HAVBLÅ VINNARAR, LYSEGRØNT HÅP

Trekninga av Tommelise-garnet er over, og tilfeldigvis vart det havblått til begge vinnarane. 

No har eg nøsta opp silkeulla (... pluss eit nøste kvit merinoull til kvar), slik at det skal vere rikeleg til å strikke eit par Tommelise-vottar, også om ein doblar garnet for å få større vottar.

Når eg går til posten med garnet, kjem eg også til å sende ein tredje pakke avgarde: Nemleg vottane med grøne fuglar på (strikka i Cheeky Merino Joy). Desse går til den nystarta Facebook-gruppa "Strikk til flyktninger". Ei bokstaveleg tala bittelita gåve, men eg håpar ho kan varme små hender i vinter.

Dei to som vinn ein havblå Tommelise-garnpakke er nr. 8: Aashild Leithe Hetland, som skreiv: "Silkeull, den høres så god ut! Har aldri prøvd dette garnet."

Og nr 50: Solveig/Made by Solis: Votteboka står på ønskelisten ... Elle melle deg fortelle vanskelig å velge her, men jeg ender nok på Silkeull. Nytt garn for meg som jeg veldig gjerne skulle prøvd ut. Nå x-jeg strikkepinnene og venter i spenning :-)

Hurra og gratulerer! Og til alle de andre: Hjarteleg for innsatsen og fine kommentarar. Spennande å lese!  Å dele ut garnpakkar er moro, så det blir nok fleire sjansar utover hausten.

PS: No treng eg altså postadressa til Aashild og Solveig slik at garnet landar på rett stad: 

De kan bruke e-postadressa mi frida.fielding(krøllalfa)yahoo.com  Oppdatering: Begge vinnarane har tatt kontakt!

Trekninga er gjort på nett, med hjelp av random number generator. 

VOTTAR TIL PRINSEN - mittens for a prince

Eit lite vottepar i handa er betre enn ti ubrukte garnnøste i skapet (nytt ordtak)

Eit par fjørlette vottar i silkeull er no ferdige, og kan pakkast inn som dåpsgåve. Nei, ikkje til George Alexander Louis of Cambridge, men til ein annan nydeleg, liten gut. Og uansett, alle barn som kjem til verda, er prinsar eller prinsesser, spør du meg. Eg fann dette norske mønsteret på nettet, og når namnet er 
"Liten fuggel" synest eg fargen dueblå som hovudfarge passa perfekt! 

Dessutan: eg vart så oppløfta av å kunne trylle fram fuglar av små masker, så eg fann meg raskt eit nytt "bevinga" mønster, denne gong til ein vaksen (... julegåve ...???) 
- frå ei heilt ny vottebok av to svenske bloggarar. Eg har lyst til å strikke omtrent alle mønstera dei har laga! Så snart eg er ferdig med dette første paret vil eg fortelje og vise meir!

oppskrift, dueblå vottar:

"Liten fuggel" av Jorid Linvik

(lenke til mønster-butikken hennar)

garn: Nøstebarn silkeull (nettbutikk)

fargar: dueblå (nr 852) og natur (nr 810)

størrelse: ca 6 mnd? (original 1-2 år)

pinnar: 2,5 mm (betre med 2,0?)
mi endring: utan tommel (sjå fotoet under)

totalvekt: 14 gram

Takk for lånet av dei store og fine pappa-hendene! 

BRUM-BRUM GENSER - a sweater for the little driver

Oppdatert 2. mai:  Ein mini-versjon av oppskrifta mi ligg no inne på Raverly!

Eg drøymer om å strikke eit blomster-teppe, eit lauv-mønstra sjal, ein florlett tunika ... Men når den store lidenskapen til 3-åringen er bilar, bilar, bilar - ja då er det berre å bøye seg i asfalt-støvet og lage ein "Brum-brum-genser". Og det vart ei artig oppgåve! Med garantert mjuke og miljøvennlege køyrety! 

Genseren er strikka på same måte som Sinnasau-genseren min til storebroren, i kroppsnær fasong, og i tynt ullgarn som skal passe bra no når den milde vårlufta er på veg. Maskene av den ubehandla saueulla strittar i alle retningar, men ein vask eller to skal vel gjere mønsteret jamnare. Genseren er strikka ovanfrå og ned (top-down), og ein uventa, fin effekt av aukinga på berestykket var at folkevogn-boblene strekte seg ut og forvandla seg til raske racer-bilar. I alle fall nesten ...

oppskrifta mi:

Brum-brum genser (innlogging Raverly) etter inspirasjon frå Pinneguri og GryHege 

bil-mønsteret:

Skandi's Cars (Raverly) ... men altså med fleire masker inni bilane pga aukingane

størrelse: ca 3-4 år

garn: Isager Tvinni Tweed, farge: 21s (= mørkeraud/
rustraud)

Nøstebarn 2-tråds merinoull, farge: 806s/ny811 (= "naturbeige") og 808s/ny812 (= "naturbrun")

pinnar: 2,5 og 3 mm

totalvekt: ca 80 gram

Tut-tut! Strikke-arbeid pågår! 

Brum-brum genser (Raverly)

Å PYNTE TIL ADVENT - the colors of Advent

Allereie advents-helg! Men kvar vart pynten min frå i fjor av? Og kva er eigentleg den "rette" advents-fargen ...? Blålilla eller raudlilla? Og er det ein faktisk skilnad på lilla og fiolett??? Då eg googla desse orda i dag tidleg kom eit ras av motstridande meiningar - blanda med vitskapleg fargelære, og eg var for trøytt til å bli så mykje klokare.

Og kanskje er lilla/fiolett uansett litt "ut" som pynte-farge i heimen? Han er i alle fall ein særing som ikkje er så lett å kombinere med andre fargar enn kvitt og grått, eller kva seier du?  

Mi nedteljing til advent var i alle fall å strikke denne lilla vesten. 

Utgangspunktet var ein svært enkel, rillestrikka baby-vest som eg forma litt om, pluss at eg igjen henta fram ideen med ugle-striper frå vesten  "Små grå" (Owlets and moles). 

Men akk, alle dei skinande perle-augene som eg hadde tenkt å sy på ... Tolmodet tok slutt allereie etter to par, men å ha noko til gode er alltid godt, ikkje sant?  

oppskrift, advents-vest:

"Frederik's vest" (Raverly-lenke)

av Susie Haumann, frå heftet "All you knit is love"

... med mine endringar (ugle-mønster og innsvinga erme-kantar)

garn: 

Nøstebarn silkeull, farge: lilla 

- dobla med Isager Alpaca 1, farge: nr. 013

total-vekt: 89 gram

pinnar: 3,5 mm

størrelse: ca 4 år 
(la opp 110 m, dvs størrelse 12-18 mnd 
i original-oppskrifta, som er med tynnare garn)

PS: Denne Arne&Carlos-inspirerte kula laga eg i fjor,
og døypte han "Snøkatt i adventsnatt"

BITTELITA STJERNE - a tiny star

 As your bright and tiny spark,
Lights the traveller in the dark.
Though I know not what you are,
Twinkle, twinkle, little star.

        (voggesong av Jane Taylor, 1806)

No har eg mi eiga, vesle stjerne her på bordet. Og sanneleg, eg veit ikkje heilt kva ho er:

For denne hua vart så bittelita at ho nok passar betre til ei dokke enn til ein nyfødd. Eller kanskje eg heller skal bruke ho som nålepute på knappe-glaset mitt ...? 

Uansett blir eg mjuk i hjartet av dette fine stjerne-mønsteret, så eg skal nok gjere fleire forsøk for å finne den rette babyhue-størrelsen. I ein varm raudfarge kan dette bli ei herleg julestjerne-hue, ikkje sant?

oppskrift:

"Sternen-Mützli" av Seiden Atelier Gottlieben,

har eg strikka éin gong før, då i rein silke

(... og dén hua vart for stor!)

garn:

silkeull frå Nøstebarn i fargen "lyng" (forbruk: berre 10 gram)

pinnar: 2,5 mm

ULNE UGLER - Ocean Owlets

Ugler flagrar rundt i hovudet mitt for tida! 

Og lyden av deira mystiske "uuuhuuu" er blanda med små bølgje-skvulp: Fargane akvamarin (frå Nøstebarn) og sjøskum (frå Pickles) låg nemleg i garnkorga mi og trygla om å bli blanda med kvarandre! Resultatet vart ein mild, grønblå melert genser - i yndlings-mixen min for tida: ull + alpakka.    

Det fine uglemønsteret til Katie Davies prøvde eg først ut i ein vertikal versjon på vesten "Små grå", men her er altså original-genseren til Davies (... med nokre små endringar av meg, sjå Raverly), omkransa av ugler rundt halsen. Min trufaste maske-markør passa som de ser perfekt til akkurat dette prosjektet!

Som vanleg tenderte eg mot minimalisme, og sydde berre på eitt par ugle-auge på genseren, istadenfor å måtte tømme heile knappe-lageret: 19 ugler med 2 auger kvar ville nemleg bety 38 knappar!

Nye ugler er allereie på pinnane må eg innrømme, så det er berre å følgje med! Har du ein dyrisk strikke-favoritt?

oppskrift:

Owlet av Katie Davies (= barnegenser) (Raverly)

...men med tynnare garn enn Davies foreslår,

eg brukte difor masketalet frå:

Owls av Katie Davies (= damegenser)

garn: 

Nøstebarn 2-tråds merinoull i fargen "akvamarin"

dobla med Pickles Pure Thin Alpaca i fargen "sjøskum"

pinnar: 3,5 og 4 mm

størrelse: ca 4-5 år

totalt forbruk: 193 gram

FINE RUSK - small heartwarmers

Den poetiske strikkebloggen Rare rusk er ein av "påfylls-stasjonane" mine på nettet  - det er alltid ei sann glede å dvele der ei stund! 

Ho som står bak bloggen, Line, er også komen eit godt stykke vidare enn meg, ho publiserer nemleg eigne mønster! Og no har eg prøvd meg på to av vestane hennar, som har vårlege namn som "Spire" (til venstre) og "Lille gåsunge" (til høgre.) 

Eg starta på begge i god tid før sommarferien - altså før eg gjekk inn i den lange strikke-dvalen ... Men no har eg endeleg funne knappar, hekla kantar og festa trådar. Ferdig!

Oppskrifta "Lille gåsunge" (til høgre) følgde eg omtrent frå A til Å, i herleg og luftig alpakka-garn frå Pickles. 

"Spire" derimot flaug sin eigen, fantasifulle veg - og fekk ei totem-stripe med små ugler nedover brystet. Eg valde dessutan å berre bruke éin farge istadenfor tre, nemleg den spesielle moldvarp-fargen (vanskeleg å fange korrekt på foto!) i silkeull frå Nøstebarn.

Alle desse endringane gjorde at eg rota meg bort i skogen fleire gonger, og den som ser nøye etter vil nok oppdaga nokre (små) feilskjær og skjønnheitsfeil. Men vi får kalle det personleg preg...

Noko heilt anna som irriterer meg mykje meir er at eg ikkje har noko enkelt og godt fotobehandlings-program etter at picnik.com la ned før sommaren. 

Kva brukar de andre i bloggverda for å lage fine foto-montasjar, farge-korrigere og slikt? Eg blir glad for gode tips! Gjerne "rett frå nett". Eller så får eg vurdere å installere eit program. (PS: Eg brukar Mac.)

Vesten "Små grå" (Owlets and moles):

oppskrift:

"Spire" av Rare Rusk/Line Berg (Raverly)

ugle-mønsteret:

frå genseren "Owls" av Katie Davies
(...som eg laga i ein vertikal versjon)

garn: Nøstebarn silkeull

farge: "muldvarp" (mole)

(... og "lyng" og "lilla" til broderte ugle-auge)

forbruk: 59 gram (størrelse ca 3 år)

pinnar: 3 mm

knappar: perlemor frå lageret

Vesten "Vesle bølgje" (Waves and willows):

oppskrift:
"Lille gåsunge" av Rare Rusk/Line Berg (Raverly)

garn: Pickles Pure Thin Alpaca

farge: "sjøskum" (no utgått?)

forbruk: 68 gram (størrelse 3-4 år)

pinnar: 3,5 mm

knappar: kokos med farga glasur

No er det nok posering for i dag!

VILL ETTER VEST - Wild about vests

Eg blir visst aldri lei av å lage vestar! Eg trur eg snart må innrømme at dette er i ferd med å bli ein aldri så liten lidenskap... Men tenk om alt hadde vore så enkelt og sjelevarmande som ein barnevest kan vere det ein frosen vinterdag. 


No har eg prøvd meg på to nye -  og dejlig danske - oppskrifter, begge henta gratis frå nettet.  Og kanskje det aller beste: begge er strikka på rund-pinne! Garnet har lege og modna sidan i haust, då eg sporenstreks skaffa meg to av dei nye fargene til Nøstebarn, nemleg moldvarp og akvamarin. Spesielt moldvarp-fargen er fascinerande: Er han grå? Er han beige? Eller har han eit skjær av rosa-lilla-raudt? Hm, eg trur litt av alt - rett og slett som ein moldvarp! 

Oppskrifta på den akvamarin-farga-vesten heiter Babys uldne undertrøye, og originalen foreslår fram og tilbake-strikk, men her rista eg laust og følgde rådet frå Monstermønster, og strikka rundt, og i tillegg laga eg knappestolpe slik som Synnøve i bloggen - with 100% love - . Hjarteleg takk til begge! Eg elskar å fyke rundt på strikkebloggar for å fylle inspirasjons-tanken min!  


Eg lurer forresten på om Ein gul knapp no strikkar babyteppe av akkurat den same akvamarin-fargen? Det er ikkje så lett å få fram korrekt nyanse på fotoa her, men det eg diggar med denne fargen er at han er så lite sukkersøt, altså langt frå klassisk babyblå. Kanskje meir i retning brevatn...? 

For temmeleg nøyaktig eitt år tilbake laga eg Ein liten vest-kavalkade  (januar 2011), og no kan eg altså føye to nye mønster til favoritt-lista mi. Kven blir den neste vesten? Kanskje du har eit drivande godt tips ..??? 

oppskrift, akvamarin-farga vest:

Babys uldne undertrøye (gratis frå familiejournal.dk)

garn: merinoull 2-tråds frå Nøstebarn

farge: "akvamarin" (= nr 61) 

storleik: 1 år (= passa til min to-åring)

forbruk: 41 gram

pinnar: 3 mm (2,5 mm truleg betre)

knappar: treknappar med bork

oppskrift, moldvarp-farga vest: 

Babyslipover (gratis frå femina.dk)

storleik: 0-1/4 år i masker, 2 år (pluss litt til) i cm

for å passe til 2-åring. Vart meir enn stor nok

garn:

silkeull frå Nøstebarn (merk: eg dobla garnet)

farge: "muldvarp" (= nr 15)

forbruk: 93 gram (altså med dobla garn)

pinnar: nr 3 og 3,5 mm
knappar: trekanta perlemorknappar

2012-KJOLEN - the new year's dress

Godt nytt strikke-år! No skal november-jenta endeleg få kjolen ho ikkje anar noko om:
Før 2-årsdagen hennar rakna nemleg planen min om ein bursdags-kjole fullstendig, og i desember vaks den raude Rose-kjolen seg kjempelaaang, og hamna under eit heilt anna juletre.

Men kva er betre enn ein feiande fin nyttårs-presang ...? Den siste maska strikka eg på den gylne datoen 1. januar, og no skal kjolen pakkast pent og sendast i posten (Minsteguten måtte berre vere jentemodell for fotoa først). Blandinga silke, ull og alpakka var min eigen idé, og utan ermar skal vel denne kjolen passe til både vinter og vår, håpar eg.

Denne fine gratis-oppskrifta frå Pickles prøver eg forresten gjerne igjen! Spesielt berestykket i vevstrikk gir ein stilig effekt, som minner meg om halssmykka til Kleopatra og andre storheiter. Inspirerande å tenkje på at ein kan bruke heilt andre fargar (og garn) på berestykket enn resten av kjolen.

PS: Stjerne-pynten i midten laga eg av grapefrukt-skal, trykt ut i pepparkake-former, og deretter tørka flatt under press. Kan sikkert lagast med allslags citrus-frukter. Lyser beskjedent, men fint opp i vintermørkret!

oppskrift, kjole: 

"En liten julefinkjole" frå Pickles 

(men eg droppa ermane)

garn:

bolen: Nøstebarn silkeull "lilla" nr 43 (63 gram) 

dobla med Isager Alpaca 1, farge nr 013 (44 gram) 

berestykket: Nøstebarn silkeull "natur" nr 10, dobla (11 gram) 

og "lyng" nr 32, enkel (8 gram)

pinnar: nr 3,5 mm

storleik: 2-3 år (totalt garnforbruk 120 gram)

ROSENRAUD - blushing Rose

Det var ein gong ein bloggar som ville strikke fest-kjole til datoen 17. november. Ja, for kva passa vel betre når bloggen hennar skulle fylle 1 år akkurat same dag som ei lita venninne på 2!


Bloggaren strikka og strikka på den rosenraude gåva, og garnnøstet vart mindre og mindre, heilt til det forsvann. Men kjolen var enno ikkje ferdig ... 


Bloggaren raudna i kapp med den herlege fargen. For inne i den vesle eventyrverda hadde ho gløymt at det var noko som heitte prøvelapp og måle-stokk. Bortanfor sol og bakanfor måne trilla så eit heilt anna garnnøste fram - og dermed vart Rose-kjolen endeleg ferdig! 


Men ikkje passar Rosenraud til 2-åringen. Nei, slett ikkje, berre som rikeleg stor dyne, kanskje ... Men jenter veks, og heile verda er full av jenter - og snart er det jul - så det blir vel ei råd skal du sjå, tenkjer den raudkinna bloggaren. Og snipp, snapp snute, snart bankar nok nissen på ei anna rute. 

oppskrift: 

"Rose" av Helga Isager (ja, dottera til Marianne Isager)

frå heftet "Amimono. Knit collection 2010" 

- og finst visst også som kit på amimono.dk -

Mine detaljar/endringar under "Blushing rose" på Raverly (innlogging)

garn:

Nøstebarn 2-tråds merinoull, farge 22 "rød" 
(oppdatering 23. nov: denne fargen er utgått no, seier Nøstebarn, nr 21 "bringebærrød" er alternativet)

... dobla med Isager Alpaca 1 (100 % alpakka), farge nr 25 

Dei siste omgangane oppe på berestykket med Isager Alpaca 2 (åleine) (50 % alpakka, 50 % ull), farge nr 25
storleik:
2 år i masker, 6 år i centimeter...

pinnar:

nr 3, 3 1/2 og 4 mm
knappar:
oppskrifta seier 5 stk, eg synest 2 ser like fint ut
(og eg hadde ikkje fleire av desse gule heller :-)
Knappestolpen skal vere bak på kjolen, men eg trur framme kan vere like fint

TO TYNNE OG EIN TJUKK - thin stripes of sun

Kva gjer ein når ferie-strikket er pakka pent ned i bagasjen, men ein fryktar at garnet ikkje rekk? Eg slengde eit par tynne garnrestar på toppen av kofferten, og resultatet ser de her: 


Ei jakke med godt og tjukt 3-tråds-garn, "drøya" med striper i dobla 2-tråds restegarn.


Eg har døypt jakka Solstriper i brevatn, sidan eg synest den olivengrøne fargen nesten skiftar ham til gult i doblinga med breblå. Maske-magi! 


Nøstebarn-oppskrifta prøver eg her for første gong, og eg må innrømme at eg fekk litt startvanskar då eg oppdaga at den berre har éin størrelse og eitt garn oppgitt, nemleg for baby (ca 6 mnd) i 2-tråds tynn lammeull. Men eg ville gjerne lage ei slik jakke til to-åringen min, så hm, kva skulle eg gjere då? Sidan sommar-hjernen ikkje var heilt klar for matematikk valde eg ein ny, men enkel vri: eg strikka jakka i 3-tråds garn i staden for 2-tråds, og dermed også med tjukkare pinnar. Voilá, jakka passar perfekt! (...Ja, ho er endåtil litt for stor).


Original-oppskrifta foreslår heile tre ulike fargar i stripene, men eg valde altså heller ein mild "solstripe"-variant ved berre å lage éi enkelt farga stripe (dvs midt-stripa med 50 masker), i ein oppmjuka fargemix av 2-tråds restegarn i oliven blanda med grunnfargen breblå. 


Knappane er såkalla vintage, det vil seie gamle og slitte knappar (i tinn?) frå familiens knappeboks. Denne jakka er forresten mitt beskjedne bidrag til Sommarutfordringa på Nøstebloggen, der fristen går ut i dag.

oppskrift: 

"Babyjakke strikka i eitt stykke", 
frå boka Strikk til Nøstebarn av Kathrine Gregersen
her i min variant for større barn

garn: 

grunnfargen: 3-tråds breblå = nr 62 i Merinoull 
(300 m = 100 gr - eg brukte 130 gram) frå Nøstebarn

stripene: 2-tråds breblå dobla med 2-tråds lys oliven = nr 72 (600 m = 100 gr - eg brukte ca 13 gram av kvar)

pinne: 3,5 og 4 mm

KJÆR VEST, MANGE NAMN - top tank top

Før eg vart mamma, var ordet "strikkavest" noko som fekk meg til å tenkje på golfspelande gentlemen i tweed-knickers, eller på ein oldefar med pipe i gyngestolen. Men no vil eg seie at strikkavesten er blitt til ein av dei absolutt fremste baby- og småbarnsstrikk-favorittane mine!  

Vestar er så lette å kle på ein liten kropp, dei varmar - og pyntar opp - utan å dominere, og ikkje minst er dei så mykje enklare å lage enn jakker og genserar (... kven likar å montere ermar...?) 

Vesten "Lille livstykke" er ferdig! Nedst ribbestrikk, øvst perlestrikk. Til slutt: ein enkel knapp i oliventre.


Som eg lova i førre innlegg, skulle eg starte året med å fullføre gamle affærer, og no er altså det rosalilla garnet mitt blitt til ein vest. Det vil seie: "Lille livstykke" (ny lenke til shop.isagerstrik.dk) er det poetiske namnet på dette gratis-mønsteret signert Marianne Isager. 


Garnet er frå ein plantefarga og økologisk serie (frå det norske firmaet "Det mjuke"), men akkurat fargen kochenille er temmeleg dyrisk, for han stammar faktisk frå knuste skjoldlus... Hm, skal eg fortelje dette til foreldra til eittåringen som skal få denne vesten i forseinka bursdagsgåve...? Om nokon vil vite meir om fargen og garnet, har bloggen  Krisztinas hobbysider eit fint innlegg, der Krisztina har strikka finlandshette i akkurat same garn og farge som vesten min.


I fjor laga eg "Lille livstykke" i plantefargen valnøtt, og minstemann har verkeleg budd i denne vesten til tider (... som også er lett å sjå på fotoet under!). Her kjem ein liten kavalkade og vurdering av dei tre oppskrift-favorittane mine, som alle tre faktisk heiter noko heilt anna enn vest: 

Dei to til venstre: "Lille livstykke" i fargane Kochenille og Valnøtt i garnet Ingunn frå firmaet Det mjuke. Eg diggar det perlestrikka berestykket! Gjer vesten vakrare, og er moro å strikke etter dei endelause rekkjene med ribb. 

I midten: "Inderst inde" frå boka "Sødt & blødt" av Lene Holme Samsøe, i fargen grønmelert (nr 158) i Tynn alpakka frå Du store alpakka. Eg ser at alpakka-garnet har halde betre på fasongen enn vestane i ull og silkeull, men så er vel denne vesten minst brukt også. Eldstemann på tre år nektar nemleg å ha han på meir... (Eg set min lit til eittåringen, som snart kan overta :-)

Dei to til høgre: "Undertrøye" frå boka "Strikk til Nøstebarn" av Kathrine Gregersen, i silkeull i fargane olivengrønt og blått (den blå er utgått no trur eg). Mine første strikka baby-vestar! Ein fin klassikar, men kan bli litt kjedeleg å strikke pga ribb, ribb, ribb...

Begge dei danske oppskriftene er litt meir forseggjorte enn den frå Nøstebarn: Dei tipsar om korleis strikke slik at sidene kan bli finast muleg i samansyinga til slutt. Og spesielt "Inderst inde" har ein raffinert måte å felle på slik at ermholene blir elegant innsvinga  - men slik blir oppskrifta også meir innvikla å både strikke og å forstå.  


Fordelen med "Inderst inde" er at han er knappelaus. Eg slappar nemleg aldri heilt av når ein smårolling har knappar på kleda sine! Min eittåring likar i alle fall veldig godt å tyggje på knappen på valnøtt-trøya si, og eg vurderer difor å fjerne knappen. Kanskje blir det fint å hekle ei hempe i staden?

oppskrift: Lille livstykke av Marianne Isager
storleik: 1 år (men eg strikka eit par cm lenger enn oppskrifta)

garn: "Ingunn" (økologisk merinoull) 170 m - 50 gr, totalt brukt 55 g
(altså tjukkare enn garnet i oppskrifta, blir då ikkje så tettsitjande)

farge: Nr 004 kochenille VI 4
firma: Det mjuke
pinnar: dominopinnar nr 3,5