Pausestrikk

Medan eg ventar på at strikke- og bloggelysta skal komma tilbake, har eg strikka litt sokkar. Det er enkel strikking som ikkje krev så mykje konsentrasjon eller innsats - altså det perfekte innimellomspøt. Gåvekassa treng alltid påfyll av sokkar også.

Frå februar og ut april vart desse para strikka. 11 par, men fem er allereie gitt vekk i bursdagsgåver.

Garna eg har brukt er Viking alpaca sport (grusomt!), Perfect (fekk tømt lageret for den sorten), Sterk, Regia 6-tråds (fantastisk godt!), Hot socks cuba og Järbo mellanraggi.

Den siste tida har eg strikka ferdig to nye par + tre enkle sokkar som manglar make. Planen for sommaren er at eg skal verta ferdig med julegåvesokkane. Etter ein rask oppteljing i gåvekassa har eg snart 12 ferdige par, så eg er på god veg.

Pausefisk: mikrolån

Bloggen har teke laaang sommarferie, men eg må berre kjapt innom for å skriva om den fantastiske nettsida eg kom over i dag – Kiva. Her kan du låna ut 25 dollar til folk som av ulike grunnar treng pengar, for eksempel til å driva landbruk, starta ei bedrift eller ta utdanning. Akkurat no deler Kiva ut gratis prøvelån (finansiert av ein sponsor), så du treng ikkje betala noko sjølv for å prøva opplegget.

Mitt gratislån gjekk til ein senegalsk bonde med det sjarmerande namnet Hyacinthe. Han har ein stor plantasje der han dyrkar mango, appelsiner og cashewnøtter. No treng han eit lån, så han kan starta med vannmelonar også.

Viss du klikkar deg inn på sida via min link, http://www.kiva.org/invitedby/ninni5652, så får eg eit gratislån også. Og det er jo fint, for då er det endå ein person som kan få hjelp.

Miks og triks

I år hadde eg store planar om å strikka eit skikkeleg fint blondesjal i bursdagsgåve til mamma. Eg fann oppskrift på eit som ikkje såg så altfor vanskeleg ut, men likevel var det litt meir elegant ein eit vanleg rillesjal, som ho har fått før.

Hovuddelen med 1 rett, 1 rett, 1 rett gjekk radig unna. På tredje omgang av holstrikkmønsteret oppdaga eg at eg hadde laga eit kast for mykje på første omgang, så mønsteret gjekk ikkje opp. Med fleire hundre masker på pinnane forsvann all piffen. Eg hatar å rekkja opp, så eg bestemte meg for å gjera det beste ut av situasjonen. Redninga vart ein enkel blondekant, av typen som er på det populære Camomillesjalet.

Endemaskane på kanten og på sjalet strikka eg saman, så eg slapp både avfelling og samansying. Eg hugsar ikkje heilt kvar eg fann oppskrifta, men eg trur eg googla strikket blondekant eller noko liknande.

Sjalet vart stort, så det varmar godt nedover ryggen. Etter blokking vart det ubeskriveleg lett og luftig, nesten som ei stor fjør. Garnet er Shetland soft, i fargen rips. Eg tykkjer ikkje fargen er så veldig ripsete av seg, meir vinraud/plommeraud/stikkelsbærraud. På bileta vart fargen altfor rosalilla, men raudt+kamera har eg dårleg erfaring med.

Bustehunden stilte opp som modell, men det var litt meir motvillig denne gongen.

Strikking på Instagram

Instagram har visst teke meir og meir over for bloggen. Det er så lettvint å ta eit bilete med mobilen og smella det ut på Instagram med det same. Så for dei som ikkje har konto der, tenkte eg å visa fram dei siste strikkebileta mine her også.

1. Eg held framleis på med mariusen til vetlesøster. Som skreve før var planen å få han ferdig til påske. Påskeafta etter stengetid gjekk eg sjølvsagt tomt for blått garn, eit par mønsterborder frå den raude halsen. No ligg han på vent fram til garnbutikken opnar att.

2. Eg har funne fram alle klovnespyrestane mine. Dei skal verta til fargerike sokkar til gåvekassa.

3. For bursdagspengane mine kjøpte eg meg nøstemaskin. Det er definitivt eit av dei beste kjøpa eg har gjort! Makan til effektivt hjelpemiddel har eg aldri sett før.

4. Camomilleinspirert sjal til mamma, her under blokking. Sjalet er ferdigblokka, levert og brukt, men det var den blogginga, då.

1 million striper

Endå ein UFO er ferdig! Denne gongen er det ein stripehals som eg starta på i august i fjor. Eg blogga om starten her. Som så mange gonger før gjekk eg lei omtrent halvveges og la strikketøyet vekk.

Men i januar hadde eg altså opprydding i UFO-korgene og då fekk eg han endeleg ferdig. Snille mamma festa trådar og sydde saman, så no manglar han berre eit milobad. Til helga, kanskje.

Oppskrifta eg har brukt er A million stripes loop (Ravelry). Garnet er ein blanding av New Zealand lammeull frå 123knit og Shetland soft frå Malsen og mor. Eg plukka fram ulike blå- og gråtonar, sidan det var det eg hadde mest av. Eg veit ikkje kor mykje det gjekk med av kvar farge, men store garnsluket var det ikkje. Enkel tråd på pinne nummer 3. Resultatet er lett, luftig og veldig varmt.

Onkel sin søte hund stilte villig opp som modell.

På pinnane

Januar var ein veldig produktiv månad, men i februar har eg ikkje fått strikka så veldig mykje. Men litt har det no vorte, sjølv om ingenting er ferdig.

Sokkar til gåvekassa. Kassa er tom no etter jul og med bursdagshøgsesong i familien det neste halve året, må eg fylla på. Garnet er Regia 6-tråds. Eit veldig godt garn å strikka med, men eg gløymer stadig vekk at eg eigentleg tykkjer klovnespygarn er grusomt stygt. Derfor held eg på med eit evig slankeprosjekt av spraglegarnlageret mitt.

Rillestrikka tovavottar. Besta fekk eit par med lilla til jul og andre juledag ringde onkel og lurte på om eg kunne strikka eit par til han også. Han hadde prøvd besta sine og det var dei beste vottane han hadde hatt på seg i sitt liv. Slikt varmar eit strikkehjarte, så sjølvsagt la eg opp til vottar. Han sa at det ikkje hasta med å få dei ferdig, men no er jo vottesesongen snart over, så eg bør få pinnane i gir.

Mariusgensar til vetlesøster. Ho har ønskt seg marius i fleire år, så eg fann ut at no måtte ho få ein. Garn og lovnad om ferdig gensar vart julegåva hennar i fjor. Strikkinga gjekk radig fram til eg skulle til på mønsteret. Då måtte eg mota meg opp i eit par veker. Då eg var klar og begynte, gjekk mønsteret unna også, men så mista eg ned ti masker og saman med dei forsvann piffen heilt. No trur eg søster tykkjer at ting tek tid her, så planen er å få gensaren ferdig til påske.

Rillestrikka lappar til tepper. På bloggen til Bea såg eg at ho strikka lappar til Ull&Omtanke. Eg tykte dette såg ut som eit knakande flott prosjekt og heiv meg med. Så enkle og små lappar er jo strikka på 10 minutt, så dette er noko alle kan klara. Eg har funne fram posen med restegarn og strikkar ein lapp no og då. Planen er å strikka lappar fram til påske og så senda haugen avgårde då.

Dette var dei prosjekta som er på pinnane akkurat no. Haugen med UFOar som ligg i skapet og skrik er eit anna kapittel.

Meir smått

Eg fekk to nøster med det mjukaste garnet til bursdagen min. Garnet var tiltenkt premturstrikk, så eg kasta meg rundt og la opp same helga. Saman med to nøster frå lageret og eitt frå garnbutikken vart det til to små tepper.

Oppskrifta er den same som sist – tre masker, auk kvar omgang til A3-størrelse, fell kvar omgang til tre masker. Denne gongen hekla eg ein bølgekant rundt med kontrastfarge, noko eg er veldig fornøgd med! Teppa vart med eitt litt finare og stødigare. Det gjekk med to nøster Drops merino extra fine til kvart teppe + eitt nøste av kontrastfargen totalt.

Ting tek tid

For nokre veker sidan vart eg ferdig med ein skikkeleg seig UFO. Prosjektet starta eg på i mars 2010, så det hadde snart hatt tre-årsdag, gitt. Planen den gongen var at mamma skulle få det i forseinka bursdagsgåve, men slik gjekk det altså ikkje. Heldigvis trur eg at ho hadde gløymt heile sjalet.

Men no er det endeleg ferdig!

 

Garnet eg har brukt er Symre frå Telespinn. Det er eit totrådsgarn med 20 % lammeull og 80 % mohair frå geit. Garnet er mjukt og godt, men det var litt glatt å strikka med på metallpinnar. Eg trur nok det hadde vore betre med trepinnar. Oppstrikka vart det uansett fantastisk mjukt og varmt, så det var så absolutt verdt litt masker på rømmen innimellom. Dessutan er det veldig kjekt med ekte, norsk garn frå dyr som garantert har det bra. Eg har to hesper med Mari frå same produsent som berre ventar på Det Perfekte Prosjektet.

Sidan eg ikkje visste kor langt eg kom med 200 gram, så valde eg å strikka eit heilt enkelt rillestrikka sjal som det ikkje hadde vore krise å rekkja opp att dersom det vart for lite. Mønsteret eg har brukt er opprekkssjal frå Strikk til nøstebarn. Ei grei oppskrift som alle kan få til.

Januar var den store UFOfullføringsmånaden, så det kjem nok fleire ferdige prosjekt i næraste framtid!

Så altfor smått

Å tenkja på at nokon kan bruka noko så knøttsmått gjer vondt heilt ned i tærne. Men samstundes er det godt å kunna bruka hobbyen min til noko veldig nyttig og flott.

Huer som passar på ei middels stor appelsin er smått. Det same med tepper på størrelse med eit A3-ark.

Meininga var eigentleg å senda huene og teppene til Innfall og påfunn si innsamling til prematuravdelinga ved HUS i anledning den internasjonale prematurdagen, men i kjent stil vart eg ikkje ferdig i tide. Det er mange innsamlingar av prematurstrikk til sjukehus rundt i heile landet, mellom anna gjennom Amandaprosjektet, som du kan lesa meir om her. Det eg har strikka no går til sentrasjukehuset i heimfylket mitt, men neste gong vert det kanskje til eit anna sjukehus. For det vert definitivt meir prematurstrikk. Noko meir takknemleg å strikka skal ein leita lenge etter.

Oppskriftene på huene har eg funne på strikkeforumet. Teppene er enkle rillestrikka tepper. Eg la opp tre masker, aukte innanfor den første kantmaska på kvar pinne til teppet målte A3-størrelse, så felte eg tilsvarande til eg hadde att tre masker. Dersom du treng oppskrift på huer og sokkar, er det berre til å googla prematurstrikk, så finn du mange gode.

Eg har brukt babyull, som er blant dei anbefalte garnsortane. Plagga må vera mjuke og kløfrie, sidan dei små er sensitive. Det er ikkje så mange gramma som skal til. Eg fekk tre og ei halv hue av eitt nøste, så det er berre til å setja i gang viss du har eit nøste og litt tid. Det er garantert nokon som vert veldig glade og takknemlege.

Planar for strikkeåret 2013

Som det system- og ordensmennesket eg er, så høyrer omstendig planlegging av strikkinga mi til på starten av året.

Alongar:

I år har eg kun meldt meg på to små plagg-alongar: hue- og sokkealongen på Uformelt. Dei er nemleg så uformelle at ein treng ikkje å vera med kvar månad, ein strikkar dei mønstera ein har lyst til. Noko som passar meg perfekt, sidan eg elles fell av i februar. Sokkar har eg alltid bruk for til gåvekassa, og huer er kjekt sidan eg ikkje må strikka to like.

I tillegg har eg meldt meg på to store alongar, DUGG og DUFA, også på Uformelt. Kort fortalt går DUGG ut på å halda oversikt over garn som går inn og ut, og målet er sjølvsagt å bruka meir enn ein kjøper. Lagerreduksjon. DUFA har som mål at ein skal fullføra dei prosjekta ein har begynt på, altså UFOane.

DUGG var eg med på i 2011 også, men då datt eg av etter eit par månadar. Delvis på grunn av at eg hadde gått på så store smellar i starten av året at eg mista motivasjonen og delvis fordi rekneskapsføringa vart for innvikla for meg. I forfjor hadde eg bestemt meg for å ikkje kjøpa garn i det heile teke. Klok av skade har eg funne ut at den taktikken verkar stikk motsett for meg. Så i år har eg moderert meg litt og bestemt at eg skal få lov til å kjøpa garn, men det må vera til konkrete og planlagde prosjekt som også skal strikkast innan rimeleg tid etter garnkjøpet. På den måten trur eg at eg vil tenkja meir over kva eg kjøper og om eg verkeleg treng det garnet som skrik til meg frå tilbodskorga på garnbutikken. Kva skal ein med ti nøster kjøpt på sal om dei uansett vert liggjande i skapet? Eg har også sett meg meir inn i rekneskapsføringa, laga meg rekneark i EXCEL og funne ut at det kan vera kjekt å sjå kor mykje eg faktisk strikkar i antal kilo, så eg trur det skal gå betre i år.

DUFA har eg også vore med på eit par gonger før, men då har det vore litt halvhjerta innsats. Nytt av året er at alongen går over eit heilt år (i motsetnad til eit par månadar tidlegare år), og det er også innført eit poengsystem. Ein får eitt poeng for kvart fullførte prosjekt, ekstrapoeng alt etter kor gammal UFOen er og minuspoeng dersom ein startar på eit nytt prosjekt og ikkje fullfører det i løpet av same månad. Eg ELSKAR poeng, så dette trur eg skal gå bra. Dessutan fekk eg meg eit sjokk utan sidestykkje då eg rydda i strikkekorgene for å finna UFOar eg kunne melda på. Eg grov fram prosjekt etter prosjekt og mange av dei hadde eg faktisk gløymt at eg hadde begynt på. Då eg var ferdig hadde eg 28 (!!) UFOar på lista mi, og det er berre dei som ligg heime hjå opphavet. Sikkert 20 til ligg i Bergen og ventar på å verta registert. Det sjokket og skammen, faktisk, over kor mange UFOar eg har, trur eg skal vera til god hjelp til å få fullført minst halvparten av prosjekta i løpet av året. Og også til å ikkje leggja opp til så mange nye prosjekt før eg er ferdig med noko anna. Eg vart rett og slett flau over alt eg har liggjande. Grøss.

DUFA har faktisk ført til at eg allereie, seks dagar inn i det nye året, har fullført fem UFOar og rekt opp endå fleire! Det kjennast litt vel strikkenerdete ut å skriva det, men den gode følelsen og samvittigheiten det har gitt, får meg til å få endå meir lyst til å gjera ferdig alle UFOane mine. 

Har du planar for strikkeåret ditt, eller tek du det som det kjem?

Fortsettelse følgjer.

Årskavalkade

Det vart ikkje blogga så mykje i fjor, for lysta var ikkje heilt på topp. Likevel strikka eg ganske mykje. Problemet er at eg har vore usannsynleg dårleg til å ta bilete, så det er berre ein brøkdel av alt som er dokumentert og registert på Ravelry. I tillegg har eg starta på veldig mange nye prosjekt i 2012 som eg ikkje har gjort ferdig og såleis ikkje har bilete av.

Men noko har eg å visa fram:

Det eg er aller mest fornøgd med av alt eg laga i fjor, er definitivt hekleteppet eg endeleg fekk ferdig. Det var ein skikkeleg seig årgangsUFO. Elles går det stort sett i det same som tidlegare år – sokkar, barneklede, vottar, sjal og kjøkenklutar. Nytt av fjoråret er faktisk vaksengensarar (som eg rett nok måtte rekkja opp), men det vert så absolutt fleire i 2013.

Eg har også store planar om å føra betre oversikt over alt eg strikkar, slik at eg kan laga ein like fancy årskavalkade som Monstermønster.

Julegåver 2012

I fjor som alle år tidlegare hadde eg store planar for dei strikka julegåvene, men tradisjonen tru gjekk det rett vest jula 2012 også. Tidsskjemaet sprakk og eg rakk berre halvparten. I år, derimot, har eg bestemt meg for å strikka ferdig alle julegåvene før november. Tradisjonen tru. ;-)

(Instagrambilete av julegåveplanlegginga 2012)

Uansett vart det litt mjuke pakkar under juletreet.

Lilla sjal og tova vottar til besta. Sjaloppskrifta er Shaelyn, ei veldig enkel og godt forklart oppskrift. Dette er strikka i Hifa 2, på pinne nummer 4. Eg strikka to slike sjal til, men dei gløymde eg å ta bilete av før eg pakka dei inn. Eitt kvitt i Drops babymerino og eitt beige i Jo Sharp silkroad DK tweed.

Vottane er rillestrikka vottar frå Strikk til nøstebarn. Desse strikkar du på eit par kveldar, sidan det er dobbel tråd og rillestrikk. Passformen er også heilt super! Eg tova vottane litt i vaskemaskina for å få dei tettare og varmare.

Eg hekla også tøflar til ei venninne. Oppskrifta er Babushka ballerinatøfler frå M.I.L.C.H. SCHAUM. Nok ei super oppskrift som var veldig enkel å følgja, sjølv for ein som ikkje har hekla så mykje.

I tillegg strikka eg to par med tova vottar til, eitt par med ribbevottar og ni par med sokkar. Nokre av sokkane har eg vist fram før her, men resten av para gløymde eg også å ta bilete av før eg pakka dei inn.