Mitt søskenbarn Mowgli

Så var endeleg dagen komen! Endeleg sat eg der på Chat Noir og såg søskenbarnet mitt slenge seg inn på scena i ei liane, som om det var det mest naturlege i verda. Så til stades, så flink og naturleg. Han sang, klatra, dansa og var Mowgli på ein måte som kunne gje inntrykk av at han aldri har gjort noko anna ;)

(Bildet er lånt frå NRK)

Ingen tvil om at han elskar å stå på scena nei! Trykk på linken, og sjå sjølv :) Det er muleg hormona mine spelte ei rolle, men eg var iallfall rørt til tårar mange gonger i løpet av forestillinga! (Det var nok at han kom inn på scena...) Også har han jo vorte ei verdsvant stjerne; han blunka til og med til Ladeprinsessa i det han gjekk av scena etter applausen ;) Stor stas - både for ho og tanta trur eg :)

Nye sjansar for dykk alle å sjå han i aksjon 2., 12., 13., 18. og 23. mars, samt 2. og 10. april. Inhabil eller ikkje - eg anbefalar! (Men det er ikkje sikkert at du er like heldig som meg og får komme backstage og helse på Sturla Berg Johansen! Det er ikkje sikkert du får ete middag med sjølvaste Mowgli etterpå heller :P )

Meir

Eg vart visst ikkje ferdig med reklamen i går eg. For sjå kva eg fekk i gåve frå venninnebesøket!
Inne på nettsidene til Snella og Petronella kan du finne knappar, mansjettknappar, øyredobbar som desse og diverse anna snadder med tekst eller sjarmerande motiv på. Eg let meg begeistre, og har vel igrunn sett meg ut nokre knappar til Lille Trille ;)

I haust oppdaga Mannen og eg ein ny butikk i sentrum. Ein godbit - i ordets rette forstand ;)
Litt dyrt kanskje, men o'nytelse! Dersom du er på facebook kan du følgje med Sjokoladebutikken der. Dei har meir enn berre sjokkis også. Kaffe, te, lakris... ja, ei heil mengde freistingar...

Til slutt litt reklame for våren. Eg tek på meg mine nye solstråleøyredobbar og beundrar tulipanane på spisebordet i vissheit om at sola varmar meir og meir dag for dag, at ettermiddagene blir stadig lysare, og at ei ferieveke innehaldande både Jungelboken på Chat Noir, Ski-VM og tur til Krakow nærmar seg med stormskritt :)

Langhelg :)

Frå torsdag ettermiddag til i kveld har eg hatt kjempekoseleg venninnebesøk frå hovudstaden! I den anledning tok eg fri i går, fredag, slik at vi skulle få meir tid saman. Og hyggelege skravledagar har vi jammen hatt! :) Av ein eller annan tåpeleg grunn har eg ikkje tatt eit einaste bilete, og det er jo ikkje noko anna enn for dårleg! Heldigvis har besøket delt nokre av sine med meg. Mellom anna dette frå byturen vår i går:
Vi lurer veldig på kva som er historia bak her, så viss du veit noko må du gjerne skrike ut!

Det er ikkje hemmeleg at eg ikkje er så ofte i byen, men i går hadde vi altså ei flott runde med besøk innom ymse butikkar eg veit eg likar men som eg alt for sjeldan er innom. Det vart handla og henta inspirasjon både her og der, mellom anna på Black&White, Sukker, og ikkje minst Pryd der besøket fann ei utroleg nydeleg og passande jakke frå Nordlys. (Sånn, det var dagens reklame...) I dag var vi innom Rockheim også, og innimellom alt dette har vi fylt minutt og timar med skravling, mat og masse kvalitetstid :) Tusen hjarteleg takk for besøket kjære venn, og veldig velkommen tilbake!

Mykjy fryd og mykjy varme

Nokon ristar småsjokkert på hovudet over at vi har investert i tørketrommel. "Ikkje akkurat strømbesparande," seier dei. Dei har kanskje rett. Men i dag kunne eg brette handklea og legge dei i skapet med ein gong, og tørketrommelen (som er plassert midt i leiligheita) varmar godt. Dermed får dei termostatstyrte panelomnane kvilt seg litt.
Den vordande mor kosar seg dessutan med tanken på at Lille Trille etterkvart kan trille og kravle rundt i ein bolig utan klesstativ i alle rom til ei kvar tid! Og den koselege tanken skal verte akkompagnert av nybakt brød :)
Når eg berre får vaska badet i morgon er eg klar for storfint besøk til helga. Gjett om eg gler meg!

Sånn halvveis

Årets hyttetur på Venabygdsfjellet er vel overstått. Eller altså, litt uvel må ein vel rekne med av og til. Litt sjukdom både blant to- og firbeinte (der sistnevnte faktisk endte i dødsfall...) og biltrøbbel (som gjorde at heimreisa var eit par timar forsinka, at vi ikkje turde å stoppe motoren på veg heim, at vi frykta ei skyhøg verkstadrekning og at humøret vart litt deretter) er sånt ein ikkje kan gjere så mykje med. MEN vi har da hatt det fint likevel!
Veret blir berre flottare og flottare for kvart år vi er der oppe, så ikkje veit eg kvar det skal ende! 17 minusgrader er likevel litt for kaldt for skitur for ei forkjøla frue, så eg heldt meg til kortare fotturar og hyttekos denne gongen.Mellom veterinærturar og sjukepleie fekk våre hundevenner også tid til eit par turar med flokken sin. Det ser jammen ikkje så verst ut!Mannen fekk seg eit par skiturar, og det gjorde det tredje paret i gjengen også. Dei har eg dessverre ikkje turbilde av, men Mannen testa ut sine kunstneriske ferdigheiter med kameraet innandørs.
Tja... Eg har vel sett både betre og dårlegare bilete... Men modellane er bra iallfall :) Og det var omgjevnadane også.
Så om helsa og bilen og humøret og slikt var sånn halvveis, er menneska og naturen heilveis! ;)

Forresten er eg også halvveis no. Halvgått svangerskap i går, på sjølvaste morsdagen :P
Tida går fort, og eg innser at det er diverse som skal ordnast. I dag kom iallfall tørketrommelen på plass, så slepp vi å ha tørkestativ i alle rom i all framtid ;)
Og for dei som lurer; Jepsi har hatt det fint på ferie, og vi slapp den frykta verkstadrekninga. God alle-hjerters-dag til dykk alle! :)

Vekene flyg avgarde!

Eit kjapt blogginnlegg mellom slaga! Det er mange som spør etter meg, og det er jo kjekt :) Kvifor det ikkje har skjedd noko her på ein månads tid har eg inga unnskyldning for. Eg er i fin form (bortsett frå forkjølelsen eg har akkurat no), og det har skjedd mykje. Urframføring med Aurum i Nidarosdomen, strikkeframgang, tett avløp på badet, veksande mage og det eine med det sjette!
Her er fruen 19 veker på veg, og har for få dagar sidan vore på ultralyd og konstatert at alt står bra til med Lille Trille :) Magen tek til å visest såpass at andre enn Mannen og eg sjølv ser han, og det er jo kjempestas!
Og ja, frua strikkar. Akkurat no strikkar eg eit nytt par kattesokkar, som ei venninne fekk "gåvekort" på frå meg til jul ;) Sjølv fekk eg alpakkagarn i denne nydelege farga frå ei anna venninne, og noko av det har vorte til denne lua frå Garnstudio. Stilig ja? Den er kanskje litt romsleg, men vi får sjå kva som skjer etter ein vask ;)
Eg veit ikkje om eg kan seie at babykledeproduksjonen er i gang eigentleg, for denne vesten var i utgangspunktet tenkt til sonen til ei venninne... Tingen er at nevnte son voks fortare enn eg strikka... No har eg berre att å sy i knappar på skuldrane. Fadderbarnet vårt på Sunnmøre fekk ein lik ein i dåpsgåve. Så gjenstår det å sjå om eg beheld denne sjølv eller gjev han frå meg!

Kva meir? Jo, sidan eg nevnte tett avløp på badet... Mannen trudde eg nedkom i badekaret då eg for nokre veker sidan sette i eit skrik som skremte han opp frå sofaen og ut på badet. Der fossa vatn opp frå sluket etter at eg tok proppa ut frå badekaret... Heldigvis var det ikkje verre enn at vi fekk fiksa det på eiga hand! Og når eg seier vi så meiner eg naturlegvis han!
Sjå på denne herlegheita han fiska opp! Tusen takk! Kva skulle eg ha gjort utan deg!? Sannsynlegvis kasta opp utover heile badegolvet :P (PS: Bildet er arrangert, og alt mageinnhald heldt seg der det skal vere!)

Kva meir kan eg seie? Kvardagen ruslar og går nokonlunde som normalt. I helga skal vi på vår etterkvart så tradisjonsrike vinterhyttetur med gode vener, og i den anledning skal Ladeprinsessa vere barnevakt til Jepsi. Det trur eg ho klarar med glans :) Og for dei som lurer; Jepsi er fortsatt ein liten sjarmør, sjølv om alderen har teke vekk ein god del av sjarmørstripene på hovudet. Eg trur nesten han gler seg litt til å bli storebror også!
Også skal eg altså prøve å ikkje la det gå like lang tid til neste oppdatering! God helg! :)