Kisuteppi

 Fyrir nokkrum árum saumaði ég veggteppi til að hafa fyrir ofan eldhúsborðið. Var það fyrst og fremst gert til að skemmta barnabörnunum. Það hefur verið fastur liður að ákveða hvaða kokkur hver og einn ætlar að vera í hvert skipti.

Nú var alveg kominn tími til að breyta aðeins til og fann ég þessar myndir hjá Embroidery Library. Þær eru sjö talsins því upphaflega er gert ráð fyrir því að sauma þau í viskastykki ásamt nafni vikudagsins. Ég varð því að nota tvær myndir tvisvar og sneri þeim bara svo þær yrðu ekki alveg eins. Krakkarnir hafa ekki séð teppið tilbúið ennþá en sáu það í vinnslu og sendu frá sér eitt samhljóða og langdregið “noooooooo”, enda öll frá kattaheimilum.

Fljúgandi gæsir

Þetta teppi varð til alveg óvart. Ég hef stundum mikla þörf fyrir að sitja bara við saumavél og sauma. Þess vegna var ég byrjuð að sauma litlar blokkir af fljúgandi gæsum sem ég vissi ekkert hvað yrði úr.

 

Þær voru (auðvitað) saumaðar með pappírssaumi og sniðið kom úr EQ8 forritinu mínu.

Þá gerðist það sem gerist næstum aldrei að ég ráfaði inn á nytjamarkað og kíkti á handavinnublöðin, fann blað frá 2004 frá McCalls og keypti það ásamt einhverju fleiru. Í þessu blaði var mynd af teppinu fyrir ofan og frásögn af því hvernig það hafði verið samvinnuverkefni kvenna sem allar komu með nokkra búta.

Ég fór nú að skoða bútana mína og sá möguleikana, taldi hversu margar gæsablokkir væru í teppinu í blaðinu og þær reyndust vera 100. Það var því ekki um annað að ræða en að spýta í lófana, prenta út pappírssniðið og halda áfram að sauma. Svo teiknaði ég teppið í EQ8 og prentaði út vinnublað til að ruglast nú ekki við samsetninguna.

Eins og sjá má eru margir ljósir ferningar á milli gæsablokkanna. Ég fann efni sem ég keypti annað hvort á bílskúrssölu eða úr dánarbúi og var búið að klippa niður í stóra ferninga. Mér tókst að fá fjóra litla ferninga úr hverjum þessara stóru svo þeir nýttust vel. Að lokum hófst ég svo handa við að gera það sem ég hef ætlað lengi að prófa en það var að stinga að hluta í útsaumsvélinni, því mér fannst að það yrði að vera eitthvað fallegt í þessum blokkum. Þetta eru 40 ferningar, auk þess sem þríhyrningarnir á jöðrunum eru líka stungnir, stakk þá eins og þeir væru heilir en fór útfyrir á vattið og skar svo af. Þannig þurfti ég að setja teppið 60 sinnum á segulrammann og í vélina. Þetta gekk ótrúlega vel, ekkert klikkaði. Tók nokkra daga en varð líka léttara með æfingunni.

Efnin eru öll afklippur og afgangar sem hafa safnast upp og virðast aldrei klárast. Útsaumsmunstrið er frá Kreativ Kiwii. Svo tek ég fram að fyrst stakk ég meðfram öllum blokkunum á venjulegan hátt.

Teppi úr gömlum efnum

Ég á mikið af efnum og eru mörg þeirra áratuga gömul, og voru gamaldags á þeim tíma sem ég fékk þau.

Ég ákvað einhverntíma að halda þeim sér og sauma eitthvað úr þeim sérstaklega og mörg þóttu mér ekki falleg. En þegar þau eru svona saman hefur samsetningin ákveðið yfirbragð sem ég er sátt við.

Þetta munstur rakst ég á einhvers staðar á netinu og ákvað að nota það fyrir gamaldags efnin mín. Þetta eru 4 tommu ferningar, heilir og samsettir. Ég skar út með 4,5” og 2,5” stikum, mjög þægilegt að nota stikur í réttri stærð.

Bakið gerði ég líka úr sömu efnum til að minnka birgðirnar, samt er slatti eftir ennþá.

Merkið er á sínum stað, saumað í útsaumsvélinni eins og ég geri alltaf núorðið. Hafði það einfalt.

                         Una Lóa, yngsta ömmustelpan mín, aðstoðaði við myndatökuna í dag.

Sumarpúði

Þegar ég keypti Husqvarna útsaumsvélina mína fylgdu með henni tveir efnisbútar og undirlag til að setja í útsaumsramma og sauma. Mig langaði alltaf að nota þá í eitthvað fallegt.

Svo var það þessi mynd….mér fannst hún alveg sérlega falleg, og þegar ég fór að tína til tvinna í hana til að vita hvort ég ætti eitthvað af litunum og hvað ég þyrfti þá að kaupa í viðbót, þá kom í ljós að ég átti hér um bil öll réttu litanúmerin í hana og þurfti engu að bæta við.

 Annar búturinn varð þá að þessum sumarlega púða sem prýðir nú sófa á heimilinu. Hann átti fyrst að fara á hjónarúmið en passaði svo vel þar sem ég fleygði honum niður til að taka mynd að hann hefur legið þar síðan.  Ég notaði stærsta rammann sem fylgdi vélinni, 36x20 rammann. Munstrið er í vélinni minni.

Lítið afgangateppi

Ég á mjög erfitt með að henda litlum efnisafgöngum og hef verið dugleg að hreinsa þá upp með því að gera úr þeim afgangateppi. Nú var kominn tími til að taka til og þá varð til þetta litla teppi eða dúkur eða hvað sem á að kalla það, ekki nema 52 x 52 cm að stærð.

Hver blokk er aðeins tvær sinnum tvær tommur, og eins og sést saumuð með pappírssaumi. Ég setti skurðarhnífinn með á myndina til samanburðar.

Hér er bara hluti af afskurðinum sem ég notaði. Margir bútar voru miklu minni, og tókst mér að hreinsa vel til. Ég hætti að sauma þegar efnin voru á þrotum.

Merkið var að sjálfsögðu saumað í útsaumsvélinni, það fyrsta fyrir árið 2024. Munstrið fengið úr útsaumsforritinu.

Í teppinu eru 100 blokkir. Í hverri blokk eru 9 bútar þannig að alls eru þetta 900 bútar sem þurfti að sauma saman. Á milli setti ég Heat ‘n bond strauvatt, lét límið snúa að toppnum, og kom það mjög vel út þegar svona mikið er af saumum og saumförum. Teppið verður frekar þungt og liggur alveg marflatt. Kantinn sneið ég 1 og 1/4 tommu á breidd og saumaði hann því niður einfaldan, lærði það af Kathleen Tracy bútasaumshönnuði, sem hannar lítil teppi og finnst þetta oft passa betur á þau og er ég alveg sammála henni. Ég stakk í kringum hverja blokk og svo á ská eftir miðju blokkanna.

 

Haustlauf

Snemma í haust tók ég í þriðja sinn þátt í leyniverkefni hjá Kathleen Tracy, sem bæði heldur úti bloggsíðu og fb hóp, og er bútasaumshönnuður. Verkefnið hét Autumn Leaves. Einhverja fimm eða sex föstudaga fengum við fyrirmæli um hvað við ættum að gera næstu vikuna, en miðjan kom fyrst og svo bættist utan á teppið.

Ég gat auðvitað ekki hugsað mér annað en að sauma þetta með pappírssaum, auðvelt að teikna þessar blokkir í EQ8. Enda kom það í ljós að margar konur áttu í mestu erfiðleikum með ysta rammann, þar sem þarf að viðhafa mikla nákvæmni bæði við að klippa og sauma. Þetta var leikur einn með pappírssaum.

Ég hafði merkimiðann í haustlegum litum, og fann munstrin í forritinu mínu. Prófaði að sauma með sprengdum tvinna, kom vel út í svona smágerðum hlutum í munstrunum, ekki þar sem voru stærri fletir, prófaði það líka.

 Prentarinn stríddi mér aðeins þegar ég prentaði sniðin úr EQ8 forritinu. Þau voru ekki alveg í réttri stærð, aðeins of lítil. Komst ekki að því fyrr en ég var búin að sauma alla miðjubútana. Ég byrjaði þess vegna upp á nýtt þegar búið var að uppfæra prentarann, en notaði það sem ég hafði saumað í púða í stíl. Hvort tveggja prýðir nú forstofuna á heimilinu.

Hrekkjavaka 🎃👻🕸️

Ég geri mikið af því að skipta út bútasaum og fleiru eftir árstíðum. Ég er t.d. með vegg í þvottahúsinu sem breytir um ásýnd reglulega.

Nú bættist teppi í safnið til að minna á þennan skemmtilega tíma hrekkjavökunnar. Þótt ég taki ekki þátt í henni sem slíkri þá finnst mér gaman af handavinnunni sem hún býður upp á.

Ég tíndi til allt sem ég átti af efnum sem líktust appelsínugulu, en þann lit kaupi ég næstum aldrei, finnst hann almennt ekki fallegur og líður ekki vel með hann í kringum mig. En með því að hafa mikið svart með þá sleppur þetta í teppinu, er bara ánægð með það.

Svo átti ég meira að segja hárrétta tvinnann til að stinga með, hann hafði í sér alla réttu litina fyrir teppið.

 Blokkirnar í teppinu eru úr EQ8 bútasaumsforritinu, saumaðar með pappírssaum og eru 5,5 “ að stærð. Merkið gerði ég í útsaumsvélinni, og fylgdi munstrið gömlu Pfaff Creative 1.5 vélinni minni. Letrið er úr My Sewnet forritinu mínu.

Veggteppi

Á veggnum bak við borðið þar sem ég hef úsaumsvélina saumaði ég teppi sem var að hluta gert í þeirri vél. Nú er ég búin að taka af plássinu sem teppið hafði, teppið orðið of stórt og hefur fengið annan stað. Það er nefnilega þannig að þegar maður á útsaumsvél safnast að manni smátt og smátt töluverður tvinni. 

Útsaumstvinnakeflin eru frekar stór og finnst mér best að geyma þau í hillu. Ég keypti tvær smíðajárnshillur fyrir nokkrum árum á netinu, ætlaðar fyrir naglalakk. Þær taka samtals 60 kefli og eru fullar. Þá bætti ég við myndahillu úr Ikea, fyrst einni. Þær eru akkúrat nógu djúpar til að hægt sé að koma fyrir tveimur röðum af keflum í hillu. Svo bætti ég annarri við í vor og þá saumaði ég þetta litla teppi og lét það passa á vegginn. Blokkina fékk ég í EQ8 forritinu og saumaði með pappírssaumi. Eftir á sá ég að litapallettan í því passar við tvinnakeflin sem hanga allt í kringum það í þessu horni.

 Merkið komið á sinn stað, búið til í Spíralprógramminu í Platínum útsaumsforritinu,

Flónelteppi

Í haust sá ég auglýst bútasaumsefni sem voru til sölu úr dánarbúi og fór ég og keypti töluvert af efnum. Nokkru seinna var mér boðið að kaupa restina af lagernum og þótti mér mjög vænt um það. Í þeim pakka var mest af köflóttum efnum, sem ég á aldrei nóg af…..reyndar á ég nóg núna! 

Smá hluti þeirra var úr flóneli, og tók ég þau frá og ákvað að nota þau saman í teppi. Mér finnst þau ekki passa með öðrum efnum og átti mjög lítið af þeim fyrir. En frábært að eiga allt í einu nóg til að geta gert eitthvað úr þeim.

Til að auðvelda mér verkið keypti ég mér 4,5 “ stiku í Bóthildi, þannig að bútarnir voru 4” að stærð saumaðir. Alls urðu þetta 247 bútar og teppið varð 2 metrar á lengd og 140 cm breitt.

Merkið að sjálfsögðu komið á sinn stað. Bakefnið er bómullarlak úr Rúmfó. Kantinn saumaði ég alfarið á í saumavélinni. Svo stakk ég teppið í saumförin.

 Ég raðaði öllu teppinu upp á gólfinu áður en ég saumaði það til að dreifa litunum jafnt og passa að eins bútar lentu ekki hlið við hlið. Þá komu númeruðu títuprjónarnir sér vel sem ég fékk í jólagjöf fyrir nokkrum árum ásamt öðrum sniðugum bútasaumsgræjum.

Love Letters

Ég tók þátt í örlitlum leynisaum nú í febrúar í hóp á fb sem Kathleen Tracy stjórnar. Hún er flottur höfundur nokkurra bútasaumsbóka og hópurinn snýst um að sauma eftir hennar hönnun. Við fengum þrjár vísbendingar en vissum að þetta væri tengt Valentínusardeginum. Gerði þetta til að setja smá gleði í dagana í þessum febrúarlægðum sem hafa dunið yfir.

Teppið er ekki stórt, en litaþemað var rautt, gjarnan með bleiku ívafi. Rautt er uppáhalds liturinn minn í bútasaumi svo það hitti vel á. Blokkirnar eiga sem sagt að tákna opin umslög með ástarbréfum, Love Letters.   Svo merkti ég strax…notaði Spiro prógrammið í forritinu mínu. Höfundurinn stakk upp á því að hafa faldinn einfaldan, þ.e. að sníða 1 og 1/4 " ræmu og sauma hana einfalda á í stað þess að sníða 2 og 1/4 " ræmu og brjóta saman áður en hún er saumuð á eins og venjulega er gert. Þetta hefur mér aldrei dottið í hug áður en passar miklu betur þegar stykkið er lítið.

 

Bútasaumurinn merktur

Þegar ég tók niður jólabútasauminn núna í janúar greip ég tækifærið og merkti öll ómerkt teppi sem ég gekk frá, og hélt svo bara áfram með ýmis önnur teppi. T.d. hafði ég gleymt að merkja kokkateppið sem ég gerði fyrir ári síðan, skil nú reyndar ekkert í því. Ég tók bara minnstu útgáfuna af einni myndinni og minnkaði hana ennþá meira og bjó til merkimiða.

Í janúar fannst mér alveg kominn tími til að eignast flott útsaumsforrit og keypti My Sewnet Platinum forritið í Pfaff. Síðan er ég búin að skemmta mér vel við að skoða það, og sé að ég hef nóg að læra og prófa í útsaum. Hringlaga myndirnar eru allar úr Spiral fídusnum í því, endalausir möguleikar, og letrið tekið úr forritinu líka. Jólamyndirnar eru einnig þaðan, úr Super Design, en það passar svo vel í þessar merkingar því myndirnar eru svo litlar.

Það var hins vegar þrautin þyngri að finna út úr ártölunum á teppum sem ég saumaði áður en ég hóf þetta blogg árið 2009. Bloggið er handavinnudagbókin mín og þar get ég flett upp öllu mögulegu, en bútasaumurinn á sér sögu a.m.k. 15 ár lengra aftur í tímann. Ég lagðist í rannsóknarvinnu og notaði myndaalbúmin á heimilinu til að sjá hvort ég gæti lesið eitthvað út úr þeim, og niðurstaðan varð sú  að sumt var ég nokkuð örugg með en annað varð ég bara að tímasetja eftir tilfinningu. Ég kíkti til dæmis á útgáfuár einnar bókar sem ég sneið og saumaði eftir og sá að teppið var alla vega ekki eldra en hún. Svo hafði ég notað EQ forritið við sum teppin þannig að þar hafði ég viðmið, þó ég muni ekki alveg hvaða ár ég fékk það, en það var örugglega eftir að ég fékk fyrsta saumaherbergið mitt árið 2005. En þar með er þetta bara afgreitt.
 

Lítið teppi með kaleidoscope munstri

Mér finnst alltaf jafn nærandi að sauma afgangateppi, og vinna úr afgöngum almennt. Ég sá svona teppi einhvers staðar á netinu í vor og langaði að sauma svipað, sérstaklega af því að þessi blokk er ein af mínum uppáhalds. Svo litlu afgangarnir voru dregnir fram einu sinni enn, og hafist handa. Mörg þessara efna eru áratuga gömul svo það er eins og að ferðast aftur í tímann að skoða bútana.

Ég bjó blokkina til í EQ8 forritinu, fann einhvern veginn út úr því, og sneið svo alla 576 þríhyrningana eftir skapalóni úr pappa sem ég prentaði út, strikaði i kring með blýanti og klippti út með skærum. Þarna kláruðust sum efni alveg. Reglan er sú að skipta efnunum í ljós og dökk, og mega dökkar eða ljósar hliðar aldrei liggja saman. Þetta gekk upp og var skemmtilegt að gera. 

 Og merkið fór á sinn stað, saumað í útsaumsvélinni minni góðu.  Hver blokk er 23x23 cm og allt teppið ca. 92x92 cm.

Ungbarnateppi

Þessi teppi saumaði ég til að gefa í söfnun handa úkraínskum börnum sem dvelja hér vegna stríðsins.

Verslunin Pfaff á Grensásvegi sendi út beiðni og tók við þeim fyrir hönd hjálparsamtaka sem óskuðu eftir teppum í ýmsum stærðum fyrir börn, og var sérstaklega óskað eftir bútasaumsteppum. Þessi teppi eru rúmlega 80 x 100 cm. Merkimiðana aftan á þeim hafði ég viljandi í gulu og bláu fánalitunum.

Ég tók glöð þátt í þessu og veit að það gerðu fleiri því nú þegar hafa nokkrir tugir teppa verið afhentir, og verkefnið heldur áfram.

Teppin eru saumuð úr efnum frá Panduro, en það eru helstu efnin úr safninu mínu sem passa í teppi fyrir börn.