Dúkkukjólar

Fyrir um ári síðan saumaði ég kjóla úr þessu efni á ömmustelpurnar þrjár. Sniðið heitir Jerseykjole med sving for barn og er einnig til í fullorðinsstærð. Það er meira að segja líka til í dúkkustærð.

Þegar ég sneið kjólana á stelpurnar passaði ég að sjálfsögðu að nýta efnið eins vel og ég gat. Og til að ekkert færi til spillis sneið ég eins mikið af dúkkufötum og hægt var úr smá bútum sem annars hefðu farið í ruslið. Svo geymdi ég þetta í marga mánuði og saumaði loksins í haust.

Ég fékk út úr þessu þrjá kjóla og einn skokk (sem ég er ekki búin að sauma) og nokkrar nærbuxur á dúkkurnar. Ef vel er að gáð liggur út og suður í þráðréttunni hjá mér, aðalatriði var að ná sem mestu út úr efninu. Kjóllinn er sem sagt úr dúkkusniðapakka frá Ida Victoria, sem ætlaður er fyrir Baby born, en í þessu tilfelli passaði hann vel á OG dúkkurnar. Nærbuxurnar eru úr sama pakka, og líka frá Kreativistine.

 

Dúkkukjólar

Einhvern tíma í sumar prjónaði ég þessa kjóla á dúkkurnar. Ég var ekki með sérstakar uppskriftir af þeim, heldur notaði ég uppskriftirnar af dúkkupeysum og kjól sem ég skrifaði um í þessari færslu, sem grunn til að miða við. Þar fæ ég lykkjufjöldann og skiptingu í ermar og bol, þar sem byrjað er að prjóna ofan frá. Svo er bara að hafa stuttar eða langar ermar, útvítt eða beint o.s.frv. Mjög auðvelt að spinna þetta upp jafnóðum. 

Allir kjólarnir eru hnepptir að aftan.

 

Dúkkuföt

Ég hef nóg að gera við dúkkufatagerð. Hér eru það sumardress á dömurnar. Þær þurfa jú að eiga eitthvað til skiptanna.

Sniðið af þessum bolum fann ég frítt á netinu frá Liberty Jane Clothing. Koma í tveimur stærðum, 14” og 18”. Þeir eru alveg opnir að aftan og lokað með fínum riflás. Myndirnar framan á þeim skar ég sjálf út úr HTV vinyl í skurðarvélinni minni.

 Stuttbuxurnar gerði ég eftir sniði frá Kreativistine. Þær eru síðar á sniðinu en ég hafði þær bara stuttar.

Meira af dúkkufötum

Ég held áfram að auka aðeins fataeign dúkknanna á meðan ömmustelpurnar hafa gaman af því að leika sér með þær. Leikurinn gengur mikið út á að klæða þær upp á fyrir alls konar tilefni. Þær eru ýmist að fara í partý, ferðalög eða annað.

Mér var bent á að þær ættu ekki almennileg sumarföt og ég var beðin um að redda því áður en þær kæmu næst. Svo opnuðu þær skúffu með efnum frá mér og völdu efni í hvelli áður en þær fóru heim. Sniðið fann ég frítt á netinu, það er frá Bankky/Craftymom. Sniðið er af stuttbuxum en kemur meira út eins og buxnapils á stærri dúkkunum, en passar betur á þá minni, en stelpurnar voru sáttar.

Svo var ég búin að prjóna þessar peysur, kannski ekki mjög sumarlegar, en það verður að hafa það. Þær eru bara prjónaðar af fingrum fram, byrja efst á þeim öllum og svo getur maður bara gert alls konar útgáfur, stuttar eða síðar ermar, mismunandi kraga, hneppt að framan eða aftan, stroff eða garðaprjón og líka kjóla. 

 

Fleiri dúkkuföt

Þessar dúkkur geta alltaf bætt við sig fötum. Mér finnst líka gaman að taka smá rispur í dúkkufatagerð, enda þurfa ömmustelpurnar að hafa úr einhverju að velja. Þessar tvær stærri eru 18” dúkkur og sú minni 14” að stærð. Ég nota tommumálin frekar því þá finn ég miklu meira úrval þegar ég leita að sniðum og uppskriftum.

Buxnasniðið á þessa litlu bjó ég nú eiginlega til sjálf, var með einhvern grunn sem passaði engan veginn þannig að ég breytti og minnkaði þangað til þetta varð sæmilegt.

Peysurnar á stærri dúkkurnar eru eftir fríum uppskriftum á Ravelry, og þá bleiku reyndi ég að hafa í stíl við hinar en þurfti að gera tvær tilraunir til að láta hana passa. Þá gulu gerði ég svo bara eftir sama grunni.

Sniðin af buxunum á stærri dúkkurnar eru hins vegar úr sniðapakka fyrir 18” dúkkur frá Kreativistine í Noregi. Hún gerir snið á fullorðna og börn, og hefur gert dúkkufatasnið í stíl við barnafatasniðin.

 

Dúkkufataprjón

Það er alltaf gaman að grípa í dúkkufataprjón. Ég sá þessa lambhúshettu á handavinnusíðu vinkonu minnar og fékk uppskriftina frá henni. Byrjaði á þessari rauðu, en hún varð bara sú fyrsta af mörgum.

Fínt að grynnka aðeins á afgöngunum sem alltaf safnast upp. Krakkarnir urðu strax hrifnir af þeim og fengu þær allar með sér heim, ein náðist ekki einu sinni á mynd.

Uppskriftin er fyrir Baby Born, en þær fóru nú samt á alls konar bangsahausa. Kormákur þvottabjörn var  mjög flottur með sína þegar hann fór heim.

Svo fengu fleiri dúkkur föt….uppskriftirnar að þessum dressum fékk ég á Ravelry með því að leita að uppskriftum á 14” og 18” dúkkur, fullt af fríum uppskriftum þar. Peysurnar eru prjónaðar eftir sömu uppskrift, önnur er með smellum að aftan, hin hneppt að framan.

Prjónastærðin var 2,5, reyndar gefið upp fyrir 2,25, en ég á þá ekki sem kemur ekki að sök því ég prjóna frekar fast.

 

Dúkkuföt

Einhvern tíma í haust fór ég í tiltektir og fann í prjónapoka nokkrar ókláraðar prjónaflíkur á dúkkur. Ég dreif mig í að klára þær því ég þoli ekki að eiga hálfkláraða handavinnu hingað og þangað. Þetta voru sem sagt flíkurnar á myndinni hér að ofan. Ég bætti reyndar við tveimur nærbolum eins og þessum bleika.

Og fyrst ég var komin i dúkkufataprjón þá hélt ég áfram og prjónaði þrjár peysur, allar úr mismunandi garnafgöngum, og pils.

Flíkurnar efst í vinstra horninu á myndinni hér að ofan eru úr Klompelompe bókum, en peysurnar og nærbolirnir eru úr Sy&strikk dukkeklær eftir Anne Grethe Gaaserud.
 

Dúkkubleyjur

Hér var kvartað yfir því að engar dúkkubleyjur fyrirfinndust á heimilinu. Það var alveg rétt, en ég saumaði samt dúkkubleyjur fyrir nokkrum árum handa ömmustelpunum og gaf þeim. Ég bætti úr þessu og skellti í nokkrar, sem passa á Baby Born. Sniðið er frá þessu bloggi. Í stað þess að nota riflás setti ég núna smellur. Riflásinn festist gjarnan við prjónafötin í fatakörfunni.

 

Bangsaföt

Ein ömmustelpan bað mig um að prjóna peysu á hana Sissý, uppáhalds bangsann sinn. Hann fékk því að verða eftir hjá ömmu til að hún gæti bjargað málunum. Stelpan skaffaði garnið sjálf, eitthvað sem hún hafði gert í frístund í skólanum og vildi rekja upp til að nota. Það dugði ekki í peysu svo ég notaði það í húfu og fann annað garn í peysu.

Þá kom félagi þessa bangsa og vildi líka fá peysu og húfu, enda eigendurnir systur. Amma dreif það af líka.

Svo stigu fram fleiri bangsar frá öðru heimili og báru sig illa vegna fataleysis, enda vetur að ganga í garð, svo prjónarnir tifuðu áfram.

Ég var nú bara orðin ansi góð í þessu fyrir rest. Anatómía svona hundabangsa er engu öðru lík, mjög breitt bak og örmjó bringa, en svakalega eru þeir krúttlegir í svona peysum. Öll fjögur fengu föt á a.m.k. einn bangsa í þessari umferð og allir ánægðir.

 

Saumað á Baby born

Mér finnst alltaf gaman að sauma dúkkuföt. Það eru alltaf not fyrir þau á þessu heimili og nóg til af efnivið. Ég á alls konar efnisafganga frá fatasaumi, sérstaklega jerseyefnum.

Þessi föt eru öll úr jerseyefnum, engar smellur eða riflásar, sniðin mjög einföld og fljótlegt að sauma þau. Sokkabuxurnar eru meira að segja eins að aftan og framan svo auðveldara sé fyrir börn að klæða dúkkurnar. Mér finnst samt fallegra að hækka buxur að aftan á Baby born og myndi gera það ef ég saumaði fleiri. Joggingbuxurnar hér að neðan voru líka eins að framan og aftan, en ég hækkaði þær upp að aftan. Betri þannig.

Sniðin keypti ég hjá Ida Victoria, fékk þau á PDF formi sem mér finnst allt í lagi þegar um svona litlar flíkur er að ræða, ekkert að líma, bara prenta út og klippa. Bolirnir hér að ofan eru allir saumaðir eftir sama sniði, bara mismunandi ermasídd og á einum er þeim alveg sleppt.

Í þessar nærbuxur er hægt að nota alveg ótrúlega litla búta. Í sníðapakkanum eru tvö snið, annað fyrir boxernærbuxur.

                             Nú geta dúkkurnar verið í nærbuxum í stíl við kjólana.

                         Hér þurfti ég að rifja upp hvernig maður setur smellur á flíkur. 

                                    Joggingbuxurnar og þetta pils hafa stroff í mittið.

Þennan nærbol saumaði ég í vor, en hann er ekki úr þessum sniðapakka heldur úr bókinni Sy og strikk dukkeklær eftir Anne Grethe Gaaserud. Ein ömmustelpan vildi strax fá að eiga hann.
 

Dúkkuföt

Mig langaði svo að sauma eitthvað um daginn svo ég stakk hendinni ofan í afklippukassann og valdi efni í þessa dúkkusamfestinga og saumaði. Sniðið er úr bókinni Sy og strikk dukkeklær eftir Anne Grethe Gaaserud. Ég notaði svo til eingöngu overlockvélina í verkefnið og lokaði að aftan með smellu.

Dúkkuhúfur

 Einhvern tíma í vor þegar ég hafði ekkert að prjóna greip ég poka með garnafgöngum og prjónaði húfur á allar dúkkurnar þrjár. Ég tók mynd af þeim þegar ömmustelpurnar voru búnar að stílísera þær aðeins og setja í föt sem pössuðu með litunum í húfunum, það tóku þær alveg upp hjá sjálfum sér.

Uppskriftin er úr litlu hefti sem heitir Dukkestrikk og er frá Klompelompe. Garnið er Sandnes merino og Drops merino extra fine.

Dúkkupeysa

Ég átti garn, akkúrat passlegt í þessa peysu fyrir Baby Born, og skellti í hana handa yngstu ömmustelpunni sem varð fimm ára í síðasta mánuði. Ég setti hana í pakkann ásamt fleiri afmælisgjöfum.

Fyrir mörgum árum prjónaði ég sömu uppskrift úr bláu garni og er sú peysa neðar á síðunni undir flokknum Dúkkuföt. Uppskriftin er eftir Målfrid Gausal og er ókeypis á síðunni hennar. 

Ég notaði Drops baby merino garn og prjóna nr, 2.5. Svo stytti ég ermarnar á þessari, byrjaði á ermakúpuli strax eftir síðustu útaukningu, og er varla að það dugi. En mér finnst dúkkan voða krúttleg í þessu.