Vettlingar og sokkar

Fyrir utan kragann sem 5 ára leikskólastrákinn minn vantaði og ég sýndi í síðustu færslu, þurfti hann líka sokka og vettlinga. Amman hefur greinilega sofið á verðinum í prjónaskapnum og því var ekki um annað að ræða en að sitja dálítið við og prjóna. Vettlingarnir eru eftir uppskrift frá Storkinum sem heitir Randalíus og er frí á heimasíðu hans. Garnið er Drops merino extra fine.
 

Sokkarnir eru prjónaðir úr Fabel frá Drops eftir uppskriftinni Pitter Patter frá garnstudio.com.  Ég hef oft prjónað þessa uppskrift áður og hef sokkabolinn aðeins víðari en uppskriftin segir.

Allt sem ég prjóna á barnabörnin merki ég eins og hér að ofan, enda týnist fátt ef nokkuð.

Regnbogasokkar

Eitt af sumarverkunum var að prjóna sokka á barnabörnin fjögur fyrir veturinn. Ég féll alveg fyrir þessu garni þegar ég sá það í Garnbúð Eddu í vor. Einni ömmustelpunni fannst ég reyndar ekki geta kallað þetta regnbogagarn því það vantaði gula litinn. En það er glimmerþráður í því, það er nú eitthvað.

Uppskriftin sem ég fór eftir er frá garnstudio.com. Ég fór reyndar ekki eftir henni varðandi lykkjufjölda, sokkarnir verða of þröngir. Ég teiknaði eftir fótum barnanna til að hafa einhver stærðarviðmið og mátaði þegar þau náðust. Svo var allt merkt.

 Garnið heitir Signature Sparkel úr Garnbúð Eddu. Tvær 400 metra dokkur dugðu í alla sokkana. Prjónarnir voru nr. 2,5 og hér er tengill á uppskriftina.  Börnin eru 4, 6 og tvær 8 ára, en ég fór sem sagt ekki stíft eftir uppskriftinni með uppfitjun og stærðir.

Barnasokkar úr Fabel

 Þá eru öll barnabörnin búin að fá ullarsokka fyrir veturinn.  Ég fór eftir uppskrift frá Garnstudio.com og notaði Fabel garn eins og gefið er upp í uppskriftinni. Stroffið er hátt og gott, en sokkbolurinn varð alltof þröngur miðað við lengd, svo ég fækkaði verulega úrtökum eftir stroffið og hælinn. Þá urðu þeir fínir. Þeir eru á tvær fimm ára og eina þriggja ára skvísur og ársgamlan gæja.

Uppskriftin er hér.

Snær sokkar

 Ég hef áður prjónað eftir þessari uppskrift á ömmustrákinn en mamman vildi fá sömu sokka aftur, bara aðeins stærri. Ég ákvað þá að prjóna bara á öll börnin fyrir veturinn.

 Uppskriftin er frá Petit Knitting. Ég prjónaði úr Drops merio extra fine. Uppgefin prjónastærð er nr. 4 og prjónaði ég fyrst allan sokkinn með þeim, en leistinn varð alltof laus þannig. Þess vegna hafði ég legginn með prjónum nr. 4 en leistann með 3,5, og svo var bara mátað. Þetta eru frekar þykkir sokkar, en fínir innan í rúm stígvél eða kuldaskó.

Sokkar

Nú á ég nýja ullarsokka fyrir veturinn.

Þeir eru mjög einfaldir, og studdist ég við uppskrift sem heitir Vanilla socks.
Prjónastærð er 2,25.

Garnið keypti ég hjá Kristínu í Vatnsnesi, í gróðurhúsi þeirra hjóna á Laugabakka.

Frúin keypti garn og bóndinn grænmeti.

Reyndar kom ég þangað tvisvar í sumar.

Alma, Víðir og Þórólfur

Þær hjá Prjónakistunni hafa boðið upp á samprjón á fb frá því snemma á tímum samkomubannsins.

Þær voru svo rausnarlegar að gefa uppskriftir, og eru enn að.

Þetta er það sem ég gerði í samprjóninu.

Þær nefna uppskriftirnar eftir þríeykinu okkar.

Fyrsta uppskriftin, sú hér að ofan, heitir Alma.

Prjónaði úr léttlopa á prjóna nr. 3,5. Urðu heldur litlir, hefði þurft nr. 4, en þeir voru líka gefnir upp í uppskriftinni.

Svo var það Víðir.

Þessir vettlingar eru úr tvöföldum lopa, á prjóna nr. 5. Ætla að þæfa þá.

Prufaði líka að prjóna þá úr afgöngum af Spuna.

Þá kom sokkauppskriftin Þórólfur.

Í hana ákvað ég að nota Robust sokkagarn sem ég hef lengi átt, og í munstrið afganga af Drops merino extra fine. Prjónastærðin var 3,5, og passa sokkarnir á stálpað barn.

Það síðasta sem ég prjónaði í þessu samprjóni í bili voru vettlingarnir Þórólfur.

Hér notaði ég sama garn og í sokkana og með sömu prjónastærð.

Ég gerði þá með ömmustelpurnar í huga og hafði eitt parið aðeins minna, en þurfti þá að breyta mynstrinu og hnoðaði saman annað sem minnti á það upprunalega.

Þarf eitthvað geyma þessa, eru á aðeins eldri en mínar eru núna.

Sokkar

Sokkar tolla voða illa á tæplega sjö mánaða litla manninum mínum, hann er ýmist berfættur á öðrum eða báðum.

Ég hef gert  marga svona sokka áður, og núna hafði ég stroffið frekar langt, og þá er hægt að setja það utan yfir buxurnar og tolla þeir þá betur.

Uppskriftin er frá Garnstudio.com.

Sokkar, vettlingar og hálsaskjól

Prjónaði sokka á ömmustrákinn, næst minnstu stærðina af Snær sokkar frá Petit knitting.

Vettlingarnir eru líka frá Petit knitting og heita Sindri vettlingar.

Stærðin er á 1-2 ára.

Svo vantaði hann kraga fyrir vetrarveðrið.

Uppskriftin er aftur frá Petit knitting og heitir Skorri hálsskjól.

Ég valdi minnstu stærðina, 6-12 mánaða, en sleppti stroffi neðst. Svo hafði ég 1 sl og 1 br í kraganum sjálfum til að hann héldi betur að hálsinum, en í uppskriftinni er perluprjón.

Kraginn passar mjög vel á hann svona.

Notaði Drops merino extra fine í allt.

Norskir sokkar

Þessa sokka með norsku munstri prjónaði ég seint á síðasta ári handa ömmustelpunum tveimur, og hafði stærðina á eins árs, og þeir passa enn á þær, 21 mánaða gamlar.

Svo kom ný ömmustelpa í heiminn fyrir sex dögum, og ég mátti til með að prjóna eins á hana, hafði minnstu stærðina, á 6 mánaða.

Garnið átti ég allt í garnskúffunni minni.

Uppskriftin er HÉR

Refasokkar

Refasokkar á ömmustelpurnar (næstum) þrjár. 

Stærri sokkarnir eru á dömurnar mínar sem verða tveggja ára í sumar, og þeir litlu eru á þá þriðju sem fæðist eftir nokkra daga.

Þetta er það fyrsta sem ég prjóna í þríriti. Hingað til hef ég prjónað tvennt af öllu.

Uppskriftin er hér.

Jólasokkar á dúllurnar mínar

 

Ég freistaðist til að prjóna jólasokka fyrir dúllurnar mínar tvær.

Uppskriftin er á jólaverkstæði Garnstudio.com, og gerði ég stærð fyrir 6-9 mánaða.

Rauða garnið er frá Rauma, og það hvíta er Lanett.

 

 

Posted with Blogsy

Finnsku lestarsokkarnir

Tvö pör af finnsku lestarsokkunum komin til réttra eigenda.

Prjónað úr Lanett á prjóna nr. 2,5.

 

Posted with Blogsy

Eitt sokkapar í viðbót

 

Gerði annað sokkapar eins og það gráa í síðustu færslu. Liturinn kemur ekki rétt út á myndinni, þeir eru ekki svona bleikir, heldur vínrauðir. Þetta er síðbúin afmælisgjöf.

 

Posted with Blogsy

Sokkar úr kambgarni

Mér finnst alltaf gaman að prjóna sokka. Þessa nota ég í vetrarskóna, og ég hafði þá með háu stroffi til að þeir sæjust vel upp úr skónum. Efri sokkarnir eru reyndar steingráir á litinn, alls ekki bláir, en svona mynduðust þeir úti í vetrarbirtunni.

Uppskriftin af hæl og framleista er mín uppáhalds, fylgir innan á miðanum á Fabel garninu, en stroffmunstrin fann ég í bókinni Sokkaprjón eftir Guðrúnu S. Magnúsdóttur. Ég notaði kambgarn og prjóna nr. 2,5.

 

Posted with Blogsy

Sokkar

Þessi sokkapör prjónaði ég handa annarri tengdadóttur minni. Bláu sokkarnir eru prjónaðir úr Drops Merino extra fine, uppskriftin er hér.

Þeir röndóttu eru úr ullar/bómullarblöndu sem heitir Hot Socks, og fæst í Föndru eins og Merino garnið. Uppskriftin er innan á miðanum á Fabel garninu, fín uppskrift, sem ég hef prjónað nokkrum sinnum áður. Þeir eru reyndar gráir, en virðast bláir á myndinni.

 

Posted with Blogsy

Vasainniskór

 

Þegar maður sér þessi prjónuðu stykki fyrst detta manni ekki í hug inniskór.

En það er samt málið, inniskór eða sokkaskór, sem hægt er að stinga í vasann, og taka upp þar sem þeirra er þörf. Svo er svo gaman að prjóna þá, uppskriftin lærist strax utan að og er tilvalið funda- og sjónvarpsprjón.

Ein stærð hentar öllum. Uppskriftin er HÉR.

 

Posted with Blogsy

Ullarsokkar

Ég er búin að gatslíta ullarsokkum sem ég prjónaði í hittifyrra, og þurfti því að draga fram garn og prjóna og gera fleiri sokka. Ég notaði bara afganga, og réði það litavalinu að mestu. Þessir að ofan eru úr léttlopa og einbandi, prjónuðu saman.

 

Sokkarnir hér að ofan eru prjónaðir eftir sömu uppskrift og þeir gatslitnu, úr léttlopa.

Mér finnst langbest að nota svona lopasokka í gönguskóna.

Ég er að verða búin að prjóna þriðja parið. Allar uppskriftirnar eru úr bókinni Sokkar og fleira eftir Kristínu Harðardóttur. Sú bók er í miklu uppáhaldi hjá mér.

 

Posted with Blogsy