Fin de curso 2º_2019/20

Hoxe, fin de curso 2019/20, despedímonos de todos/as vós ata setembro.

Desexámosvos un FELIZ VERÁN e GRAZAS por todo o voso cariño, esforzo, motivación e creatividade ao longo destes dous cursos e, especialmente, deste singular 3º trimestre.

Seguide sendo...MOI FELICES! 

LEOLAB 19/20

No primeiro trimestre do presente curso puxemos en marcha no noso cole os laboratorios de aprendizaxe. A expectación e ilusión era máxima. Cada mércores, despois da Hora de Ler todo o alumnado do cole organizábase por equipos interniveis para participar nun dos 5 laboratorios: Laboratorio Documental, Laboratorio de Ciencias, Laboratorio de Son, Laboratorio de Ideas e Laboratorio de Imaxe.

Entendemos estos laboratorios como espazos de aprendizaxe onde desenvolver as competencias básicas, onde crear, experimentar, investigar…dunha maneira lúdica e motivadora coa orientación das mestras e mestres do noso colexio.

Esta actividade quedou cancelada  coa declaración do estado de alarma polo COVID-19 e a suspensión das clases. 

Desexamos que para o vindeiro curso poidamos emprender novamente os nosos laboratorios nos que tanto aprendemos e desfrutamos.

Letras Galegas 2020_Cores e Letras

A partir do poema de Manuel María (audio recitado pola profe Vanessa e publicado no programa Que me contas? de Radio Balea) o alumnado do CEIP Milladoiro creou uns fermosos caligramas con forma do arco da vella, xa que ademais este converteuse nun símbolo de esperanza durante esta pandemia. No seguinte vídeo tedes un resume  da creatividade dos nenos e nenas:

Día da Familia 2º

 

Parabéns no voso Día, Familias de 2º! 

Un pequeno resumo en vídeo, de cada unha de vós.
Familias educadoras e creativas, cada unha de vós diferente e única.
Grazas por compartir a vosa riqueza particular con todos/as NÓS.

Artistas no Día do Libro

Ola familias,

Coas imaxes que nos foron chegando sobre unha das actividades promovidas pola Biblioteca do noso cole para conmemorar o Día do Libro elaboramos este caderno.
Recolle as creacións plásticas que fixéchedes inspirándovos nun dos vosos libros favoritos botando man da imaxinación e a creatividade. Moitos parabéns artistas!

Grazas por participar.

Día Do Libro Manualidades 1º ciclo

Leer más publicaciones en Calaméo

Aula de 1º. Corentena....máis que cumprida!

Ola familias!
Este vídeo é un resumo en imaxes que pretende reflectir a diversidade de tarefas que foron facendo os vosos Superheroes e Superheroínas de capa vermella ao longo desta corentena máis que cumprida. Non podo estar máis agradecida coa vosa participación e apoio. Moitísimas grazas por todo!
Está feito con moito agarima para todas vos. Agardo que vos guste!

Aula de 2º: corentena...máis que cumprida!

Para todos/as NÓS!

Un vídeo resumo destacando algunhas das actividades feitas ao longo desta corentena, na que cumprimos e seguimos cumprindo como auténticos/as superheroes e superheroínas de capa vermella!
Nas vosas carpetas dixitais gardo decenas de imaxes, vídeos, audios...que nos achegan un pouquiño máis nesta difícil situación. Grazas mil por seguir conectados/as!
O vídeo, imaxe a imaxe, deixanos ver que...

TODOS/AS SOMOS DIFERENTES, A DIVERSIDADE ENRIQUÉCENOS!

Sigamos pois enriquecéndonos con esta diversidade e compartíndoa con todos/as.
Parabéns unha vez máis por tanto esforzo, motivación e ilusión por seguir creando e crecendo ao tempo que nos divertimos xuntos/as.
A disfrutar do noso vídeo!

Día do Libro...en familia!

Aquí están as imaxes das familias lendo na casa como complemento ás actividades que propuxemos para celebrar o Día do Libro 2020.

Esta data que é tan nosa e na que disfrutamos sempre de compartir lecturas, este ano foi... diferente.
Pero non deixamos de ler!

Grazas por compartir con nós unha parte da vosa intimidade e abrirnos unha fiestra as vosas casas.

 

Feliz Día do Libro 2020

23.4.2020 


  2.4.2020 

GRAZAS pícaros/as e familias pola vosa colaboración  para que puidesemos crear este fermoso video celebrando o Día do Libro Infantil e Xuvenil (LIX).
Con todo o noso cariño para VÓS, Susana e Fátima.

Día do Libro 2020

O vindeiro xoves 23 celebraráse o Día Internacional do Libro. Ese que daba comezo ao noso Mes das Letras. Lembrades o ano pasado cando enchimos Malpica de Libros e carabeis? E outros anos coa actividade de Padriños e madriñas lectores?.... Pois este ano imos tamén celebrar. Doutro xeito, si. Pero imos celebrar! Velaí a nosa proposta:

Imos comezar nós, os profes, agasallandovos un video con fotos nosas nas nosas casas lendo e... facendo outras cousas. Porque queremos que nos vexades e saibades de nós e dicirvos que VOLVEREMOS ABRAZARNOS! E, despois, tocarávos a vós. Fixádevos que as actividades teñen data final. Animádevos! Temos ganas de vervos! E de ver os vosos traballos que sempre, sempre consiguen sorprendernos. As fotos podedes envialas polas canles que xa tendes establecidas con cada profe, ou ao correo de Leo (bemilladoiro@gmail.com) Pensade que, agora, anque non é doado, todos estamos facendo algo moi importante: coidarnos e coidar dos demáis. Así que....

Queda na casa

...lendo!

Agardamos as vosas fotos!

Pautas confinamento

Ola familias, compartimos unhas pautas de afrontamento para reducir o impacto psicolóxico do confinamento. Esperemos que vos axuden, ánimo e forza!

Pautas Impacto Psicoloxico Confinamento

Leer más publicaciones en Calaméo

Inicio 3º trimestre

Carta da dirección do CEIP Milladoiro ás familias, redactada o domingo 12 de abril de 2020 e publicada o mesmo día na web do centro.

Queridas familias: agardamos que todos gocedes de boa saúde. 

Como ben sabedes, o vindeiro martes 14 de abril comeza o terceiro trimestre do presente curso 2019/20. E reanudaremos a actividade académica, propiamente dita, con todo o noso alumnado.

Sabemos o difícil que está a ser facer escola sen estar na escola Sabemos que os nenos e as nenas necesitan o ambiente motivador das aulas para seguir aprendendo…  e que esta situación énchenos de incertezas e inseguridades porque temos máis preguntas que respostas.

Pero tamén sabemos que somos xente afouta e que neste momento o realmente importante é conservar intacta a esperanza, o ánimo e os vínculos que nos enlazan sexan estes familiares, profesionais ou simplemente… de afecto. Empregar o tempo en fortalecelos será un capital que levaremos con nós toda a vida. Sobre todo os nenos e as nenas.

A Consellería, que en todo este período non se caracterizou por manternos informados, segue na súa líña. De maneira que, hoxe domingo, non temos directrices para o desenvolvemento profesional do noso labor.

Sabemos que o vindeiro mércores haberá unha reunión sectorial da Ministra Celaa cos conselleiros das disferentes CC.AA. e pode ser que os seus acordos sexan trasladados a Galicia polas nosas autoridades educativas. Pode. En calquera caso, terémosvos informados.

De momento: o martes o profesorado colgará novas tarefas primando contidos procedimentais e actitudinais sobre os conceptuais.

Tende a seguridade de que vos estamos a trasladar puntualmente canta información nos chega das autoridades educativas e así o seguiremos a facer.

Apertas, azos, saúde e moita esperanza!

A Dirección

Dia do Libro Infantil

Ola pícaros/as e familias!
Hoxe celebramos o Día do Libro Infantil!
E para celebralo queremos convidarvos a que nos enviedes imaxes ao correo do blogue co voso libro favorito.
Comezamos nós, as titoras, para animarvos a enviarnos esas imaxes nas que poidamos vervos, xa que vos botamos moito de menos (que non falten os sorrisos nesas imaxes)
Eleximos os libros que contamos para Radio Balea dentro do programa Que me contas? Contos de Leo: Pilú Pilú e Crocodilo namorado.

ANIMÁDEVOS, QUEREMOS VERVOS! 

CARTA DOS/AS MESTRES/AS

Queridos/as nenos/as e familias:

Os/as mestres/as tamén estamos na casa, os/as mestres/as tamén somos pais/nais, os/as mestres/as tamén temos familias, os/as mestres/as somos uns/unhas máis das moreas de persoas que debemos quedar na casa nesta cuarentena que nos toca vivir.

Hoxe sabemos que a obriga de QUEDAR NA CASA vaise alongar, polo que queremos que teñades presente que seguimos aquí: ao outro lado da rede, a través do correo picarosmilladoiro@gmail.com e o noso blogue www.picarosmilladoiro.blogspot.com, porque queremos que saibades de nós, porque queremos saber de vós (como estades, que facedes, como levades estar na casa…)

As tarefas escolares, nestes momentos que estamos a pasar, non son o máis importante. O realmente importante é que nos coidemos e coidemos dos demais quedando na casa, como superheroes e superheroínas con capa vermella pois xa temos aos superheroes e as superheroínas con capa verde nos hospitais, nos laboratorios, nas carreteras transportando o que precisamos, nos supermercados e pequenos comercios de alimentación, nas rúas velando pola nosa seguridade…,en definitiva fóra das súas casas para que nós os das capas vermellas poidamos quedar na casa.

Non esquezades que o que vaiamos publicando no blogue, a parte da pestana de recursos de 1º e 2º que serve para repasar contidos, ten como finalidade darvos ideas para o día a día, NON SON DEBERES, NON SON TAREFAS PARA AVALIARVOS son propostas, axudas para ocupar o noso tempo diario e seguir imaxinando, creando e crecendo en corpo e mente. Sempre dentro das vosas posibilidades, pois sabemos que non todos contades cos medios tecnolóxicos para poder acceder aos contidos. Por iso, pedimos as familias que teñan contacto con outras familias que non conten cos recursos,  que ofrezan a súa axuda a través dos medios dos que dispoñan (grupos de wasap ou outros medios non presenciais, pois debemos evitar todo contacto con outras persoas alleas as nosas casas)

Organizamos o blogue para que nas pestanas superiores piquedes e accedades rapidamente a aquelo que vos interese ver. A primeira pestana e a máis importante é a nomeada como NÓS, nesta páxina iremos publicando, coa vosa autorización, todo o que nos enviedes ao correo (imaxes de actividades feitas, audios, escritos…) porque vós sodes os protagonistas do voso blogue.

Como mestres/as querémosvos pedir que sexades felices cada día, dende que espertamos ata que nos deitamos. Recordade espertar cada mañá cun sorriso que vos encha de felicidade a vós e aos vosos.

A normalidade voltará, e con ela veremos que saímos da casa máis fortes ca nunca.

Forza superhéroes e superheroínas de capas vermellas e recordade cada día un sorriso, este será o noso superpoder.

TODO SAIRÁ BEN!

Apertas agarimosas e biquiños mil dos/as vosos/as mestres/as de 1º e 2º.

Día da Poesía. Proposta BE Milladoiro.

Hoxe é o Día da Poesía,e... esta é a nosa proposta.

Para os que vos animedes a facela, se despois queredes compartir imaxes do que fixéchedes, ou arquivos de audio co poema escollido....

estaremos encantados de publicalo!

Por se precisades algún poema, deixamos o enlace ao blog de Antonio García Teijeiro

Felices poemas!

CONTACTADE CON NÓS

Bo día pícar@s!
Un día máis tedes publicada unha nova creación que desenvolver nos vosos laboratorios caseiros: a caixa misteriosa, ideada pola mestra Susana.
Recibimos moi emocionadas o Emocionbot de Marco García que podedes ver na imaxe e animámosvos a que nos enviedes imaxes, escritos e todo aquilo que vos apeteza compartir  cos/cas compañeiros/as e co profesorado.

Emocionbot de Marco García (1º)

Non podemos vernos, nin abrazarnos, máis seguimos aquí ao outro lado do ordenador, tablet ou móbil e queremos saber de vós.
O que queirades compartir con nós, dúbidas tamén, enviádeo ao email do noso blogue:

picarosmilladoiro@gmail.com

Ánimo, que todo sairá ben!

Apertas de todo o equipo docente!

Laboratorio de Ideas: CAIXA MISTERIOSA

Laboratorio de Ideas: EMOCIONBOT

Cálculo online

Bo día alumnado e familias, como cada mañá facíamos o noso Calculín para practicar o cálculo mental deixámosvos un enlace dos recollidos na pestana de Recursos 1º e 2º para crear o voso libriño diario de operacións. Picando no seguinte enlace accedemos ao mesmo.

Cálculo online

Só temos que selecccionar na columna esquerda a operación que queremos (suma, resta, multiplicación...), o número de páxinas (unha operación por páxina), o número de cifras que terá cada operación e a calcular!

Non queremos fomentar as desigualdades de partida de cada un de nós, pois sabemos que non todos e todas contamos cos mesmos medios tecnolóxicos na casa; por iso iremos publicando recursos online que podemos empregar dende os ordenadores, tablet ou móbiles sen falla de ningún outro medio.

 

Recursos 1º e 2º

Bo día a todas as familias, as titoras de 1º e 2º queremos recordarvos que na columna dereita do blogue contades cunha listaxe de recursos na rede para repasar contidos.

Picando na seguinte imaxe que atoparedes na columna dereita accederedes aos mesmos.

Recomendamos que empreguedes un organizador semanal para que os/as nenos/as non perdan rutinas, dentro da situación que estamos a vivir.

Seguiremos publicando todos aqueles recursos que vexamos de interese para o alumnado.
Ante calquera dúbida, como se comunicou a través de nota remitida pola dirección, podedes contactar con nós a través do correo do colexio (indicade no asunto a atención de Susana ou Fátima)

ceip.milladoiro@edu.xunta.es

Apertas para as familias e o noso alumnado. A coidarse e coidarnos...

TODO IRÁ BEN!