Sviskekompott

Inspirert av meg sjølv, som eg plar seie , i dette tilfellet lista over populære innlegg til høgre, laga eg i dag sviskekompott til dessert.  Det er nokre her i huset som helst vil ha gammaldags mat, og kva høver då betre enn kjøtkaker og sviskekompott?

5 dl vatn

2 1/2  ms sukker
1 pk svisker ev. aprikosar/fruktblanding

1 1/2 ms potetmjøl
1 dl vatn

1. Kok opp vatn og sukker.
2. Ha i sviskene og kok dei møre.
3. Rør ut potetmjølet i kaldt vatn. Ta panna til side og ha jamninga i.
4. Gje kompotten eit raskt oppkok.
5. Ha kompotten i ei skål og dryss litt sukker på toppen for å unngå snerk.


Server med mjølk/fløyte og/eller vaniljesaus.  Ein kan og piske krem og legge lagvis med krem, vaniljekrem og kompott som til grunnlovsdessert.

Grunnlovsdessert

"Du må lage grunnlovsdessert!" sa ei venninne av meg då ho høyrde at eg hadde rabarbra i hagen.  Eg måtte innrømme at eg knapt visste kva det var.  På tine.no fann eg ei oppskrift som eg brukte som utgangspunkt.  Eg kokte kompott heilt etter oppskrifta.  Men eg tok berre ein pakke Piano vaniljekrem og klipte eit hjørne av slik at det vart lett å fordele den opp kompotten.  Til slutt hadde eg vanleg krem med litt ekte vaniljesukker i.  Mandelflak og svisker til pynt.

Eg synest denne desserten er nydeleg, men eg er klar over at det finst folk som ikkje er så glad i svisker.  Då kan ein sjølvsagt lage sin eigen variant med berre rabarbara i kompotten.  Her er det berre å bruke fantasien!

P.S

Prøv med litt mindre sukker enn i oppskrifta.

Gelé på 1-2-3

Frøkna hadde bestemt at ho ville ha gelé i selskapet sitt.  Vi snakka først om stripete gelé i glas.  Det har vi laga før, me stetteglasa frå den gongen eksisterer ikkje meir.  Då fann vi ut at vi kunne bruke dessertskålene vi arva av farmora hennar.

På gelepakkane står no at ein skal drysse gelépulveret oppi panna.  Det har eg aldri gjort! Kvifor skitne ut den? Eg har vanlegvis pulveret i skåla, men i går brukte eg eit litermål slik at det skulle bli lett å fordele geléen i skåler etterpå.  Som vanleg brukar vi halvparten kokande vatn, og etter nokre minutt heller vi kaldt vatn i skåla eller litermålet.  Når ein i tillegg brukar frosne bær, stivnar gelén på kort tid.

Solveigs steikte eple

Sidan epledesserten i går vart så populær, tenkte eg at eg ville prøve ein litt annan vri i dag.  Kommentar frå i går: "Det var som berre epla i eplekake."  Og det var positivt meint.  Desserten i dag vart endå betre fekk eg høyre.

Som de ser, delte eg først epla i to.  Så la eg nokre rosiner i botnen.  Då syg dei til seg væske og vert ikkje liggande på toppen og svi seg.

Blandinga på toppen laga eg av:
2 ms meierismør
2-3 ms demerarasukker
1 dl hakka (brukte stavmiksar) juleneter

Fyllet la eg berre på toppen av dei halve epla.  Det var lettvint! 
Eg steikte dei på 175 grader ca 1/2 time.

Steikte eple

Inspirert av "Ingrids matminner" s. 151 laga eg denne desserten medan fiskeforma mi stod i omnen. Kanskje det ikkje er berre eg som har nokre eple att frå jul? Til denne retten fekk eg brukt litt juleneter, og ikkje minst fekk eg avsetnad på den siste fløytepakken etter nyttårshelga.

Eigentleg treng ein ikkje oppskrift.  Men det kan no vere greit å ha eit utgangspunkt:

8 eple

3 ms smør

4 ms rosiner

3 ms hakka neter

1 ms sukker

Bland saman alt og stikk det ned i epla som du har tatt ut kjernehusa av.

Steik ved 175 grader i 15-20 minutt.  (Mine fekk stå 10 minutt ekstra.)

Epla vart nydelege servert med mjukpiska krem med litt ekte vaniljesukker i.

Viss eg skal lage retten ein gong til, kjem eg til å dele epla i to.  Då ville eg lagt rosinene i botnen.  Dessutan ville eg brukt mindre smør og meir hakka neter!

Aprikosfromasj

I går var dagen for å kose seg meg julegåvene.  Eg måtte sjølvsagt prøve ut ei oppskrift frå ei av kokebøkene eg fekk!  Hos oss vert det ikkje laga så mykje dessert elles i året. Men i jula slår vi til!  Eg er glad i aprikosar, så valet fall på Prostindens aprikosfromasj s. 322 for dei som har boka.

I oppskrifta tek ein utgangspunkt i 5 dl fløyte. Der er 250 g aprikosar i oppskrifta, medan der er 200 g i ein pakke.  Eg kjem nok til å gjere om oppskrifta til ein pakke fløyte og ein pakke aprikosar. Men eg valde å følgje oppskrifta slavisk, med eitt unnrak, eg reduserte sukkermengda.  Sukkeret ville eg ha brukt i eggedosisen.

Det er ikkje vanskeleg å lage fromasj.  Det er raskt gjort.  Men det vert ein del oppvask.

Eg starta kvelden før med å slylje og legge i blaut 250 g aprikosar i 7 dl vatn..  Desse kokte eg møyre i vatnet og tilsette 1/2 dl sukker.  Eg moste dei med stavmiksar i staden for å gni dei gjennom ein sikt.  Avkjøl. Ta av ein fløtemugge med aprikoskrem til saus.

Legg 10 gelatinplater i bløyt i kaldt vatn i eit litermål.

Pisk 5 dl kremfløyte til mjuk krem.  Krem til fromasj skal vere mjukare enn til blautkake t.d.

Pisk eggedosis av 5 egg og 1/2 dl sukker.

Vri vatnet ut av gelatinplatene når dei har lagt i vatn ca 10 minutt.  Eg brukar å sette litermålet i vassbad og ta ca 1 ms kokande vatn frå vassbadet til å smelte gelatinen i.  Gelatinen rørte eg først inn i aprikosmosen.  Deretter brukte eg slikkepott og blanda inn krem og eggedosis forsiktig.  Dette vart to skåler fromasj.

Det eg var minst nøgd med, var pyntinga.  Det hadde vore nok med nokre hermetiske aprikosar.  Så kan ein settte muggen med aprikosmos ved sida av.

I kokeboka står det at fromasjen skal serverast til mandelkransar eller fløterullar.  Eg vil seie det slik, dei fleste småkaker høver til, men det trengst ikkje.

Smuldrepai med eple II

I dag laga eg dobbel porsjon smuldrepai i den store eldfaste forma. Her skal de få oppskrifta med steg for steg-bilde.
Til smuldredeigen brukte eg:
4 dl kveitemjøl
5 ms sukker
1 dl malne nøtter
150 g smør

Køyr i foodprosessoren til det vert ei grynete masse. Når smøret kjem frå kjøleskåpet, er det kaldt, så eg mol det først, og tok det att etter at eg hadde laga til epla. Då vart det lett ei grynete masse.

I forma:

1 kg eple

1 dl rosiner

1 dl sukker

Smuldre deigen over.

I dag steikte eg paien ved 225 grader i 25 minutt.

Servér med mjukpiska krem med litt ekte vaniljesukker i!

---

Som eg har skrive før, kan ein bruke anna frukt som pærer, fersken, nektarinar og/eller plommer. I staden for nøtter kan ein bruke mandlar eller havregryn. Kva trur de om å bruke demerarasukker over frukta?

Populære piker

Tidlegare laga vi tilslørte bondepiker i skåler slik at kvar elev kan ta så mykje han eller ho vil. Eg har ikkje rekna desserten som populær tidlegare. I dag tok vi fram stetteglasa og laga ein porsjon til kvar. Aldri har det vore ete så mykje "bondepiker" på mitt skulekjøken før!

For ordens skuld: De ser at bildet er frå kokeboka!

Tips: Vi knuser grove kavringar, såkalla skorper. Det smakar mykje betre enn om ein kjøper strøkavring.

Smuldrepai med eple

Her kjem oppskrifta som er grunnlaget for den eplepaien eg av og til har servert til dessert her. Eg bruker å doble oppskrifta til den store eldfaste forma mi. (Steg for steg oppskrift her)

Smuldredeig:
2 dl kveitemjøl
2-3 ms sukker
1/2 dl malte mandlar/nøtter
75 g smør

500 g eple, i bitar
1/2 dl sukker
(eg bruker litt rosiner i, det syg opp væske frå epla)

1. Bland alt til smuldredeigen i foodprosessoren.
Den skal bli grovknudrete.
Hakk ev. mandlane/nøttene i maskina først.
2. Legg eplebitane og ev. rosinene i forma.
Dryss på sukker og fordel deigen over.
3. Steik ved 225 grader ca. 25 minutt.

Server lunken med mjukpiska krem med litt ekte vaniljesukker i.

Denne smuldrepaien kan du variere med ulike frukttypar, gjerne i blanding, t.d. pærer, nektarinar, fersken og/eller plommer.

Hadde eg berre hatt eple i hus....
Journalisten flyttar til Førde i morgon, og dette er ein av hans favorittar.

p.s.
Ei lita presisering: Her må du spandere meierismør for å få den gode smaken.

Marengsbotn

Eg var ikkje heilt fornøgd med konsistensen på marengsbotnen eg laga før helga. Smaken var grei, men den vart litt klissete. I dag ville eg prøve på nytt.

Ha 4 dl sukker og 4 eggekvitar i ein bolle og pisk stivt.

Brei marengsmassen utover ei bakepapirkledd langpanne (steikebrett går bra).

Steik midt i omnen på 150 grader i ca ein time.

Denne marengbotnen vart sprø og fin. Då er det berre å dele han i to og fylle med krem, vaniljekrem, frukt og/eller bær etter smak. Slike botnar står seg godt.

I nokre oppskrifter står det at ein skal piske eggekvitane først og så ha i litt og litt sukker. Det går bra, men Kenwooden er så kraftig at det ikkje er nødvendig.

Populær dessert

Dette er eigentleg ei marengskake, men eg valde å lage den i ei form.

Eg starta med å lage ein marengsbotn i ei langpanne 30 x 40 cm. Då tok eg utgangspunt i ei pavlovaoppskrift og brukte 6 eggekvitar og 3 dl sukker. Ein annan gong vil eg ta utgangspunkt i sviskekaka (sjå til høgre) og bruke 4 eggekvitar og 4 dl sukker.

Slik laga eg kaka/desserten:

Legg lagvis, begynn nede:

marengsbotn

frosne bær t.d. rips eller skogbærblanding frå frysedisken

1 pk vaniljekrem (Piano)

krem

marengs

krem på toppen (Eg brukte litt meir enn ein pakke til saman)

bær til pynt? (Eg fann ferske bringebær i går, noko eg aldri har kjøpt før.)

Før nokon tek meg for plagiat; dette liknar veldig på mamma sin dessert med pikekyss!

Heimelaga is

Til i går laga eg heimelaga is av eggeplommene eg løyvde etter desserten. Til ei form på 1,8 liter brukte eg 5 eggeplommer. Eg tok utgangspunkt i denne oppskrifta.

I ein bolle piskar eg 5 dl kremfløyte halvstiv d.v.s litt mindre stiv enn til blautkake.
I ein annan bolle piskar eg skikkeleg stiv eggedosis av 5-6 eggeplommer, 5 ms sukker (her kan eg tenke meg å prøve med mindre) og 3-4 ts (ekte!) vaniljesukker.
Eg blandar krem og eggedosis forsiktig med slikkepott. Dette vert fin is. Eg rører aldri i isen. Etter mi erfaring går det heilt fint utan. Kenwooden piskar flott eggedosis.

Til isen serverte eg kirsebær. Avslørt? Desse glasa kosta mellom 20 og 25 (svenske!) kroner på Coop i Örebro.

Karamellpudding - steg for steg

I vår storfamilie er vi veldig glade i karamellpudding. Eg begynte å lage det for 15 år sidan, og lykkast frå første forsøk. Det er enkelt, og ein treng berre fire ingrediensar. Eg begynte med å følgje ei oppskrift med 6 dl mjølk. No har eg utarbeidd mi eiga med 1 liter mjølk i ei 2-litersform.

Set forma på ei så varm plate som muleg. Når forma er blitt varm, har du i 1 1/2 dl sukker. Lat det bli brunt. Ta det til side og kjøl litt ned før du har karamell opp etter kantane.

Visp lett saman 8 egg, 3 ms (1/2 dl) sukker og 1 1/2 ts vaniljesukker. Spe med 1 liter H-mjølk.

Sil blandinga i forma.

Set formene inn i omnen i vassbad. Det er lurt å ha i litt vatn først og så etterfylle. Det er greit å ha god tid. Då kan du sette puddingane i kald omn. Det ein vil unngå, er luftbobler i puddingen. Ved låg temperatur og lang steiking, kan det ikkje gå gale. I min omn tek det 4-5 timar med litt over 100 grader.

Du ser at puddingen er ferdig når det kjem små sprekker på toppen. Stikk gjerne ein kniv forsiktig ned i ei sprekke og sjekk at det ikkje tyt ut mjølk.

---

No er det berre å kjøle ned puddingen. I morgon skal vi kvelve han på eit fat.

Gele på 1-2-3

Anlen har ei meiningsmåling på bloggen sin om gele er berre for born. Til barneselskap lagar vi vanleg gele. Men til familieselskap er gele med jorbær ein slager. Eg lagar gele med halvparten kokande vatn og har oppi resten av vatnet pluss frosne jordbær etterpå. Denne metoden har vi brukt på skulekjøkenet også. Der har vi alltid "dårleg tid". Vaniljesaus synest eg er greitt å kjøpe ferdig i literkartong; godt, rimeleg og enkelt.

ps

Viss borna synest jorbæra er sure, kan dei ete geleen på botnen.

Fruktkompott

Når eg ein sjeldan gong skal lage fruktkompott, tek eg fram denne boka. Det er ei bok med skikkeleg norsk tradisjonsmat frå vår barndom. Typiske 70-talsrattar som terteskjell med fiskepudding og kabaret. Elles er der eige kapittel om safting og sylting.

Grunnen til at eg brukar denne oppskrifta på kompott, er at den er lite utspedd. Eg ser ingen grunn til å spe ut med mykje sukker og vatn.

5 dl vatn

4 ms sukker

1 pk svisker/aprikosar/fruktblanding

1 1/2 ms potetmjøl

1/2 dl vatn

1. Kok opp vatn og sukker.

2. Ha i frukt og kok til frukta er mør.

3. Rør ut potetmjølet i kaldt vatn. Ta panna til side og ha jamninga i.

4. Gje kompotten eit raskt oppkok.

5. Ha kompotten i ei skål og dryss litt sukker på toppen for å unngå snerk.

Barmen vil servere vaniljesaus til. Eg set fram mjølk og fløyte, slik at ein kan blande sjølv.

Kommentar: Etter mi meining kan ein kutte enno litt meir inn på sukkeret (2 1/2 ms?) og kanskje 1/2 dl meir vatn. Eg brukar alltid måleskeier, slik at 1 ms er 15 ml.

Sitronfromasj 2

I dag leita eg fram fromasjoppskriftene eg har brukt før. Vi plussa på ei ms sukker. Eg demonstrerte sitronfromasjen og sa at dei måtte ete opp sine eigne før dei fekk smake på min, elles gjekk min på lærarrommet. Deira to fromasjar vart fort oppetne, og også min gjekk med på høgkant. No står det att å sjå om fromasjen er like populær resten av veka.

Sitronfromasj

Eg lever av å lære andre å lage mat. Av og til må eg øve heime. Det vert t.d. ofte til at eg lagar ein fromasj i året. I fjor laga eg appelsinfromasj av blodappelsinar. Fargen vart ikkje så fin som eg hadde tenkt.
I den nye kokeboka er der berre ein fromasj, sitronfromasj. I dag laga eg ei stor skål av ein kartong fløyte. Eg laga den i Kenwoodmaskina, så det vart ein meir enn luftig nok fromasj. Dessutan synest eg den vart noko smaklaus utan sitronskal. I morgon får eg sjekke den gamle oppskrifta. Eg har ei kjensle av at vi brukte 2 ms sukker. Signe og eg var samde om at det er liten vits i å lage fromasjane så sure at ingen et dei. Ei anna forklaring kan vere at sitronsafta ikkje var så sur. Er den på flaske surare? Ikkje veit eg. Eg veit berre at slike flasker vert fort tome på skulekjøkenet viss rette karane er der. Så eg har kjøpt inn sitronar!

Sidan eg hadde skitna til to bollar, laga eg brøddeig i begge. I dei store formene laga eg halve brød. Når ein frys brød, er det greitt å av og til ta opp berre eit halvt. Eg trur tipset kjem frå Eidabesta.

P.s.
Eg serverte ein boks fruktcoctail til sitronfromasjen.

Sjokoladepudding

1 dl maisenna

1 dl sukker

3/4 dl kakao

-

1 l mjølk

-

2 ts vaniljesukker

-

1. Bland saman det tørre før du rører inn mjølka.

2. Kok opp medan du rører.

3. Lat puddingen koke eit par minutt før du tek panna til side

og har i vaniljesukker.

-

Server med vaniljesaus - gjerne Piano.

-

I går ringte ein kollega. Ho skulle ha tanteborn på besøk og fann ikkje oppskrifta på sjokoladepudding. I dag fekk eg lyst å lage sjokoladepudding sjølv.

-

Til sjokoladepudding passar det godt med gele med jordbær/bringebær, gjerne lett til dei som ikkje skal ha sukker/kaloriar. Hermetisk frukt/fruktsalat med krem passar også godt på dette dessertbordet. Når ein er mange samla, kan ein like godt ha to-tre ulike dessertar i staden for å ha mykje av ein sort.

Solskinspudding

Eg laga dobbel porsjon av denne puddingen til ørstingane skulle kome. I staden for fløyte og mjølk, brukte eg H-mjølk. Elles så brukte eg framgangsmåten som til karamellpudding, men det tok si tid! Metallformer leiar nok mykje betre varme enn keramikk! Det same har eg erfart med silikonformer og baking. Ein annan gong skrur eg opp varmen til 125 grader.

Men smaken var frisk og god! Absolutt å anbefale!