Ja då har eg gleda av å gratulere kammerkoret Aurum, inkludert meg sjølv, med å ha henta heim tre sigrar i Praha Cantat i helga!
Dag 1: Natt til torsdag gjekk flybussen til Værnes frå Lerkendal klokka 04.00. Fytti grisen. Det var mange trøtte fjes som kom på bussen i løpet av turen til flyplassen (unntatt Marianne som av ein eller annan grunn kom med neste flybuss...kremt...), men alle lyste opp når kvar og ein fekk reisepose av turgeneral Kristine! Posen inneheldt ei heimelaga brosjyre med helsingar frå fans, fakta om Praha, quiz, dikt m.m., ein kortstokk, to heimelaga kjeks, eit eple, merkelapp til bagasje og ein penn. Alle hadde hugsa passa sine, og 06.15 var alle komne seg inn på flyet til Amsterdam. Der venta vi nokre timar før vi tok fly vidare til Praha. Der vart vi møtte av Sabra-Rolf og den lokale guiden Petra, som begge geleida oss stødig gjennom oppholdet i den tsjekkiske hovudstaden. Etter ei kort øvingsøkt og ein hotellmiddag trur eg alle tok tidleg kveld etter ein lang reisedag.
Dag 2: Vi var relativt tidleg på føtene på fredag også. Dette var den store konkurransedagen for vår del. Aller først var vi på opningskonserten til festivalen, der eit tsjekkisk ungdomskor song stykke frå alle verdskrokar. Frå Noreg hadde dei vald ut Solveigs song, og hadde ein meget lovande solist i front der. Stor jubel frå Aurum naturlegvis. Vi returnerte til hotellet for å legge om til bunad, noko som gav oss mykje merksemd både på trikken, i byen og på festivalen. Etter oppvarming klistra vi på oss konkurranse- og smigerglisa våre, entra scena, og leverte ei god framføring til entusiastisk applaus mellom anna frå dommarane. Mange andre koristar som hadde høyrt oss gav oss kompliment i fleng, og vi smilte, nikka og takka, før vi i fellesskap drog ut på restaurant. Restaurantbesøkt vil eg ikkje gå særleg inn på med tanke på at det kan vekke negative minne og aggresjon hos enkelte av Aurumittane... Lat oss berre seie at maten kunne ha vore god dersom vi var færre slik at alle kunne ha fått varm (og riktig) mat... Men stemninga var relativt god med tanke på at vi var ferdige med konkurransen, og målet for turen dermed var overstått. Enn så lenge.
Dag 3: Dei fleste valde å sove litt frampå på laurdag, men brorparten av koret blei likevel med Petra på ei guiderunde på castleområdet og ned til Karlsbrua før vi delte oss og vandra i gamlebyen og shoppa litt. Nydeleg haustver sette prikken over i-en, og dagen blei bra. Personleg reiser eg gjerne tilbake for å sjå meir av byen, men denne gongen var det kor som stod i fokus. Etter ein bedre middag enn kvelden før var det igjen på tide å returnere til hotellet og hoppe i bunaden. Galla stod på programmet, og blide og glade entra vi nok ein gong salen der vi kvelden før leverte sangprestasjonen vår. Vi fekk med oss premieutdelinga for diverse andre klassar. Frøydis og Karl sat på scena som representantar for Aurum. Så kom dei då som perler på ei snor; prisane våre.
1: Beste programsamansetjing, og dermed ein krystallvase.
2: Beste tolkning av pliktstykke, og dermed ein krystallvase til.
3: Toppen av kransekaka - beste kor i konkurransen, og dermed ein pokal og 500 euro :) Plutseleg stod jubelen i taket, tårane pipla fram, og rekneskapen vår gjekk i pluss. Gråtkvalte skulle vi opp på scena og synge to stykke, men klump i halsen og litt vin i toppen hindrar ikkje Aurum frå å hauste applaus frå "heile Europa" :) Vi fekk til og med invitasjon til Frankfurt neste år, så får vi sjå kva vi gjer med det. Dersom det skulle vere nokon tvil kan eg jo nemne at vi sjølvsagt vann festen også ;)
Lat meg få gjenta gratulasjonen til heile Aurum, takke for turen, og rope høgt hurra! Her følgjer nokre bilete.