Viskastykki og fleira

 Alltaf sest ég við útsaumsvélina öðru hverju og oft verða viskastykki fyrir valinu. Það er mjög þægilegt að sauma í hvítt efni, en mér finnst líka gaman að sauma í köflótt og röndótt og að finna þá munstur og liti sem koma vel út í þeim.

Yngsta ömmustelpan, átta ára, teiknaði mynd þegar hún var í heimsókn og bað mig að búa til púða með myndinni. Það er svo gaman þegar þau biðja mig um svona greiða og ég geri það með gleði. Þetta er mjög auðvelt í framkvæmd í gegnum app í símanum frá Creativate. Maður tekur mynd og sendir í vélina sem saumar myndina. Hún valdi litinn.

Einhvern tíma saumaði ég þessa nálapúða í útsaumsvélinni og gaf elstu stelpunni þann græna í stíl við grænu Husqvarnavélina hennar. Ég hélt þeim bleika sem er í stíl við mína bleiku Husqvarna Epic vél. 

Allt í stíl.

Jólajóla

Hér kemur smávegis jólalegt sem ég gerði í útsaumsvélinni. Reyndar saumaði ég þetta um og eftir síðustu jól en dró það að setja það á bloggið og fannst ekki passa að gera færslu um þetta þegar fór að draga nær páskum. Ákvað að bíða frekar næstu jóla.

 

Munstrin eru bæði fengin frá Embroidery Library. Ég minnkaði bollann aðeins í forritinu mínu en hann var  var full þéttur í útsaumi jafnvel þótt forritið fækkaði sporunum hlutfallslega. Það er miklu hepplegra að nota munstur eins og kransinn að ofan sem er miklu opnara eða þá eitthvað sem fyllir ekki svona þétt.

Þetta er líka jólamunstur, en blómin hefðu mátt vera í sterkari lit. Maður er alltaf að læra. Ég vil helst hafa viskastykki röndótt og reyni bara að finna munstur sem koma vel út í þeim. Svo þurfa þau ekki að vera glæný, það má alveg sauma í notuð viskastykki og handklæði.

Svo gerði ég smá jólatrésskraut sem prýðir annað jólatréð okkar í ár, eldgamalt tré frá tengdaforeldrum mínum sem ég hengi eingöngu skraut á sem er handgert og heimagert. Þetta er líka frá Embroidery Library.

(Jóla)músagangur

 Ég sá pakkningu með uppskrift og garni í þessar jólalegu mýs og fannst þær svo sætar að ég varð að prjóna þær. Auðvitað hafði ég barnabörnin í huga en ég hélt samt eftir þremur fyrir mig en leyfði þeim öllum að velja sér tvær hverju.

Uppskriftin sem fylgdi var íslensk þýðing úr norsku, en ég fór fljótlega yfir í frummálið því það voru slæmar villur í þýðingunni. Að öðru leyti gekk allt vel, ég notaði ullartróð, hvítt eða rautt eftir því sem við átti. Eyrun eru stífuð með sykurvatni en þau vildu samt vísa of mikið niður og fyrir augun svo ég tók nokkur saumspor í þau til að þau tylldu betur upprétt.

Sex ára ömmustrákurinn lék sér með mýsnar á ýmsan máta þegar hann fékk þær í hendur.

Uppskriftin er frá garnstudio.com og garnið heitir Fabel.

Jólahúfur

 Kennaraparið í fjölskyldunni uppgötvaði fyrir jólin í fyrra að eiginlega vantaði þau jólahúfur til að passa inn í stemminguna sem ríkir í skólanum svona rétt fyrir jólin. Ég lofaði að bæta úr því fyrir næstu jól og þetta er afraksturinn.

Uppskriftin er frá Ömmu Loppu. Garnið er frá Katia og heitir Craft Lover. Prjónarnir voru nr. 4. Ég prjónaði stærstu og næststærstu stærðina.

Jólaskraut í útsaumsvélinni.

Í janúar er ég oft í stuði til að gera jólaskraut og jólatengda handavinnu. Þá er mesta hátíðarannríkið búið og lífið að róast. Það er ekki seinna vænna að pósta þessu hér áður en páskarnir koma.

Ég tók smá skorpu í útsaumsvélinni að þessu sinni. Ég átti afgang af efnum sem pössuðu öll saman, eldgömul, og flest með gylltu í og ganga ekki með öðru sem ég á.  Þau voru ekki í dæmigerðum jólalitum heldur vínrauð, fjólublá, græn og ljós. Mig langaði að nota þau upp, og tókst að sauma þetta úr þeim.

Ég hafði tvinnann ýmist gylltan eða silfurlitaðan. Í stað þess að nota metaltvinna saumaði ég með polyestertvinna úr Pfaff sem gefur sömu áferð og metaltvinninn en er alveg skotheldur í saumavélina.

Nokkrar glasamottur með jötusenunni urðu líka til, prófaði nokkra liti.

Allt hér að ofan fékk ég frá Kreative Kiwi sem eru staðsettir á Nýja-Sjálandi, og eru í uppáhaldi hjá mér.

Svo sá ég að jólatréð gat alveg bætt á sig meira skrauti og saumaði þessar hvítu stjörnur. Munstrið að þeim fylgir vélinni minni, en ég stækkaði þær nokkuð.

 Bútasaumshjörtun eru líka frá Kreative Kiwi, elska hjörtu…þessi eru lítil en þau komu í nokkrum stærðum, ætla að sauma fleiri stærðir.

Jólaveifur

 Um jólin skipti ég út veifum sem ég hef annars alltaf hangandi í dyraopi inn í eldhús. Ég fann teikningu af útlínum trés á netinu og saumaði eftir þeim í jólaleg efni. Efnið lagði ég saman tvöfalt með flíselíni á milli, nældi sniðið ofan á og saumaði með beinu spori í kringum það. Svo klippti ég í kring og festi allt saman með skábandi að ofan. Ætlaði ekki að tíma að taka þau niður. 

Desemberálfur

Desemberálfurinn heilsaði í dag, íklæddur jólalitunum, sem í mínum huga eru rauður og grænn, ásamt hvítu. 

 

Bútasaumurinn merktur

Þegar ég tók niður jólabútasauminn núna í janúar greip ég tækifærið og merkti öll ómerkt teppi sem ég gekk frá, og hélt svo bara áfram með ýmis önnur teppi. T.d. hafði ég gleymt að merkja kokkateppið sem ég gerði fyrir ári síðan, skil nú reyndar ekkert í því. Ég tók bara minnstu útgáfuna af einni myndinni og minnkaði hana ennþá meira og bjó til merkimiða.

Í janúar fannst mér alveg kominn tími til að eignast flott útsaumsforrit og keypti My Sewnet Platinum forritið í Pfaff. Síðan er ég búin að skemmta mér vel við að skoða það, og sé að ég hef nóg að læra og prófa í útsaum. Hringlaga myndirnar eru allar úr Spiral fídusnum í því, endalausir möguleikar, og letrið tekið úr forritinu líka. Jólamyndirnar eru einnig þaðan, úr Super Design, en það passar svo vel í þessar merkingar því myndirnar eru svo litlar.

Það var hins vegar þrautin þyngri að finna út úr ártölunum á teppum sem ég saumaði áður en ég hóf þetta blogg árið 2009. Bloggið er handavinnudagbókin mín og þar get ég flett upp öllu mögulegu, en bútasaumurinn á sér sögu a.m.k. 15 ár lengra aftur í tímann. Ég lagðist í rannsóknarvinnu og notaði myndaalbúmin á heimilinu til að sjá hvort ég gæti lesið eitthvað út úr þeim, og niðurstaðan varð sú  að sumt var ég nokkuð örugg með en annað varð ég bara að tímasetja eftir tilfinningu. Ég kíkti til dæmis á útgáfuár einnar bókar sem ég sneið og saumaði eftir og sá að teppið var alla vega ekki eldra en hún. Svo hafði ég notað EQ forritið við sum teppin þannig að þar hafði ég viðmið, þó ég muni ekki alveg hvaða ár ég fékk það, en það var örugglega eftir að ég fékk fyrsta saumaherbergið mitt árið 2005. En þar með er þetta bara afgreitt.
 

Hreindýrapúði

Milli jóla og nýárs saumaði ég þennan púða. Hreindýramunstrið fékk ég í blogginu sem birtist í saumavélinni minni. Þetta er ætlað til að sauma í jólapeysu, dálítið grófgert og gisið, en mig langaði að prófa það, enda alltaf hrifin af krosssaumi. Ég minnkaði það samt töluvert.

Snúrukantinn í kringum púðann gerði ég úr venjulegu, tilbúnu skábandi sem ég átti, og notaði til þess bestu aðferðina sem ég kann, en hún er sú að renna því í gegnum overlockvélina með snúrunni sem liggur þá á hárréttum stað í snúrufætinum sem hægt er að kaupa á vélina. Hún fylgir nytjasaumspakkanum, og svo er líka til skrautsaumspakki. Þegar ég sauma svo púðann saman nota ég mjóa, langa rennilásafótinn á saumavélinni.

 

Jólaálfur

Husqvarna Sapphire 85 saumavélin mín, sem ég nota eingöngu sem útsaumsvél, er nettengd og á henni birtist blogg frá Husqvarna Viking með ýmsum verkefnum og stundum útsaumsmynstrum sem hægt er að opna í vélinni. Í fyrra sendu þeir saumavélaeigendum þrjár útgáfur af þessum jólaálfi. Ég hef lengi ætlað að sauma hann í eitthvað, og gerði það augljósa í gær og setti hann í viskastykki, sem ég keypti í Bakgarðinum hjá Jólahúsinu í Eyjafirði í sumar eða fyrrasumar.

Hann saumaðist vel út, en ég fór tvisvar yfir skeggið og hjartað til að hylja rendurnar í efninu.

 

Demantamálun

Í sumar kom ég við í Freistingasjoppunni á Selfossi eins og ég geri oft, og á leið út úr búðinni rak ég augun í litlar pakkningar af demantamáluðum jólaref, kíkti á þær en fór svo bara út í bíl. Sneri samt við þegar ég var búin að hugsa málið aðeins, þetta var hræódýrt, á hálfvirði,  og ég ákvað að eiga þetta í handraðanum ef ske kynni að ömmustelpurnar hefðu einhvern tíma gaman að þessu. 

Einverju sinni í haust var sú yngsta, 5 ára, í pössun hjá mér, og ég sýndi henni þetta og varð hún strax mjög áhugasöm. Systir hennar, 7 ára, var líka mjög dugleg með sinn ref, og eftir 3-4 pössunarheimsóknir kláraðist refurinn.

Sú þriðja, 7 ára, vann líka við sinn ref af miklum áhuga. Hún dæsti oft þegar við vorum að byrja á þessu tvær saman og sagði: “Þetta er svo gaman….það er svo gaman að gera þetta með þér, amma”.  Mesta fjörið var þegar þær voru allar þrjár saman, en afköstin kannski ekki eins mikil þá. En allar myndirnar kláruðust í tæka tíð í desember.

Svo sat ég alltaf með þeim og demantamálaði sjálf. Ég mátti til með að prófa þetta líka og fékk mér þessi spjöld í Fjarðarkaupum.

Þessar Hello Kitty lyklakippur sá ég svo í Fjarðarkaupum og líka einhyrningakippurnar. Báðar hafa líka steina aftan á.

Nú á ég smá lager af lyklakippum, t.d. sæhestakippur sem sú yngsta bað mig að kaupa þegar hún frétti að þær væru til. Keypti líka litla prinsessulímmiða til að steina. Hlakka til að vera með þeim í þessu áfram.

Þegar ég keypti jólarefina í sumar greip ég líka með mér þennan jólasvein sem er 24x34 cm. Töluverð vinna að klára hann, var mest að vinna í honum þegar þær voru líka. Þeim fannst þetta ganga heldur hægt hjá mér, en voru mjög hvetjandi: “Amma, þú klárar þetta örugglega fyrir jól”. Og það gerði ég, eiginmaðurinn greip meira að segja í þetta stundum, og nú er þessi gamaldags jólasveinamynd búin, vantar bara svartan ramma.

 

Jólahúfur

Fyrir fjórum árum prjónaði ég svona jólahúfur á eldri ömmustelpurnar tvær sem þá voru þriggja ára. Önnur þeirra var enn að nota sína húfu i fyrra, þá sex ára, og tók hana varla af sér allan desember, í orðsins fyllstu merkingu. Ég frétti það of seint fyrir jólin í fyrra að bróður hennar langaði í svona húfu líka, svo ég byrjaði bara strax í janúar að prjóna á hann fyrir þessi jól og aðra stærri á hana, og svo vildu hinar ömmustelpurnar tvær auðvitað fá líka. Þær eru því komnar í notkun fyrir nokkru.

 Garnið er Nepal frá Drops, keypt í Gallery Spuna i Hamraborg, og uppskriftin er HÉR.

Stjörnur

Milli jóla og nýárs prófaði ég að sauma út frístandandi stjörnublúndu. Þessi er í vélinni minni, svo ég notaði hana.

Ég tók frekar stóran ramma og raðaði sex stykkjum á hann, en hefði komið fyrir fleiri. Áður var ég búin að sauma eina til prufu á lítinn ramma. Ég notaði sama útsaumstvinna í spóluna og í yfirtvinna.

Þær heppnuðust bara vel, og þegar ég skolaði úr þeim vatnsleysanlega undirlagið passaði ég bara að skola hæfilega mikið úr svo þær yrðu stífar, og þurrkaði svo undir fargi.

Ég hengdi þær á jólatréð fyrir myndatökuna, en þær bíða annars næstu jóla. Ég á lítið jólatré þar sem ég hengi skraut sem ég geri sjálf, kannski fara þær þangað. 

 

Jólaveggteppi

 Eins og nærri má geta eru mörg bútasaumsteppi hangandi á veggjum heimilisins. Mörgum þeirra skipti ég út um jólin, og sums staðar oftar á ári eins og í þvottahúsinu. Þar er ég með lítinn vegg þar sem ég skipti út eftir árstíðum líka. Átti samt ekkert jólalegt á vegginn og byrjaði á þessu litla teppi fyrir jólin í fyrra en náði ekki að klára, svo ég lauk því núna fyrir jólin. 

Aðventusjal/Adventssjal

Þetta sjal heitir á norsku Adventssjal og ég prjónaði það á aðventunni. Ég átti jólalit frá henni Kristínu í Vatnsnesi frá í fyrra sem heitir Bjart yfir jólum og langaði mig alltaf að gera eitthvað úr því þegar nær drægi hátíðinni. Svo átti ég í fórum mínum litinn Furugerði sem ég pantaði mér einhvern tíma frá henni, og fundust mér þessir tveir litir fínir saman, enda pínu grænar flikrur í jólagarninu.

Svo fann ég þessa ágætu uppskrift í bók, sem ég á og heitir Sjal og skjerf eftir Bitta Mikkelborg. Ég var að leita að sjali með tveimur litum og passaði það vel garninu mínu. 

 Það kom sér vel að eiga nóg af þessum uppáhalds prjónamerkjum til að aðskilja munsturkaflana í græna hlutanum. Hefði ekki viljað vera án þeirra.

Furugerði er BFL Nylon Sock og Bjart yfir jólum Merino Fingering.

Jólaprjónataska

Það er ótrúlegt, en satt, að ég hef ekki átt neina jólaprjónatösku. Samt er jólaprjónið fastur liður í tilverunni.

Til að bjarga þessu saumaði ég þessa jólalegu tösku, og notaði til þess tvö munstur sem eru í nýju Husqvarna Sapphire 85 útsaumsvélinni minni. Efnin eru öll gömul úr lagernum mínum.

Hér sést fóðrið, sem ég stakk með vatti. Í töskunni núna er sjal, sem ég er að prjóna, og heitir uppskriftin einmitt Adventsjal, eða Aðventusjal, og er ljósari liturinn meira að segja jólaliturinn frá Kristínu í Vatnsnesi frá í fyrra! Greinilegt jólaþema í gangi hjá mér, en varð bara svona óvart.

Hér er dásamlega útsaumsvélin mín að vinna fyrir mig. Sit yfirleitt yfir henni og fylgist með, því mér finnst það svo skemmtilegt.