Etter å ha sett på tusenvis av fine stoffknappar rundt omkring på nettet, fekk eg lyst til å laga sjølv. Ein kjapp tur innom Etsy, Stoff og Stil og mamma sitt stofflager førte til dette:
Mine heilt eigne stoffknappar! Fantastisk morosamt putlearbeid, eg kunne ha site heile dagen. Og eg har framleis att mange tomme knappar og fleire meter med stoff, så snart vert nok knappelageret større enn garnlageret.
20 nye knappar er på plass i samlinga. 10 med søte kattepusar og 10 med knallstilige soppar – igjen frå favorittknappepusharen.
Dessutan har ho masse herleg stoff også. Denne biten hadde eg eigentleg tenkt å laga knappar av sjølve, men det er så herleg fint at eg har ikkje lyst til å klyppa i det. Eg trur det får liggja ei stund til eg finn noko eg kan sy av det. Kanskje eit putetrekk eller to?
Lageret veks og veks og veks, men ein treng jo litt utval når ein har så mange prosjekt på planleggjaren. Tida til å gjennomføre alle pratar me ikkje om ;-)