FLYGANDE GARN TIL DEG?

Skal du vere med på fugle-samstrikkinga som vi i Vottelauget arrangerer no i september? Eller har du berre lyst på nokre gram fjørlett og mjukt garn? 

Eg deler ut to små spesialpakkar ("kits") med garnnøste som kan passe til å strikke minst eitt par av babyvottane mine, Tommelise. Denne oppskrifta finn du i boka Eventyrvotter som nettopp er publisert (yeah!) 

Om du vil vere med på trekninga, skriv ein kommentar her under innlegget, der du seier kva garn du har mest lyst på (og gjerne også kvifor): 

a) Cheeky Merino Joy i fargen  "Cerise Ombré", handfarga av Ninapetrina. 
b) Silkeull frå Nøstebarn i fargen havblå, eller 
c) Huldra kamgarn frå Hifa i brunt. 

Tommelise strikka i Silkeull frå Nøstebarn 
(.. med herrevotten "Bjørnen og ulven" til høgre)

I begge pakkane kjem eg også til å putte oppi eit like stort nøste i kontrastfargen kvit/natur. 

Desse vottane er kjappe å strikke, ikkje minst fordi dei er utan tommel.

Istadenfor det litt tidkrevjande havskummønsteret på mansjetten, kan du også velje vanleg vrangbord. 

Tommelise strikka i Huldra kamgarn

Sjølv har eg strikka Tommelise-vottane med alle desse tre garntypane, og tilrår dei alle varmt i oppskrifta. a) har eg strikka i størrelsen "3-6 mnd", medan dei tynnare typane b) og c) vart "nyfødd". 

Men kor store vottane blir, er sjølvsagt også avhengig av di personlege strikkefastheit.

Fristen er temmeleg kort: Onsdag 2. september ved midnatt må kommentaren vere lagt inn her. Torsdag (3. september) kunngjer eg dei to vinnarane. Oppdatering: Trekninga er utført, sjå innlegget over.

Lukke til i svevet! 

"Det er betre med ein fuglevott i handa, enn ti garnnøste i skapet ..."

I septembersamstrikkinga er fuglar temaet.
Du kan strikke babyvottane Tommelise (her på fotoet i Rauma Finull),  Gullfuglen, Nattergalen eller eventuelt Grantreet, der eg har plassert eventyrfuglen på kvar tommel. 

VOTTAR TIL PRINSEN - mittens for a prince

Eit lite vottepar i handa er betre enn ti ubrukte garnnøste i skapet (nytt ordtak)

Eit par fjørlette vottar i silkeull er no ferdige, og kan pakkast inn som dåpsgåve. Nei, ikkje til George Alexander Louis of Cambridge, men til ein annan nydeleg, liten gut. Og uansett, alle barn som kjem til verda, er prinsar eller prinsesser, spør du meg. Eg fann dette norske mønsteret på nettet, og når namnet er 
"Liten fuggel" synest eg fargen dueblå som hovudfarge passa perfekt! 

Dessutan: eg vart så oppløfta av å kunne trylle fram fuglar av små masker, så eg fann meg raskt eit nytt "bevinga" mønster, denne gong til ein vaksen (... julegåve ...???) 
- frå ei heilt ny vottebok av to svenske bloggarar. Eg har lyst til å strikke omtrent alle mønstera dei har laga! Så snart eg er ferdig med dette første paret vil eg fortelje og vise meir!

oppskrift, dueblå vottar:

"Liten fuggel" av Jorid Linvik

(lenke til mønster-butikken hennar)

garn: Nøstebarn silkeull (nettbutikk)

fargar: dueblå (nr 852) og natur (nr 810)

størrelse: ca 6 mnd? (original 1-2 år)

pinnar: 2,5 mm (betre med 2,0?)
mi endring: utan tommel (sjå fotoet under)

totalvekt: 14 gram

Takk for lånet av dei store og fine pappa-hendene! 

MASKER TIL DEI MINSTE - knits for the newborn

Lenge sidan sist eg blogga. Livet, og til dels alvoret, kom imellom ...

Men no byrjar fuglane å kvitre igjen, og det gror i fleire mamma-magar rundt meg. Eg vil strikke velkomst-gåver! Men kva? 

I jakta på idear fann eg fram eit foto frå då min eigen nyfødde fekk på seg hentesettet, to dagar etter fødselen. Eg må flire nostalgisk: alt er litt for stort til ein så liten kropp. Men eg har i alle fall laga det sjølv! Og eg strikka mange gode tankar inn i maskene medan eg venta. Og plutseleg ein dag vart vesleprinsen stor, og plagga for små.

No klør eg altså i fingrane etter å strikke nyfødd-gåver til minst tre nære og kjære, som har termin framover mot sommaren. Har du gode idear og/eller ferdig baby-strikk å vise fram?

mitt eige, enkle hentesett:

hue:

"lettstrikka babyhue" frå Nøstebarn

jakke:

"rillestrikka omslagsjakke" frå Nøstebarn

sokkar:

"babysokker på to pinner" frå boka Myk start av May Bente Langhelle

... alt strikka i silkeull frå Nøstebarn, 
i fargane "natur" og "lys oliven"

BITTELITA STJERNE - a tiny star

 As your bright and tiny spark,
Lights the traveller in the dark.
Though I know not what you are,
Twinkle, twinkle, little star.

        (voggesong av Jane Taylor, 1806)

No har eg mi eiga, vesle stjerne her på bordet. Og sanneleg, eg veit ikkje heilt kva ho er:

For denne hua vart så bittelita at ho nok passar betre til ei dokke enn til ein nyfødd. Eller kanskje eg heller skal bruke ho som nålepute på knappe-glaset mitt ...? 

Uansett blir eg mjuk i hjartet av dette fine stjerne-mønsteret, så eg skal nok gjere fleire forsøk for å finne den rette babyhue-størrelsen. I ein varm raudfarge kan dette bli ei herleg julestjerne-hue, ikkje sant?

oppskrift:

"Sternen-Mützli" av Seiden Atelier Gottlieben,

har eg strikka éin gong før, då i rein silke

(... og dén hua vart for stor!)

garn:

silkeull frå Nøstebarn i fargen "lyng" (forbruk: berre 10 gram)

pinnar: 2,5 mm

STJERNEKLART - a star is born

Ei juni-jente er komen til verda, og eg helsar ho velkomen med 15 gram silke i stjerneform. Endeleg kunne eg gripe fatt i den sartrosa bunten frå lageret mitt, og lage ei jente-hue. 


Eg har som ritual å vente med målretta baby-strikking til fødselsmeldinga kjem, men då set eg i gang, inspirert av dei gode nyheitene!


Denne silkehua kan vonlegvis både vere vakker og verne det vesle hovudet på varme sommardagar. Neste gong har eg lyst til å prøve denne oppskrifta med eit garn med meir spenst i, f eks silkeull. 

oppskrift: 

"Sternen-Mützli" 

frå Seiden Atelier Gottlieben 

garn: rein silke, 220 m - 50 gr 

farge: nr 113 (= lysaste rosa)

pinnenr: 2,5 mm

SMÅTT ER GODT - small gifts

Finst det noko meir fascinerande enn nyfødde føter...? Då eg vart mamma for første gong vart eg rørt og glad over alle dei personlege gåvene, ikkje minst dei heimelaga babysokkane. Til og med på fødeavdelinga fekk eg velje meg ut eit par, laga av nokon i det lokale husflidslaget. Alle desse små "smykka" hengde eg opp langs ei snor på veggen heime, etter kvart som babytærne strekte seg og sokkane vart for små. Dekorativt!

Då eg seinare oppdaga boka "Myk start" vart det min tur til bli babysokk-strikkar. Kvar gong ein ny liten venn no kjem til verda, grip eg gjerne til oppskrifta derifrå. Ei fin gåve som eg klarer å strikke på nokre små kveldsstunder, og som mottakaren vonlegvis blir glad for, utan å bli for overvelda:
Kvifor nemner eg dette? Jau, på Nøstebloggen i går fekk vi vite at temaet for april er Kva og korleis gir me gåver? Eit kjekt, praktisk og inspirerande spørsmål, men som hos meg også sette filosofiske tankar og grubling i gang, om fullstappa leikerom, om konfirmantar som sit klare med kalkulatoren ved gåve-bordet, og om oss vaksne, som nok er dei mest kjøpelystne av alle, spesielt når vi kjenner oss utilstrekkelege ...


Men bittesmå babyføter anar enno ingenting om den ville (og vakre) verda der ute, og eg varmar dei gjerne enkelt - og bokstaveleg tala lett - med berre 15 gram silkeull! Ei typisk babygåve frå meg ser altså slik ut: Eitt par babysokkar, pakka inn i papir henta frå haugen med krusedullar (les: barnekunst), ein tilsvarande merkelapp, og gjerne også eit kjapt strikka gåveband, no når eg har fått blondekanten frå sokkane så godt inn i fingrane. 

For meg er altså smått godt! Small and easy gifts are (hopefully) beautiful gifts! 

garn- & oppskrifts-fakta:

"Sokker med blondekant": frå boka Myk start av May B. Langhelle

"Strikket snor": oppskrift frå Leine Merino (pdf-fil)

garn, sokkane: silkeull frå Askeladen/Nøstebarn
(farge: natur, lys oliven og dueblå (dén utgått no trur eg)

garn, gåvebandet: ITO Kinu, 100 % silke (farge: mauve)

PS: Dei to fotograferte sokkepara er ikkje nystrikka, men laga til mine eigne småttingar, difor ser dei så velbrukte ut :-)