadiet. Og her ein dag rakk eg til og med å bake nokre av desse søte godsakene - heilt frå grunnen av! Det har nemlig blitt ein del 1-2-3-kaker i det siste - grunna eit krevjande lite vesen som har kome i hus...

Oppskrifta på den rosa glasuren er som følgjande (og passar for øvrig til alle typar muffins): 

100 gram kremost naturell

1 ss sitronsaft

1 ss vaniljesukker

Ca. 450 g melis

Raud konditorfarge

Pynt med det du har!

Søte gleder i romjula

I år - som i alle år - har eg i staden for å bake julekaker heller laga store mengder konfekt. I år vart boksane fylt med mektige sjokoladetrøflar, mjuke fløytekaramellar, mørke mandelgubbar, søte dajm-marsipankuler og saftige kirsebær- og marsipanbitar.

Kirsebær-marsipanen er enkelt og greitt marsipan elta saman med hakka coctailbær og dyppa i smelta mørk sjokolade. Marsipankulene med tørka blomepynt innheld dajmkuler og rom, og er dyppa i smelta mjølkesjokolade.

Som pynt har eg m.a. brukt tørka kornblomst og ringblomst frå Høgt og Vilt - Urter frå Devik. Desse tørka blomane er fantastisk fine både til konfekt, kaker og salatar.

Mandelgubbane er marsipan som er elta saman med konjakk for deretter å dyppast i smelta sjokolade tilsett rista, hakka hasselnøtter.

Smaken av safran

Eg er ikkje særskild glad i søt kveitebakst, men lussekattar er heilt klart unntaket. Eg trur det har samanheng med den fine gule fargen, smaken av safran og ikkje minst det at lussekattar er ein del av ein veldig triveleg førjulstradisjon. Saman med varm sjokolade med krem vart det i dag Lucia-feiring på Tøyen!

Julekjensle i oktober

Ikkje eitt vondt ord om den norske mjølkesjokoladen, men når det kjem til ekslusiv sjokolade er det lite som slår belgisk sjokolade, og då aller helst trøflar frå sjokoladehuset Neuhaus.

Då mannen kom heim frå fotballtur til Manchester hadde han kjøpt med seg ei stor øskje med assorterte Neuhaus sjokoladetrøflar etter ei mellomlanding i Brussel. Hurra!

Sjokoladetrøflar er faktisk ikkje så veldig vanskeleg å lage sjølv, men det er ein litt omstendeleg prosess, og tar difor litt tid. Eg plar lage det til jul, og trøflar gjev meg difor julekjensla allereie no i oktober! Her er oppskrifta på dei. Bileta er av Neuhaus-trøflane, og altså ikkje noko eg har laga sjølv denne gongen, men dei liknar jo sjølvsagt veldig... ;-)

Ca. 45 stk

300 g fløyte

400 g mørk sjokolade

70 g romtemperert smør

Evt. smakstilsetjing som kaffi, likør, whiskey eller konjakk

Smelta sjokolade til dypping

Finhakk sjokoladen og ha den i ein bolle. Varm opp fløyten i ei lita kasserolle og hell den varme fløyta over sjokoladen medan du rører. Sjokoladeblandinga skal bli skinnande blank og elastisk. Rør til slutt inn smøret i små terningar, og køyr sjokolademassen med ein stavmiksar. Avkjøl sjokoladen og form den til kular/toppar. Avkjøl. Dypp trøflane i smelta sjokolade, og rull dei i kakao. Oppbevarast kjølig i tett boks.

NB: Pass på at trøflane er er ordentleg kalde slik at dei ikkje smeltar i dyppe-prosessen. Dypp dei gjerne ein gong til i smelta sjokolade for å få eit tjukt lag med sjokolade rundt trøflane før dei vert rulla i kakao (evt. melis).

Sjokolademuffins med blåbær

Då eg googla etter oppskrift på spaghetti carbonara med fløyte var første treffet ein blogg som heiter Lekkermunn - om bordets gleder (Lekkermunn = Cecilie K. Fragaat Ødegård). Ein delikat og oversiktleg matblogg med herlege matoppskrifter og nydelege bilete. Eg susa litt rundt inne på den fine bloggen hennar, og enda ikkje opp med berre carbonara-oppskrift, men òg ei oppskrift på sjokolademuffins med blåbær - som vart baka til denne sommarens aller siste helg.

Oppskrifta gjev opphaveleg 10 store muffins, men eg brukte små former og enda opp med nesten dobbelt så mange.

150 gram kokesjokolade 70% (eg hadde diverre ikkje 70%, men brukte vanleg kokesjokolade)
150 gram smør
3 egg
100 gram sukker
100 gram kveitemjøl
1 ts bakepulver
140 gram (ca 2 dl.) blåbær (eg brukte store amerikanske blåbær, og auka mengda med ½ dl.)

Sett omnen på 170 grader. Smelt smør og sjokolade i vassbad. Egg og sukker vispast kvitt, før den smelta sjokoladeblandinga, mjøl, bakepulver og blåbær tilsetjast. Ha deigen over i muffinsformer og steik i 20-25 minutt. Avkjølast på rist.

God helg!

Sagopudding med mango og kokos

For ei stund sidan kom eg over ei oppskrift på sagopudding med mango og kokos. Oppskrifta er henta frå denne bloggen, og sidan eg no har sagogryn i skåpet mitt og allereie har prøvd meg på tradisjonell sagopudding med raud sos, tenkte eg at eg ville prøve meg på denne som har ein litt annleis og eksotisk vri. Mango er som sagt tidlegare min favorittfrukt over alle frukter, og einkvar dessert-oppskrift som innheld denne søtsaken MÅTTE jo berre vere god! Og det var den absolutt! Ein herleg sommardessert! Her kjem oppskrifta:

1/2 kopp sagogryn - som på engelsk heiter sago pearls (kling noko betre enn det norske ordet sagogryn...)

1 kopp kokoskrem (ekstra krema kokosmelk)

1 1/2-2 koppar vatn

1/2 kopp sukker

1 mango

Kutt mangoen i bitar. Bland sukker, kokoskrem og 1 1/2 kopp vatn i ei kasserolle og varm dette opp. Rør til sukkeret er oppløyst  og tilset sagogryna. Ikkje la blandinga koke sidan kokoskremen då vil skilje seg. Rør godt slik at det ikkje klumpar seg. Sagogryna vil svelle og blandinga vil etterkvart byrje å bli tjukk - hell i litt meir vatn om blandinga blir for tjukk. Sagogryna er ferdig kokt når dei byrjar å bli gjennomsiktige, tilsett då mangoen. Puddingen kan serverast både kald og varm. Varmt blir tilrådd i oppskrifta, men eg tykkjer den er best kald. Hell puddingen i serverings-glas og topp med mango-purè.

Biletet av den ferdige desserten kan du sjå på same blogg sidan eg diverre ikkje  fekk verken puddingen eller biletet mitt til å sjå like delikat ut som denne, og eg torer heller ikkje å bruke eit bilete utan løyve. Særskild ikkje når biletet blir eigd av ein amerikanar. Amerikanarar likar jo å saksøkje for kvar minste lille ting...

(...fordi oppskrifta opphaveleg var på engelsk, og i cup-mål, var det dessutan eit ideelt påskot til å kjøpe det vesle settet med tre målebeger frå Rice/Sweet Memories som måler både i cups, floz og ml...)

Kake i raudt, kvitt og brunt

Troika er min absolutte favoritt-sjokolade, og lukka var stor då eg på restaurant Vognmand Nilsen oppdaga at dei hadde noko som heitte Troikakake på dessert-menyen sin (dessert-menyen er for øvrig det første eg sjekkar når eg er på restaurant; om det ikkje er sjokolade-dessertar på menyen er det diverre berre å pakke saman og gå...). Troikakaka til Vognmand Nilsen var aldeles nydeleg, og eg ville gjerne prøve å lage ei liknande sjølv. På nettet finst det fleire ulike oppskrifter; eg prøvde denne til 17. mai-feiringa vår i år:

Kakebotn

200 g malte mandlar

200 g melis

3 eggekviter

Pisk eggekvitene stive og rør forsiktig i malte mandlar og melis. Ha deigen i ei bakepapirkledd kakeform (i oppskrifta stod det 26 cm, men eg synst kaka vart litt låg og kjem til å bruke 24 cm neste gong eg lagar ho). Steik botnen på 170 grader i ca. 30 min. på nedste rille.

Trøffelkrem

75 g melis

1 dl vatn

3 eggeplommer

150 g smør

1 ss kakao

Ha melis og vatn i ein kjele. Kok det forsiktig til massen blir seig (ca. 8 min). Avkjøl. Pisk eggeplommene, tilsett melismassen ei ei tynn stråle medan du rører godt. Rør inn smøret i små bitar. Tilsett kakao til slutt. Smør kremen på mandelbotnen og sett kaka i kjøleskåpet med ringen rundt.

Fyll

1 pk raud gele

3 dl vatn

500 g marsipan

Lag gele etter rettleiinga på pakken, men bruk berre 3 dl vatn. Hell geleen som har byrja å stivne oppå kaka. Sett den tilbake i kjøleskapet til geleen er heilt stiv. Kjevle marsipanen til ei tynn leiv. Fjern forma frå kaka, og legg marsipanen over geleen. Form den så den blir glatt og fin.

Glasur

1 1/2 plate kokesjokolade

2 ss smør

Smelt sjokolade og smør over svak varme. Avkjøl sjokolademassen litt før den fordelast jamnt over kaka. Pynt gjerne med sjokoladepynt, geletoppar eller noko anna fint.

Denne Troikakaka var jo sjølvsagt like digg som Troika-sjokoladen, og den endar truleg opp som sjølvaste bryllaupskaka vår! På toppen plasserer vi då dette snasne brureparet:

Kaketopp-brureparet fann eg på loftet hos farfar. Ingen veit kven det har tilhøyrt, men eg likar det vintage preget, at brura har gullkjole og ikkje minst; at ho ikkje er blond slik brura ofte er på slike kaketoppar! Synst nesten brureparet liknar litt på meg og min kjære...? ;-)

Fordi vi kom så seint heim frå vår vesle helgetur til Berlin, rakk vi ikkje å stryke og ordne bunadane våre til 17. mai. I staden pynta vi oss med desse fine handperla norske flagga frå Sally Ann - Frelsesarmeens konsept for rettferdig handel. Eit fint alternativ til dei tradisjonelle 17. mai-sløyfene.

Sengemat til nybakt mor

Gleda er mest altfor stor til å bera.

Hei, vesle unge, velkommen til jord!

Ubrukt er livet ditt, ope ligg verda,

ventar, og gler seg til dine spor.

- Ingvar Moe -

Då eg vart tante til vesle Jakob i fjor, laga ho mor og min kjære rømmegraut medan eg laga kake, og så trava vi gjennom byen med ei kaketine, ei korg med gåver til den nyfødde og ei rykande varm gryte - såkalt "sengjamat". Eg veit ikkje korleis det er her på austlandet, men på vestlandet har det altså vore vanleg å gå med sengemat  til den nybakte mora. Farmor var veldig flink til halde på denne tradisjonen heime i Vevring. Ho gjekk på barselbesøk til grannar i bygda med nylaga rømmegraut og heimebakt flatbrød under armen. Denne tradisjonen prøver eg no å ta vare på og eg synst det er fint å ta med seg kake når eg vitjar venninner som har fått barn. Denne gongen er det kusina mi, Silje og hennar sambuar Magnvard, som har fått barn - ei lita jente som skal heite Astrid. Vi har no besøkt den vesle familien, og i gåve fekk Astrid dei svært søte og sjarmerande Bø og Bæ-dokkene, boka Bø og Bæ i festhumør og ei saftig og deilig sjokoladekake.

Denne sjokoladekaka er ei svært mektig kake, men den er fantastisk god! Den består av tre lag sjokoladebunnar, sjokoladekrem og marsipankrem, men det er også mango i den, noko som gjer kaka frisk og saftig til trass for all kremen. Om kaka skal bringast eit stykke, eller stå kaldt over natta, bør kakeringen vere rundt slik at ikkje all kremen sklir ut (noko eg sjølvsagt har fått erfare).

Kakebotn:

3 egg

2 1/2 dl sukker

1dl kveitemjøl

1/2 ts bakepulver

3/4 dl kakao

1 ss pulverkaffi

2 ts vaniljesukker

1/2 ts salt

3 dl kesam, 8%

2 ss smelta smør

1 ss vatn

1 ss konjakk

Sjokoladekrem

4 dl kremfløyte

100 g mørk sjokolade

Marsipankrem

150 g marsipan

2 ss portvin

ca. 100 g melis

2 dl kremfløyte

Fyll: 1 mango i terningar

Pynt: 1/2 porsjon sjokoladekrem, kakao og evt. sjokoladepynt

Pisk egg og sukker til eggedosis. Bland saman dei tørre ingrediensane og vend dei i eggedosisen saman med kesam, smelta smør, vatn og konjakk (evt. brandy). Rør lett til alt er godt blanda. Hell røra i ei form (i oppskrifta står det 24, men då er det noko vanskelegare å dele kaka i tre lag, så eg brukar 22)  og steik kaka på 200 grader, nedste rille i ca. 30 minutt. Avkjøl kaka på rist. Del kaka i tre (her brukar eg min geniale kakedelar. Anbefalast!). Kok opp fløyten og hell den over sjokoladen som er delt i bitar og rør dette jamnt og avkjøl. Pisk kremen opp med ein handmiksar. Her pleier eg å jukse litt, sidan eg ikkje har tolmod til å vente til sjokolade-kremen skal bli avkjølt. Det tar laaang tid før den bli kald nok til å piskast til krem, og bør i grunn helst lagast timar i forvegen, eller setjast i frysaren for avkjøling. Eg piskar istaden fløyten til krem, før eg blandar inn smelta sjokolade. Det fungerer like fint. Riv marsipanen grovt og rør den saman med portvin (evt. sherry) og melis. Pisk fløyte til krem og bland den saman med marsipanen. Legg ein kakebotn på eit kakefat. Dekk med halvparten av sjokoladekremen. Dryss på mangobitar. Legg på den andre kakebotnen og bre marsipankremen utover. Legg på den siste kakebotnen og smør på siste del av sjokoladekremen. Sett kaka kjølig, gjerne til neste dag. Pynt med kakao og evt. sjokoladepynt.

Cookies

I kveld kjem mi gode venninne Ellen på besøk. Ho skal få deilige nysteikte cookies, hyllebærsaft og eit varmt teppe rundt seg. I dag skal nemlig balkongen vår innviast for sesongen sjølv om det ikkje akkurat er noko særleg varme ute og balkongen vår framleis ser rimeleg stusseleg ut. Men med tepper, puter, ljos, cookies og saft kan vi iallefall nyte april-sola og den fine utsikta over botanisk hage.

Oppskrifta på desse cookies'ane har eg fått frå Nina (mi syster si venninne) og den gjev omtrent 25 passeleg store cookies.

125 g smelta smør

1,75 dl brunt sukker

1,75 dl kvitt sukker

1 egg

3,75 dl mjøl

1 ts bakepulver

1 ts vaniljesukker

1/2 ts salt

1,5 plate kokesjokolade

Evt. 2,5 dl hakka mandlar for dei som tåler nøtter...

Bland alt ihop og sett toppar på plata og trykk dei litt ned. Steikast på 200 grader midt i omnen i 8-10 minutt. Avkjølast på plata.

Sagopudding - snart berre eit nostalgisk minne?

Då eg vaks opp var sagopudding nærast ein daglegdags dessert, men no er det diverre sjeldan eg får den servert. For ikkje lenge sidan las eg til og med i ei avis at sagogryn var på veg ut av butikkane avdi salet hadde stupt dei siste åra. Dette fekk eg stadfesta når ho mor fortalde at ho måtte reise til Drammen for å kjøpe sagogryn etter å ha leita rundt i butikkar her i Oslo. Eg er difor redd for at sagopudding er ein dessert som  er i ferd med å forsvinne frå dei norske dessert-borda. Men heldigvis har eg ein familie som er opptekne av mat-tradisjonar og ho mor lagar altså framleis sagopudding - når ho først får tak i sagogryna vel og merke. Eg fekk sjølv lyst lyst til å prøve å lage denne desserten i helga, og sagogryn fann eg til og med i nærbutikken min her på Tøyen!

Sagopudding:

1 dl heilmjølk

11/2 dl sagogryn

1/2 dl sukker

1 stort egg (eller to små) 

3-4 romessens eller mandel-dropar

Kok opp mjølk, og dryss i gryna og kok til graut ca. 1/2 time. Ta gryta bort frå varmen. Pisk egg og sukker saman. Hell dette over grauten som setjast over varmen for å tjukne. Må ikkje koke, rør heile tida. Ta gryta bort frå plata igjen, smak til med romessens eller mandel-dropar og hell i ein fin dessert-bolle. Avkjølast.

Raud sos:

5 dl raud saft (blåbærsaft er best)

1 ss potetmjøl

Litt kaldt vatn

Eg blanda 3 dl saft med 2 dl vatn slik at det vart 5 dl saft tilsaman. Kok opp safta og rør potetmjølet og vatnet saman. Ta kjelen av plata og rør inn potetmjølet i ei tynn stråle under omrøring. Set kjelen tilbake på varmen og kok raskt opp. Avkjølast.

PS (og kanskje ikkje eigentleg så kjekt å vite): Ekte sagogryn vert laga av margen i sagopalmen, som ein finn i Søraust-Asia. Men her i Noreg vert sagogryn laga av potetmjøl.

Deilig chilimarmelade

Eg er i grunn ikkje spesielt glad i søte marmelader, men denne - som er laga av paprika og chili - er nydeleg; søt og sterk i eitt. Eg synst den er aller best på ei god grov brødskive saman med gräddost, men den er også god til kjøtpålegg, postei, scampi og kylling. Eg plar doble oppskrifta; då får eg meir enn nok til at også mine kjære får med seg eit glas av marmeladen :-)

Her er oppskrifta:

1 raud paprika

5 store raude chili

340 g sukker

125 ml eddik 7 %

4 ss lunka vatn

1 1/2 ts gelatinpulver

Reins paprikaen. Del chilien og skrap ut frøa. Kutt paprika og chili i små bitar og køyr til ei glatt blanding i ein kjøkenmaskin. Ha blandinga over i ei kasserolle og tilsett sukker og eddik. Kok opp og la det småkoke i 10 minutt. Rør ut gelatinpulveret i lunka vatn og la det svelle i 2 minutt. Hell gelatinen over i chiliblandinga og la det koke i 1 minutt medan du heile tida rører med ein visp. Hell marmeladen over på reine glas med lokk. Oppbevar i kjøleskap.

(Oppskrifta er frå KK/Lise Finckenhagen)