Å kunne krysse av på oppgåvelista

Eg veit ikkje om du har ei slik liste der du skriv ned ting du skal huske, men det har eg.

Den er litt sånn

• ring tannlegen
• ta med metallsøppel
• vask i hylla på kjøkkenet

Akkurat no står det også litt om kva eg må huske før helga og før eg får besøk ein kveld neste veke, altså

• bake kjeks
• sende invitasjon
• kjøpe inn til besøk
• +++

Så idag, på sjølvaste fridagen, har eg prøvd å gjere unna litt, i tillegg til det som sto i kalenderen.

Eg starta dagen hos tannlegen, for eg hadde huska å ringe og endre tidspunkt for timen. Det vart litt stress, for eg er ikkje vant med å kjøre bil til sentrum på morgonen, og sjølv om eg hadde lagt inn det eg trudde var god tid, så måtte eg ringe og seie eg vart 5 minutt for sein. For i Trondheim har dei akkurat lagt om bussruter og bussystem og kjøremønster, og der var det ikkje berre eg som hadde problem! Itillegg er Toppidrettsveka i Trondheim i morgon, og nesten alle parkeringsplassar i sentrum var sperra... Men eg rakk det og det var "Null hull"! 

Etterpå var eg hos fysioterapeuten for vedlikehaldsbehandling. Vi diskuterte, igjen, om vi skulle prøve den øvelsen som måtte kuttast i fjor, men heldigvis tok fysioterapeuten til fornuft og sa at den truleg ikkje er noko for min rygg. Puh, for den er så vond, både der og då og etterpå. Det er ikkje alltid "vondt skal vondt fordrive" er sant!

Vel heime, gjekk eg laus på dei konkrete rydde- og vaskepunkta på lista mi. Det går så sakte! For når eg startar med å tørke støv, samlar det seg opp med ting som ikkje står der dei skulle stått. Så då må dei sorterast og settast på plass, eller eg må finne ein plass. Og medan eg driv med det, så er eg kanskje innom kjellaren og finn klær som skal vaskast, noko anna som skal kastast og noko som står på feil plass der også. Og når eg kjem tilbake på stova der eg heldt på, er det framleis rotete og støvkluten ligg midt oppi alt. Så då må eg fortsette, og plutseleg eg finn ein ny ting som ikkje står der den skal osv. Kanskje står det ein blomstervase med visna blomster, den må vaskast og så skal eg skifte duk og vips er eg på vaskerommet og der er det ting som skal gjerast. Men til slutt vart det ganske greit! 

Akkurat no støvfri vinduskarm!

Iallfall vart det greit nok til at eg gjekk frå alt og fekk ein fin tur i skogen! Varmt, sol og shortsvær, og nesten ikkje folk! 

Lista har vorte kortare, før eg noterer ned meir, og eg kan klappe meg sjølv fornøgd på skuldra!

No står det berre att å finne antrekk til i kveld, då skal eg i 60årsdag! 

Måndagsliste

Måndag. Pang, så er veka igang etter ei veldig aktiv helg. Livet er som skapt for listeskriving!

Har

• vore på jobb, på møte og skrive lister fordi det er siste veke før ferien, og kva må eg huske, og kva må nokon andre gjere +++
• vore hos fysioterapeuten, siste gong før ferien. Vorte strekt, brekt og tøyd, dog ikkje den aller verste strekkinga, den innser sjølv fysioterapeuten ikkje er av det gode verken undervegs eller etterpå.
• flytta båten frå fastplassen til servicemannen, som skal sjå over motor og skifte olje og filter og slikt (som om eg eigentleg veit kva han skal) Å flytte båt, ein dag det bles litt kraftig, når ein må vente på at brua over kanalen skal opne og ein må sloss mot straum i kanalen, og så legge til ved ein båt som ligg der... "Det er berre å legge til på utsida av den 32 fots motorbåten, sørg for å fendre godt" sa servicemannen, og då høres så enkelt ut. Men ta med vind og straum og uvant farvatn for admiralen (les fokkeslaskinnen), så snakkar du både humørdrepar og utfordring for parforhaldet! 
• ete middag som junior laga, då han var i ferd med å svime av av matmangel og aggresjon, god vart den! 
• ete norske, søte jordbær rett frå korga. Nam!

Burde

• betale rekningar
• brette klær
• vere kreativ og tenke ut gåve til jubilanten vi skal feire til helga (ja, vi feirar i vilden sky for tida. Dette blir selskap 3 på 3 helger! Men så tek vi ei pause, ei heil helg!)
• tømme kofferten frå tur i helga, Det er av dei ting som tek ca 4 gonger så lang tid å grue seg for å gjere, som den reelle tidsbruken...

Må

• betale rekningar
• huske å henge opp klær og tømme tørketrommelen
• tømme oppvaskmaskina
• legge meg tidleg, for det vart litt lite søvn i helga.

Vil helst

• fortsette og lese i boka eg byrja på igår!
• gå og sjå korleis det går med jordbærplantene mine. Det er små jordbær der, blir det snart litt sol igjen slik at dei blir raude?!
• sove middag, men det er for seint når klokka har bikka 20...

Morgon-liste

Eg fann desse morgon-spørsmåla på bloggen  Petrusogpetrine.no og tenkte at dette har eg lyst å svare på. (spørsmåla er direkte kopierte, så dei er på bokmål, men eg svarer på nynorsk) 

Når står du opp om morgenen?
Eg prøvar komme meg opp kl 6.45, men det hender eg brukar snooze-funksjonen på vekkerklokka..fleire gonger. Det er så mykje enklare å sove lenger om morgonen enn å få lagt seg på kvelden! Men eg kjem meg opp ganske kjapt, for eg bør vere ute av døra ca 7.30. Det går kjappare om morgonen no når eg berre har meg sjølv å tenkje på.

Hva er det første du gjør hver morgen?
Eg snur meg og funderer på kva dag det er! Er det kvardag, er det berre å kome seg opp og på badet. Og etterpå tek eg inn avisene, alle dagar treng ei avis i papirform.

Hvor lang tid bruker du på badet hver morgen?

10-15 minutt, inkludert dusj. Eg treng dusj for å vakne, så treng eg bodylotion og etterpå noko i håret for å temme krøllane mine. Men sminke lever eg godt utan!

Er frokosten viktig for deg?

Ja! Og helst ein kopp te. Kanskje P2 og iallfall aviser. Men det viktigaste er mat, enten brød med pålegg, yoghurt med havregryn eller havregraut. Men eg MÅ ha frukost.

Er du våken eller trøtt om morgenen?

B-menneske i heile meg. Men ikkje så mykje som før, kan det vere alderen? Eg ligg ikkje så lenge i helgene lenger, når eg vaknar kl 8 er natta over, sjøl om det er helg...

Hvordan er en perfekt morgen?

Vakne av meg sjøl, det er sol ute, eg kan berre ta på ein sommarkjole og gå ut på terrassen med ein kopp te og påsmurt mat, lese aviser. Ikkje noko eg må rekke! Kanskje er ungane heime på besøk, då er  det ekstra godt med god tid, gjerne nystekte rundstykker og pratetid!

Er det noe du ikke klarer deg uten hver morgen?

Tja, kanskje eg må vere så i-landsmenneske at eg seier dusjen?

Er det noe du ikke liker med morgenen?

Morgonar kjem altfor fort, og ofte med korte tidsfrister... Det har jo ingen ting med at eg er treig å gjere!

Korleis er morgonen din? Det hadde vore artig  om du svara på det i kommentarfeltet, eller i eit innlegg på din blogg og at du la linken i kommentarfeltet.

22.desember, kva har eg brukt dagane til?

Idag er det 22.desember, og første juleferiedag. Eg vakna i mørket, sto opp, slo på lyset i stjerna og og fyra opp. Ute hadde det snødd i natt, så etter dei siste dagane med is og regn og varmegradar, hadde forsvunne under eit (tynt) kvitt lag. Eg laga ei kanne te og skar ei skive av julebrødet eg bakte i går. Høyres det ut som ein klisje? Det kan høyrest slik ut, men det er heilt sant! 

Frukost

(Og peparkakebakarane som forsvann ut av huset ei stund etter at avisbodet hadde levert avisene i dag tidleg, hadde både rydda og vaska etter seg, stort sett)

I november, då det verka uengeleg lenge til jul(kanskje ikkje så lenge som då eg var 8 år, då var det omtrent like lenge frå 1.desember til julaften som frå jul til sommarferie) skreiv eg fleire lister med kva eg skulle gjere i desember, og har eg klart å følgje mine eigne planer? (altså, eg har jo varma fiskekeker til middag, vaska klær, vore på jobb og slikt, men i tillegg) Ikkje huskar eg kva eg skreiv heller...men no skal eg sjå det punkt for punkt:

• julemusikk! Ja! Dette har eg klart. Om morgonane på veg til jobb har eg høyrt på NRK klassisk, og kosa meg med å sleppe politiske debattar etc, kanskje eg berre skal fortsette den vanne?
• julebakst, eg har bakt berlinerkransar og brune pinner. Julebrød i fleire rundar, dei har ein tendens til å bli oppetne ganske fort! Felles bakekveld med vener, eg bakte lefser og delte med dei andre, og fekk kolakaker, havrekjeks og krumkaker i bytte. Ein god tradisjon vi skal halde ved like! Den engelsek fruktkaka er laga for ei stund sidan, og skal nytast når juletreet er tent i morgo kveld.
• juleblomster, kanskje ikkje så mykje som planlagt, men eg er på runde to med sviblar og amaryllisen blormstrar. Ny azalea blomstrar saman med den eg kjøpte til jul for 3 år sidan. Krans på døra har vi ikkje, men eg har kjøpt juletre. Einer med lys og kuler i nisjen i trappa, det skaper stemning i heimen. 
• adventskalender. Eg har vore kalenedergeneral på jobb, men heime har det vore litt til og frå. Det hadde litt med ein liten Romsdalstur i starten av desember å gjere, eg kom på etterskot med både det eine og det andre. Trur eg har igjen meir enn halve tekalenderen, men den kan eg gjerne drikke i romjula og på nyåret også! Felleskalender med mannen og kalender dei dagane ungane er heime, har vorte berre nesten... Men kanskje neste år?!  
• julekrybba kom fram 1.desember, og har fått ein ny figur nesten kvar dag. No manglar berre Maira og Jesusbarnet. Denne vesle stjerneguten pyntar opp på stova og syng med kvar gong eg sett på julemusikk! (trur eg)
  
  
  
• LYS! Eg har tent levande lys, eg har hatt lyslenker, eg har stjerne med lys, kuler med lys og lysestake i kjøkkenglaset. Det gjer så godt! 
  
• lammerull og sylteflesk. Eg har laga begge deler, og tomatsilda er laga. Alt er testsmakt og godkjent, no ventar eg berre på å kunne ta det fram til julaften. Gler meg! Og eg har kjøpt røkt villaks, juelansjon, gode ostar, rømmesild, fenalåret er fedig og klart til smaking. Nam! Svolte treng vi ikkje vere denne jula heller!
• klementin, det er advent altså! Lurer på kor mange kilo vi har ete...
• Ta fram julepynten lille julaften, og pynte huset, altså i morgon. Det blir kjekt!
• julegåver er vel også ein del av advent. Trur det meste er i hus no, men eg har igjen ein del innpakking. Det får bli i natt eller noko.
  

• eg har kjøpt julegodteri og gøymt unna, og det skal bli stas å ta fram. Alltid marsipanfrukter og i år også norske nøtter. Det er smak av barndom det!
• julehatt! Den og julegenser blir nok ein fast tradisjon i desember, til spesielle høve. Særleg på jobb, der enkelte har lurt på kva eg eigentleg driv med! Både julegenser og Lucia har eg tatt meg av i år :)
• Julebrev er det dårleg med, kanskje det blir tid i romjula? Eg kosar meg iallfall med å lese det alle de andre sender meg!

(om eg er så i ruta at eg har tid til å sitte her og blogge i det vide og breie? Tja? ! Det er ein måte å unngå at eg gjer for mykje, for ryggen syns vel at eg har strekt meg vel langt i det siste. Så då prøvar eg leve litt saktare, til glede for resten av familien, som heller vil vaske enn at eg skal bli liggande)

I skogen er det ferdig pynta!

Og jul blir det! Uansett! Med eller utan hybelkaninar i krokane... 

Det er visst november enno

Sjølv om eg gler meg til advanr, den katten er ute av sekken no, så er det fint med novemeber også.
Idag gjekk eg tidleg frå jobb, fekk med mannen på tur i skogen og fekk sett solnedgangen frå skogen. På tur heim kjøpte vi med oss pizza, slik er livet utan barn som bur heime!
(unntatt dei dagane vi et restar til middag fordi vi beregna feil mengde dagen før, pga av dei før nemnte ungane som har flytta ut og sovnar i kvar vår  sofa etterpå)

Eg må utvide julelista mi litt meir:

• i kjellaren heng pinnekjøt og fenalår til tørk, så vi har både pålegg og julemiddag nesten heimeprodusert (til jula skal det vere fenalår og pinnekjøt, sjøl om eg ofte syns at lam smakar ull)
• eg har kjøpt amaryllis, den er smugla ned i kjellaren, og i løpet av helga kjem den nok opp, i fin krukke og med mose og kanskje nokre kongler. Tada! Kvar den kom frå? Nei, sei det!
• eg har dratt i gang den fleirårige tradisjonen med adventskalender på jobb. Før eg rakk tenke på det, kom folk og spurte om det vart. Ei ganske overkommeleg oppgåve, då den som vil delta kjøper gåve og leverer til meg, og så sørger eg for å trekke kvar dag i lunsjen. Det brukar å vere få gåver i starten, men så syns folk det er trist å sitte der utan sjanse til å vinne, og det strøymer på med gåver! (og det fell litt heder og ære på meg)
• eg fyller på med kaker på bakelista mi, aniskringler, lauper, tjukklefse. Og idag prøvar eg ut ei oppskrift på salte mandlar, nam! 
• og det har dukka opp lys, her og der, i huset. 
• eg kjøper julegodteri og gøymer unna, og når jula kjem, har vi rause mengder! 

Lista blir nok utvida, fleire gonger, før jul!

Og ein flott ting med november er thanks-giving! I morgon er vi invitert på kalkun til nokre naboar, og det er ein fin tradisjon! Eg gler meg! 

Er det advent snart?!

Eg har vore på Plantasjen idag. Det slår meg ar det snart er jul! Og at eg gler meg.

På Plantasjen har dei juletre (muleg dei berre har kunstige enno?) Juleblomster, julepynt, julelys+++ Og det er adventspynt, amaryllis og sviblar (og dersom du ikkje fortel det vidare, så kan eg fortelje at eg har kjøpt sviblar og mose og ekstra lys til juletreet) Eg har kjøpt snop til adventskalenderen på jobb. Eg måtte nesten ta meg saman, for å ikkje gå heilt i julefella!

Så no må eg ta litt grep, for det er tross alt over ei veke igjen til 1.søndag i advent, og såpass bør eg greie å vente. Eg skriv difor lister. Det ligg ei liste på jobb, ei på kjøkkenbordet, ei i veska, ei ved     pc´n... Kva som står der? Litt ymse, men no kan eg jo prøve meg på ei liste her og!

• julemusikk! Eg skal kose meg med julemusikk i heile desember. NRK klassisk, Spotyfy og jule-cdane mine. Jada! (noko seier meg at andre i heimen kan få overdose)
• julebakst, eg MÅ ha berlinerkransar, krumkaker og bruke pinner. Av erfaring blir det alltid meir. Rundstykker, knekkebrød og julebrød. Nam!
• juleblomster, eg er som sagt igang med sviblar. Det er berre så vidt lov, kjenner eg. Kanskje eg skal ha ein ny azalea? Den forrige blomstrar no, tredje sesong. Amaryllis, krans på døra, nokre greiner med lys og pynt i trappa. Uendeleg mange muligheiter!
• adventskalender. Eg har ein tekalender, den skal eg kose meg med kvar dag etter middag, gjerne saman med kalenderen på tv. Men ein liten felleskalender med mannen, det er kjekt (og av ting som ikkje kan snakkast høgt om, kjøpte eg ein på salg i mars eller noko slikt, den er passe for oss to i heimen) Ungane er jo altfor store til kalender, NOT! Men dei får ikkje før dei kjem heim på juleferie, då blir det mindre å pakke inn også.
• julekrybba kjem fram 1.desember, og så prøvar eg å huske å sette inn ein figur kvar dag fram til julaften. Trur kanskje eg har nokre nye englar som skal inn i englekoret i år. Eg har iallfall ein ny juleflamingo, den skal på juletreet i selskap med julealligatoren.
• LYS! Det er så mørkt ute, og kaldt, det er meir enn -10 grader i kveld. Så eg har starta så smått med litt ekstra lys, både levande, på batteri og elektrisk. Eg gler meg til eg kan tenne adventslys kvar dag, eg gler meg til å henge opp stjerne, og sette fram lysstake og anna lys!
• lammerull og sylteflesk. Eg har kjøpt slagside av lam, og treng berre ein kveld (og motivasjon) til å krydre og sy. Heilt tett innpå jula skal eg lage tomatsild, og kanskje rømmesild?
• pepparkaker med blåmuggost og store skåler med klementin, det er advent altså! 
• Ta fram julepynten lille julaften, og pynte huset. Finne igjen kjent og kjær julepynt, henge den på riktig stad. Og gleda ved å rydde den vekk igjen i januar.
• julegåver er vel også ein del av advent. Ligg godt an, på ein måte, dårleg på andre. Nokre spør kva eg ønskjer meg, det er alltid vanskeleg! Eg har jo eigentleg alt, og samtidig blir eg så glad for gåver! Men når det kjem til julegåver, då er eg avhengig av lister! Og utkryssing etterkvart. 

Dette er jo gleder! Så kjem vasking og rydding, det er kjedeleg, men etterkvart innser eg at det høyrer med (og vaskegeneralen=mannen tillet ikkje slurv) 

No må eg berre halde ut november, men så bryt det laust! Hurra! 

Om eg er ein slag juleelskar? tja. 

Vekestart og dagens middag

Dei siste vekene har eg vore flink, laga middagslaner på søndag og skrive milelange handlelister som eg har tatt med ut på måndag. Eg passar på å notere det som går tomt, slik at eg huskar at det er tomt for knekkebrød og dusjsåpe også, det er iallfall det som er tanken... Det er på mange måtar veldig mykje enklare når eg kan sjå på ei liste kva vi skal ha, og eg har det eg treng i huset.

Plana for sist veke

Men det er klart, av og til stemmer ikkje kart og terreng. Sist veke vart det ikkje baconsurra indrefilet på fredag, derimot vart det restar av pølsegrateng i full fart, før dei andre stakk ut med båten. Eit pluss det altså, vi åt opp ein rest før den var inntørka og trist (for nokon har framleis litt tungt for å huske at vi er 3 som et middag heime no, og ikkje 4. Korleis det skal bli til hausten, når vi er berre 2 igjen, får vi ta når den tid kjem. Det kan vere det blir mange restemiddagar)
Og igår vart det ikkje "noko med fisk", det vart pulled pork og grilla grønsaker, med heimebakte briochebrød og råkostsalat. Riktig så godt, og vi måtte jo teste den nye grillen.

Igår vart det heller ikkje skrive noko ny middagsplan... men handleliste med mange gode forslag vart det laga, og den har eg brukt idag. I tillegg til at eg har vore innom nokre nettsider med tips. Så idag vart det pai med laks og spinat. Eg er ikkje veldig god til å følge oppskrifter, eg tek dei som eit utgangspunkt. Så i tillegg til spinat, vart det vanleg løk, raudløk, vårløk, ein liten bit (sliten) purre, ein rest fennikel, eggestand og på toppen riven parmesan og sveitt jarlsbergost. Og med råkost til, vart det "noko med fisk" idag. Og i løpet av kvelden skal eg lage ei ny middagsliste med utgangspunkt i det vi har i skuffer og skap og det eg handla idag! Trur eg.

Det passar godt å sitere D.W Eisenhower:

"Plans are useless, but planning is indispensable"

(Planer kan ikke brukes, men du kan ikke klare deg uten planlegging!)

Ha ein fin måndag, med eller utan planer.

Januargleder

Januar er igang. Kvardagen er her. Idag har vi ete asiatiske fiskekaker med agurk- og raudlauksalat til. På tide med noko lettare enn kjøt i alle variantar! (fiskekakene laga eg sjølv, og bortsett frå at dei vart altfor salte, var dei eit friskt innslag på middagsbordet!) Det er fint med kvardag. Eg var klar for grovbrød og gulrot, sjølv om eg syns det er litt langt mellom måltida...
Men det er litt tungt å komme igang igjen, etter lefser til frukostdessert og sjokolade og kaker som mellommåltid, mellom alle måltid faktisk! Eg kan fint leve med å snu døgnet....det er berre at eg ikkje likar å snu det tilbake. Klokka halv sju om morgonene er det mørkt, det er kaldt, og eg er trøytt! Eg treng å tenkje på noko positivt!!! (ikkje berre kl halv sju, forresten)

Men tross midtvinter, solnedgangen er fin!

• vi hadde ei fin jul! Rett nok var vi delvis sjuke og fekk ikkje gjort alt vi hadde tenkt, men vi var saman, vi åt godt, spela spel, såg filmar, las bøker og åt sjokolade. Vi traff vener og feira nyttår.
• eg har jobb å gå til, der eg får jobbe med interessante ting og der eg får tilrettelagte oppgåver. Det er fint for både hørsel og rygg, og dermed for humøret. Gode kollegarer har eg og!
• det har kome snø! Akkurat no er det som eit julekort, forsinka som så mange julekort er. Igår var eg på årets/sesongens første skitur. Eg trur knapt eg gjekk på ski ifjor vinter, så gleda var stor i går. Og jada, eg gjekk sakte, men kort, nytte skogens ro, og likevel syns vel ryggen det vart litt mykje.
• juletreet veks og veks. Det er grønt og frodig og har fått nye, lange skot. Koseleg å sjå på, det er jo lyst med eit tre på stova. Samtidig gler eg meg til å ta bort julepynten, det blir på ein vårleg og god plass når treet er ute! Det er jo ille å kaste ut eit tre i vekst, kanskje eg kan prøve å selge det? Pent brukt, billeg i drift, lettstelt? Interessert?
  
• julesnop på salg! Say no more... ;) Prøvar å begrense meg, men litt må eg kjøpe.

  

  Mokkabønner er min favoritt!

• Ein amaryllis som snart blomstrar!

  

  Og ny juleduk, brodert av mamma, julegåve. Jazzboka fekk mannen
  av den mest musikkinteresserte junioren.

• planer i helgene i heile januar! Kaffebesøk, nyttårsbord, fødselsdagsfeiring, jubileum og fleire turar! Det er stadig noko å sjå fram mot! (og kanskje greit at det inntil vidare ser ut til at februar bli litt roleg?)
• kakeboksar som tømmest! Det er fordelen med å bake lite...fortare tomt. Eg var veldig gnien på kakene før jul, elles hadde det vel vore tomt før! 
  
• Det går mot lysare tider!! Hurra! Idag har det vore klarvær. Sol. Og iskaldt, men det er jo vinter, så det skal jo vere kaldt. 

Og eit oppstartsdikt i januar, det må vi ha. Eit forsiktig dikt, som kjem og tek deg i handa og seier at  "Det skal nok gå".

Dagens ord er vart

og varsamt

og går stilt i døra

der det kjem listande

med lyset

og kviskrar:

Det skal nok gå.

Me tek eit andegrag

i lag.

Helge Torvund

Ha ein fin kveld!

No skal eg gå ein tur, medan mannen prøver å synkronisere dei elektroniske kalenderane våre. Det blir nok bra, men eg stiller meg tvilande til at det er sunt for blodtrykket undervegs...

Skitur. Obligatorisk bilde av skituppar.

Oppsummering, novemberliste

Det er på tide å oppsummere november, kva har eg gjort og kva vart med tanken? November gjekk iallfall fort, det har vore ein god del avtalar i kalenderen, i tillegg til det faste har eg for eksempel vore på Tupperware-kveld, konsert med junior, kafekveld med venninne og på hobbykveld på jobb. 

• eg skal fyre og tenne lys, som alltid i november. Og med meir enn minus 10 grader ute idag, er det godt med vedfyring og fullt vedskot! Eg har fyra masse og brent litt lys! November er på mange måtar ein innemånad.
• eg vil bake meir, grovbrød(for "dei heimebakte brød er best, mamma", seier junior, og eg er lett å lede!) og eplekake(for kjellaren er full av epler) Eg skal lage kaldheva rundstykker til helgefrukosten og drkke te til frå den nye tekanna mi! Kjem på at det er lenge sidan eg har bakt eltefritt brød også. Inn på lista med det også! Eg har baka! Brød fleire gonger, loff og aniskringler. Litt julebakst som eg har gitt bort. Men ikkje eit einaste eltefritt brød, heller ikkje eplekake. Epla vart i staden til rå eplesaft, kjempegodt! 
• lese gode bøker! Eg ventar på ei bokpakke, gler meg på den og har nettopp starta på ei ny, tjukk bok som lovar veldig godt. Det går berre så sakte, for eg sovnar så fort på kvelden. Eg har lese ut ei bok, på over 700 sider, og no har eg byrja på den nyaste til Jon Michelet, om Skogsmatrosen. Innimellom har eg lese masse aviser, ukeblad og ei og anna lett bok.
• eg skal ut i skogen og plukke grøne greiner og tytebærlyng, eg har lyst å lage adventskrans for å ha både inne og ute. Det burde gå, sjølv om det akkurat no litt eit melisdryss av snø over skogen. Dette punktet innebær også å rydde vekk plantene ute, som igrunnen har gjort jobben sin i sommar og haust, og som ser litt slappe ut etter lite vatn og etterkvart frost. Altså, her har eg gjort nesten alt! Eg har plukka kvistar, greiner og tyttebærlyng, og lage ein fin  grei krans, men den tåler ikkje å henge ute... så den ligg på eit fat i yttergangen og ønskjer alle gjestar velkomne!
  

  
• Eg skal i det heile gå i skogen og ta inn skogens ro! Nyte at eg har piggsko som gir meg godt feste, gå av meg høge skuldre og mas, gå på meg eit smil. Helse på dei eg møter. Prøve å få med meg dagslyset når eg kan, men også møte blåtimen ute. Blåtimen har eg møtt først i dag, men eg har gått og gått, som eg brukar gjere. Som før nemnt, blir nesten alt betre av å komme seg ut og gå. Så då prøvar eg gjere det, også dei dagene eg høyrer sofaen nynne vakre sangar.

• vi skal feire farsdag og thanks-giving, kanskje blir det ein liten helgetur, og junior kjem heim på perm. Fine ting som gjer helgene i november lysare! Vi har feira farsdag, men thanks giving måtte gå ut av hendingar ingen rår over. Vi har vore på hegetur til Romsdalen og junior har hatt perm. Helgene har gått unna i ein fei! Ikkje berre det, men eg har feira fødelsdagen min med fin middag. Eg har rett nok fødselsdag i august, men eg fekk middag i gåve av ei venninne, og vi har ikkje gjennomført før i november. Det var altså ein super presang! 
• Eg skal prøve byggrautoppskrifta til Anne Helene og spare både kaloriar og plast! Kjempegodt, faktik så godt at resten av familien åt opp før eg fekk sukk for meg :) Plana er å prøve til igjen, eg må berre huske det...
• Klementinsesongen er igang, eg et og nyt, og kjenner kroppen får påfyll av c-vitamin. Det er på tide å ta fram att juicepressa og lage appelsin- og grapefruktjuice til helgefrukosten. Vi har laga juice, og vi har ete klementin i lange baner! Eg har laga sylta klementin også,som ein test, og det vart skikkeleg søtt og godt. 
• Eg skal tenne lys i lyslyktene mine ute når eg ventar besøk, det er så kjekt å møte folk med lys! Gjennomført!
• Lister for jul! Gåveliste, bakeliste, vaskeliste, alle slike lister som ryddar hovudet mitt(og som slett ikkje alltid blir fulgt) Eg lovar iallfall at eg skal overhalde jakttidene på hybelkaninar, som i distriktet her varer til ca 20. desember! Listeveldet lever, ingen tvil om det. På papir, lause lappar, i notatbøker og på mobilen. Kunne vore ein ide å samle dei kanskje??
• Henge opp lammelåret, som no ligg i salt, til tørk, slik at det blir fenalår til jul. Lammerullen ligg i frysaren, ferdig sydd. OK
• bake fruktkake, slik at den får ligge og modne til jul. Det blir ikkje jul utan denne fruktkaka. Iallfall ikke hos oss. OK
• Planlegging av adventkalender. Skal vi i det heile ha? Sidan dei søte små er 18 og 20 år, meiner eg? Tør eg foreslå å droppe den tradisjonen? Kjenner eg meg rett, blir det kalender, fordi eg kosar meg med det, og fordi dei sett pris på det(trur eg) Det vart kalender, jada. Det manglar pakker frå 14. og til julaften, men dersom sonene les dette: det er ingen grunn til panikk, det kjem!
  
  
  

Alt i alt syns eg november har vore fin. No er eg klar for advent og jul, og om ei stund er eg nok klar for eit nytt år også. Eg likar fest og glede, men kvardag er også fint! Og då passar det med november, kvart år!

November

I fleire år har eg hatt eit novemberprosjekt her på bloggen, for å leve i november og utsette advent og jul til desember. Du finn desse innlegga under etiketten "november" i lista til høgre.
Det er ikkje slik at eg ikkje tenkjer noko på jul og advent i november, eg førebur kalender, julebakst, julegåver og andre ting, men eg et ikkje pepparkaker, ventar med julematen og julemusikk er ikkje lov før advent!
Det eg derimot gjer, er å nyte det som kan nytast i november!
Og no skal eg lage meg ei liste for å hjelpe meg å huske prosjektet!

• eg skal fyre og tenne lys, som alltid i november. Og med meir enn minus 10 grader ute idag, er det godt med vedfyring og fullt vedskot!
• eg vil bake meir, grovbrød(for "dei heimebakte brød er best, mamma", seier junior, og eg er lett å lede!) og eplekake(for kjellaren er full av epler) Eg skal lage kaldheva rundstykker til helgefrukosten og drkke te til frå den nye tekanna mi! Kjem på at det er lenge sidan eg har bakt eltefritt brød også. Inn på lista med det også!

  

  Impulskjøp i København. Angrar på at eg ikkje var meir
  impulsiv og kjøpte matchende krus...

• lese gode bøker! Eg ventar på ei bokpakke, gler meg på den og har nettopp starta på ei ny, tjukk bok som lovar veldig godt. Det går berre så sakte, for eg sovnar så fort på kvelden.

  

  Islandsk triologi. Om havet, livet, døden (det manglar litt om
  bamsemums, det kan komme)

• eg skal ut i skogen og plukke grøne greiner og tytebærlyng, eg har lyst å lage adventskrans for å ha både inne og ute. Det burde gå, sjølv om det akkurat no litt eit melisdryss av snø over skogen. Dette punktet innebær også å rydde vekk plantene ute, som igrunnen har gjort jobben sin i sommar og haust, og som ser litt slappe ut etter lite vatn og etterkvart frost. 
• Eg skal i det heile gå i skogen og ta inn skogens ro! Nyte at eg har piggsko som gir meg godt feste, gå av meg høge skuldre og mas, gå på meg eit smil. Helse på dei eg møter. Prøve å få med meg dagslyset når eg kan, men også møte blåtimen ute. 
• vi skal feire farsdag og thanks-giving, kanskje blir det ein liten helgetur, og junior kjem heim på perm. Fine ting som gjer helgene i november lysare!
• Eg skal prøve byggrautoppskrifta til Anne Helene og spare både kaloriar og plast!
• Klementinsesongen er igang, eg et og nyt, og kjenner kroppen får påfyll av c-vitamin. Det er på tide å ta fram att juicepressa og lage appelsin- og grapefruktjuice til helgefrukosten. 

  

  Berre synet gjer godt!

• Eg skal tenne lys i lyslyktene mine ute når eg ventar besøk, det er så kjekt å møte folk med lys! 
• Lister for jul! Gåveliste, bakeliste, vaskeliste, alle slike lister som ryddar hovudet mitt(og som slett ikkje alltid blir fulgt) Eg lovar iallfall at eg skal overhalde jakttidene på hybelkaninar, som i distriktet her varer til ca 20. desember!
• Henge opp lammelåret, som no ligg i salt, til tørk, slik at det blir fenalår til jul. Lammerullen ligg i frysaren, ferdig sydd.
• bake fruktkake, slik at den får ligge og modne til jul. Det blir ikkje jul utan denne fruktkaka. Iallfall ikke hos oss.
• Planlegging av adventkalender. Skal vi i det heile ha? Sidan dei søte små er 18 og 20 år, meiner eg? Tør eg foreslå å droppe den tradisjonen? Kjenner eg meg rett, blir det kalender, fordi eg kosar meg med det, og fordi dei sett pris på det(trur eg) 

Og klarer eg gjennomføre dette, trur eg ikkje at eg vil sakne jul og advent! Om eg gler meg på desember? Klart det, eg har masse julemusikk eg ventar på, eg gler meg til NRK Alltid Klassisk sender julemusikk døgnet rundt, til pepparkaker med blåmuggost, julebakst og julepost(note to self: finn fram bildet til julekort i november) Innpakking av julegåver, innkjøp av julemat og juleblomster når det nærmar seg. Men enno er eg ikkje klar, eg treng litt meir haust først!

10 mål for oktober

Eg har lese så fine lister om mål for oktober, både hos Anja i Avdeling Holt og Fru Jacobsen og vart så inspirert! Så no prøvar eg å skrive nokre mål, ønskjer og planer for min eigen oktober månad.

1. Gå tur. Eg har nesten vorte avhengig av å gå tur, og trur eg blir eit betre menneske av å gå tur. Idag har eg gått tur til byen, i regnvær og med regnjakke og støvlar. Fint! I morgon skal eg gå tur i skogen. 

   

   Blir aldri lei av skogen 

2. Lese ei bok kvar veke, og bruke biblioteket meir. (Og ikkje berre låne bøker, men også levere dei tilbake i tide...)
3. Feire 23-års bryllupsdag! Satsar på at vi rekk det, sjølv om det er på ein søndag og det er midt i elgjakta. (Kan du tenke deg? Gifte seg midt i jakta? Men mannen var ikkje jeger den gongen.)
4. Kurs med fagforeninga om omstilling, og nokre timar i København. Satsar på å rekke dansk frokost og ein nokre skobutikkar.
5. Sette båten i vinteropplag. Eg ser at eg er ein godværsseglar, og at sesongen nok er over. Vi har hatt fine turar, men no er tida inne for andre aktiviteter.

   

   Fin utsikt frå båten, også ved kai

6. Kjøpe lys i bøtter og spann, slik at eg kan tenne lys når eg sitt i sofaen og les. 
7. Lage fårikål ein gong til. Og eplepai! Og kanskje kan junior lage pannekakefrukost ein dag? Og bake bollar og brød, så mykje betre enn kjøpebrød.
8. Gjere styrketreninga for ryggen, kvar dag, jamnt og trutt! Oversjå at det er litt kjedeleg, det går greit når eg først startar. Forhåpentlegvis kjenne at det går framover og at det virkar. 
9. Ikkje fylle bensin på dieselbilen! 
10. Bruke mindre tid på nettet, heller sjå ein film eller prate med dei rundt meg.

Måndagsmoro

Ny veke og kvifor ikkje velge ei positiv vinkling på ein måndag?

• fårikålrestar til middag. I helga hadde vi besøk av svigerforeldra mine, og eg laga skikkeleg søndagsmiddag: fårikål og til dessert eplepai (men den er det ikkje restar av) Fårikål dag 2 er om mogeleg endå betre! 
• norske epler!! Finns det noko betre på hausen? Raude, grøne, sure, skarpe, søte, GODE! 

• norske plommer! Mykje det same som med eplene. Og det inneheld jo ein del barndomsminner, minner om eplekart, sure plommer, litt vondt i magen og snurp i munnen :) Klatring i tre og jakta på den perfekte plomma! Ikkje mykje som slår å sitte i eit tre og prate med vener og ete plommer eller epler.
• nokre dagar med "indian summer". Plutseleg sommar igjen, på dagtid, og skarp, klar haustluft på morgonen. Høg himmel og måne på himmelen på kveldstid. (Men eg syns det blir litt for tidleg mørkt...)
• å gå tur og konkurrere mot meg sjølv, endeleg kunne gå litt på i motbakkane (men enno ta hensyn til ryggen)  Plukke dei siste bringebæra i grøftekanten og planlegge ein tyttebærtur. 
• god bok på Kindle, og lese på senga(og innsjå at ein byrjar bli gamal og vakne av at ein har sovna med boka i handa...)
• tenne lys utpå kvelden, mange lys!
• fotosafari, å legge merke til dei små og store motiva ein går forbi.
• mimre tilbake til helga, som både hadde skogtur og segltur

Og alt dette går godt å gjere på ein heilt vanleg måndag! 

Eit dikt skal du også få, natulegvis. Det er tross alt måndag! 

Eg veit ikkje om eg har ein fast ventestein, men eg har ulike stader som er "mine" der skuldrene senkar seg og pulsen går ned. Håpar du også har ein eller fleire slike stader.

Ventesteinen

Ingenting som ein ventande stein
ein stein som ventar oss
ein stein der vi kan venta
og vera venta

ein fin, flat stein i sol og regn
ein stein for smil
ein stein for gråt

ein tålmodig stein som ventar
saman med oss

Sigbjørn Heie

Fredagsgleder

Det er nok å henge seg opp i, av både viktige og mindre viktige ting. Ting som irriterar som kløe på ryggen, andre ting er større og kan ta nattesøvnen. Difor tenkte eg å lage ei liste med fredagsgleder!

Ein stamme å kvile på, når det er fredag og det har
vore ein lang motbakke først.

• eg rakk jobb tidsnok idag, til tross for at eg forsov meg. Takk til mannen som laga frukost til meg (eg har fleksitid, men av og til må eg vere der til ei fast tid lell, det er alltid slike dagar ein forsøv seg!) No gjeld det berre å finne ut kvifor "vekkarsengeristaren" ikkje starta i dag tidleg. Det kan vere eg må ringe Hjelpemiddelsentralen for å få hjelp.  Det er litt "pangstart" på dagen å forsove seg...
• eg har vore på kafe og ete lunsj. Heilt åleine, men med selskap av ei avis og ein stor kopp te. Det kallar eg kvalitetstid.

  

  Kvalitetstid

• eg har gått tur i marka. Med bøtte til å plukke litt blåbær her og der, for det er så mykje bær i marka. Ein skikkeleg kosetur, med lavt tempo, litt fotosafari og litt bær i bøtta og mykje i munnen. Tid til å høyre suset i trea, kjenne lukta av skog og sjå på humla som surrar. Det var ikkje sol, men det regna ikkje og slik været har vore dei siste dagane, er det eit avgjort pluss.

  

  Blått i blått!

• eg kom heim etter skogturen og åt ei skive av rugbrødet eg bakte i går, med kremost og blåbær på. Det var eit skikkeleg #instamoment, og eg kjente meg nesten som ein rosabloggar :) Det er hashtag på hashtag! #heimebakt #sjølvplukka_blåbær #gamalt_servise #husmorpoeng #utan_sukker #mat_frå_grunnen 
  
• eg har bakt blåbærkake av blåbæra! Den et eg lunka framfor tv´n i ei varm og tørr stove, saman med mann og son. Godt! Vi ser Ol-sending, med bueskytting og håndball.

  

  Blåbærkake

• ryggen virkar når eg tek det med ro. Eg har klart å gjere styrkeøvingar fleire dagar den siste veka, og halde meg i skinnet når eg er ute og går(altså ikkje prøve å sette fartsrekord...) Det er så godt for humøret å kunne gå tur i skogen!
• eg har ei heil helg framfor meg, med litt planer, men også med tid til å gjere det som fell meg inn. Fredag er kanskje den beste dagen i veka slik! 
• eg har fleire gode(trur eg) bøker liggande som eg skal lese. Kanskje eg skal lese langt på natt? I morgon har eg uansett ikkje tenkt å teste vekkerklokka.

Eg skal tenkje litt meir på desse plusstinga når eg legg meg i kveld! 

Eg har slikt å gjere...

...når eg ikkje kan gjere akkurat det som fell meg inn. Advarsel; dette innlegget inneheld litt sutring!

Eg har eit snev av brakkesjuke. Eg er verre no, enn eg var før operasjon, men det er jo forbigåande (etter planen). Eg reknar med at etterkvart er eg sprekare enn før, og ryggen vil vere god, men akkurat no, med operasjonssår og restriksjonar, blir eg litt lei, oppgitt og motlaus. Litt brakkesjuke, rett og slett. (Ja, eg veit at det kunne vore verre. Eg kunne fått nei til operason og gått med uavklart rygg enno. Eg kunne budd i eit land med krig, svolt, utan legehjelp etc. Men litt av problemet er at eg akkurat no ser kun min eigen nasetipp!)
Eg har sjeldan lyst til å vaske golv, men når eg ligg på sofaen og ser BobHarry og venene hans springe rundt på golvet, blir eg litt desperat. Eg bryr meg ikkje så mykje om vindusvask heller til vanleg, men no... Og slik er det med mange ting, eg ser dei, og har god tid til å tenke på det eg ikkje får til! Og det blir litt lange dagar utan selskap, eg får spara opp masse tema til mann og son kjem heim frå jobb!
Eg veit at det beste er å gjere som eg har fått beskjed om, det vil både eg og ryggen tene på i lengda. Og eg er jo mykje betre allereie, eg har kunne kutte ned på smertestilande, og kan snu meg i senga utan å vekke dei andre i huset!

Men kva gjer eg for å få dagen til å gå?

• eg startar dagen med ei stor kanne te! Eg har masse god te å velge mellom, og eg går litt rundt, høyrer radio, blar i avisa, drikk te, før eg sett meg ned og et frukost, prøvar gjere det til ein god start(og det er best å drikke te medan ein er ståande eller sittande, veldig vanskeleg i liggande posisjon) Og ein liten bit mørk  sjokolade til frukostdessert! (og eg har på skikkelege klær, joggebuksa er parkert i skapet! Eg kjenner meg friskare slik)
  
• eg finn meg ei god stilling på sofaen, med puter og pledd(for det kan fort bli kaldt, og særleg når det haglar ute) Eg har etter litt tid kome fram til at det er ikkje så farleg om eg søv litt på dagtid. Eg søv dårleg på natta, og det er greit å ta igjen på dagen(iallfall litt)
• eg høyrer radio, på radio, som nettradio eller podcast. Eg er særleg glad i P2, med Ekko, Kulturhuset og Salongen.  Men eg er innom NRK Jazz og NRK P1 også.
• eg les! Særleg ebok, på Kindle. Frykteleg greit når ein ligg på ryggen, fordi den er så lett å halde. (og så lett å fylle på når ein har lest ut ei bok....)
• eg vaskar klær. Det går, når eg får andre til å bære dei skitne klærne til vaskerommet. Eg har ordna meg ein stol der, slik at eg kan sitte og sortere klærne, legge i maskina, flytte over i tørketrommelen og til slutt få nokon til å bære dei reine klærne opp igjen. (Jada, min indre pensjonist er tilstades)
• eg går på butikken og kjøper eit rundstykke til lunsj. Det er akkurat passe tungt å bære heim igjen, og eg får rørt meg, frisk luft og avveksling. Når eg slår meg laus, kjøper eg med blåbær også. 
• eg planlegg middag. Og lagar middag, eg må berre starte tidleg, og finne rettar som ikkje krever for mykje kutting og hakking, og som gjerne blir betre av å stå lenge og putre(mi indre husmor er på ferde). Evt fiskekaker på panna. Det kan heller ikkje vere element av tunge løft. Men denne veka har vi hatt fiskekaker, lasagne og suppe. No må eg snart skrive handleliste, og sende nokon ut og fylle på matlageret.
• eg er meir enn vanleg aktiv på Instagram, Facebook og Twitter, der er det stort sett noko som skjer. 
• eg ser ikkje tv på dagtid. Det er eigentleg ikkje noko prinsipp, men har du prøvd å sjå tv på dagtid? Det går ingenting!

...og innimellom kjedar eg meg likevel....

Og dette skulle eg eigentleg skrive ferdig før idag,  men så vart eg invitert med på lunsj på kafe. Eg rakk ikkje blogge, eg rakk ikkje kjede meg. Eg fekk testa formen, kjørte bil sjøl, gjekk ute mellom folk, og det gjekk BRA! Og det var så kjekt at eg gløymte å ta bildebevis også!

Så det går framover, eg må berre stoppe og kjenne etter. Eg veit at om nokre veker er verste over, eg blir spretten igjen til sommarferien ser det ut til. Eg er glad eg får tid til å bli frisk, at eg har fått operasjon. Eg prøvar å huske at ofte er det dagar utan planer eg drøymer om, og at eg skal nyte litt også, men så gløymer eg meg. Men no har eg iallfall laga ei liste som viser at eg gjer ein god del som eg syns er kjekt, og at eg igrunnen har det bra. Så OK, eg får prøve å huske det i morgon!

Førebuingar

Etter snart eit år med ein kranglete rygg, eit uttal undersøkingar, lang sjukemelding og mange legetimar, er det no bestemt: eg skal operere vekk prolapset i ryggen. Å gå tur, trene rygg- og magemusklar saman med fysioterapeuten og mykje smertestillande har ikkje vore nok, ikkje denne gongen heller. Men det har ikkje stått på vilje og innsats, iallfall!
Eg kjenner det er litt skummelt, litt godt, litt lettelse og mest av alt er eg glad fordi det endeleg skjer noko. Eg har gjort det før, 2 gonger, for 10 og 12 år sidan, så eg veit litt kva eg går til. Men eg har jo vorte 10 år eldre (kirurgen fekk ei stor stjerne då han sa at 47 år er ingen alder;) )samtidig har det sikkert skjedd noko med operasjonsteknikk også. Det blir nok bra! Og eit arr(til) på ryggen er ein liten pris for å mest sannsynleg bli bra. Då eg var operert sist, meinte ein kollega at eg skulle bedt om glidelås i ryggen, så ofte som dei skulle inn der...men no har det gått så lang til, at det var vel like greit dei berre lukka skikkeleg.

Når eg får beskjed om at noko ekstra skal skje, går eg igang med førebuingar. Det er jo ting som er greit er i orden, men det er ikkje sikkert du og eg tenkjer på dei samme tinga, hehe. Eg planlegg lesestoff, eg har sett på leselistene mine, og lasta ned bøker til Kindle og planlagt ei bok eg skal kjøpe. Eg tenkjer på filmar eg har tenkt å sjå, program på tv som eg aldri rakk, kanskje ligg dei på nett-tv eller kan lastast ned? Skrive på liste! Eg ser kva eg har av klær, som er lette og ledige og ikkje vil stramme rundt operasjonssåret på ryggen. Eg prøvar å lese meg litt opp om operasjon, for å finne ut om det blir ein ny periode med Jan Thomas sin tørrshampo, eller om eg kan dusje og vaske håret som vanleg. Eg bestiller iallfall ein frisørtime slik at eg er nyklipt. Og eg klipper tåneglane, før eg får eit arr som strammar! Eg funderar hardt på om dette kan vere ei utruleg god unnskylding for å kjøpe nye sko??? Eller eg funderar vel ikkje over det, eg veit at det er det!

Eg ryddar på skrivebordet(det er godt det er litt tid til operasjonen, for akkurat det tek si tid...)noko som ikkje har noko med operasjonen å gjere, men det er jo godt når det er gjort! Eg tenkjer på middag, og brødbakst. Eg skal skifte på senga og eg har funne fram gåstavane mine, slik at eg kjem meg på tur etterpå.

I tillegg drikk eg mengder med te med ingefær og honning, i håp om å få vekk gruffet frå halsen, slik at ikkje noko skal forsinke meg!
Det heile handlar om å vere førebudd, slik at eg, om mogeleg, har det enklare etterpå, at ikkje brakkesjuka skal ta meg og at eg ikkje skal utfordre grensene og reglane. Det spørs om det hjelp! (og litt for at eg ikkje skal bli ei burugle som har lange lister klar til mannen når han kjem heim frå jobb!)

Kva ville du gjort av førebuingar? Er det noko eg har gløymt?

Restesuppe og andre middagstips

Eg er flink å ta vare på restar, og av og til må eg gjere ein innsats for å tømme kjøleskap og frysar. Eg har vorte flinkare til å merke det eg puttar i frysaren med kva det er og dato, då er det lettare å ta opp igjen. Sjølv om eg trur eg huskar godt, er det ikkje alltid slik når eg åpnar frysaren... Boksar med uidentifiserbart innhald har det med å bli liggande lenger og så kasta.

På søndag hadde eg ei lita opptelling, og i kjøleskapet har eg laks, fiskekaker og bacon. Kokt potet til ein middag for tre var det også. I frysaren fann eg fiskebollar i kvit saus, chorizopølser, kyllingkjøtt etter ein heilstekt kylling i jula, pinnekjøtrestar, juleskinke, ferdig stekt ribbe og fiskeball. Altså mange middagar! Eg har difor sett opp ei plan for veka:

Måndag: Fiskebollar i kvit saus med kokt potet og gulrot. Det er også veldig godt med revne gulrøter med appelsin og rosiner til! Ein veldig lettvint middag når eg hadde kokt potet og berre trong varme opp alt!
Tirsdag(idag): Eg tok fram kyllingkjøt og chorizo, kutta opp løk, paprika, brokkoli, gulrot, sukkererter, kvitløk og stekte kjapt. Så slo eg på kraft og kokosmjølk og tilsette ein boks kikerter. Krydra med grønn currypasta og chilipulver. Perfekt på ein kald januardag!

Hot suppe!

Onsdag: Tenkjer eg vi skal ha bakt laks med kål og ingefær- og chilisaus. Ein favoritt i heimen! Berre trykk på linken!
Torsdag: Eg vurderar ein betasuppevariant med pinnekjøttrestane. Muleg vi må ha litt meir kjøtt?
Fredag: Fiskekaker i hamburgerbrød, og heimelagd cole slaw.

Då har eg fått brukt ein del restar og innkjøp som berre ligg der. Ser dessutan at vi ligg godt an på inntak av fisk/fiskemat, det er jo bra!

Eg har planer for ein del av det andre også:

• Juleskinka skal glaserast med lønnesirup(junior har tankar om korleis vi skal gjere dette, så det får bli eit fellesprosjekt)
• Fiskeball med stekt bacon og kokt potet, gulrot og kålrot.
• Ribbe pensla med ein saus av hoisin, soyasaus, reven ingefær og chili, og varma i steikeomnen. Servert med woka grønsaker og kokt ris(dette prøvde vi i jula og det var godt!)

Altså har eg planene klare :) No står det att å gjennomføre...det krever at eg huskar å ta opp frå frysaren feks! 

Ting eg har lyst å gjere i november

Kvart år kjem november. Haustferien er over, det er lenge til jul, det er mørkt ute, det regnar... Eg har dei siste åra planlagt novemer, slik at eg kan nyte også den månaden! Litt fordi eg likar advent og jul så godt, har eg tidlegare starta advent og jul altfor tidleg. Dei siste åra har eg klart å vere bevist på dette, og det har vore fint!

Så kva skal eg bruke november til?

• Bake brød og bollar. Det er så godt og det tek ikkje så lang tid, når eg har bestemt meg. 
• lage dessert på søndagane. Dessert er ikkje kvardagsmat, men eit lyspunkt. Det er mykje å velge mellom, frå enkel is til eplekake eller fromasj eller.... nam!
• gå endå meir tur i skogen. No viser forskning at «naturen «sletter» bekymringer», og det har eg vist lenge! Det siste året har eg traska masse i skogen, det er godt for kroppen, ryggen, hørselen+++ Det ligg igjen både kilo og bekmringar i motbakkane der eg har gått!  http://www.norskfriluftsliv.no/naturen-sletter-bekymringer/ Utnytte dagslyset så langt det går, så gjer det ikkje så mykje om kveldane er mørke.
• lage middagsliste igjen, det er mykje kjekkare på ettermiddagane når eg veit kva eg skal lage. Meir variert blir det og. Og då passar det å starte med stor helgehandel igjen også.
• plukke granbar og mose til adventskrans. Det kan eg ta på ein eller fleire av skogturane mine.
• lage julegåvelister. Med stor, fin familie er det mange å huske på, og det er mykje enklare å finne gode idear når ein sitt i sofaen og ikkje spring rundt i butikkane med høg puls.
• ha besøk av junior som har ei friveke i november, feire ein 60årsdag, gå på julemesse, feire 75årsdag. Fine sosiale treffstader!
• tenne masse levande lys! Inne og ute. Fyre i omnen og sjå inn i flammane.
• Ete klementin. Fylle på med frisk frukt og grønsaker, det trengs i haustmørket.
• gå på kafe, ta med bok og drikke te. Gjerne åleine, men eg kan godt få selskap!
• lage middag som tek lang tid, i helga vart det chili con carne. Skikkeleg hot, passa godt i grått regnvær. Eg bakte eltefritt brød til, så det var skikkeleg saktemat. Til helga skal vi ha lammelår, trur eg, eller lammefrikasse, sidan det er farsdag og mannen syns det er så godt.

Det vart 11 punkt, kanskje det kan inspirere deg også? 

Dette er mitt prosjekt, eg forstår at det ikkje passar for alle. Men eg tenkjer at alle har godt av å vere tilstades i livet, der du er no!

 

Slik var det i skogen i dag. Mørk himmel, vind og mild luft.