Sommer på jorda :)

Endeleg fekk vi nokre sommardagar i Trondheim også! Det gjer så godt å få litt sollys :) Med besøk både herfrå og derfrå er det kjekt å kunne bruke balkongen og Kyvannet også!
Denne veka har vi hatt besøk av minstebror til Mannen, og av mine foreldre. Veldig kjekt for meg når Mannen og onkel lagar middag medan eg ammar, og når mormor og morfar byssar medan eg heng opp klesvaska ;)
Jammen har vi det ganske så bra alle mann her i toppetasjen. Så blir det jo litt spanande for den nybakte mor når Mannen startar på jobb att over helga. Då kan ingen smøre brødskiver til meg når eg har opna meieriet for eksempel! :P Men vi skal nok få det til saman eg og Lille Trille. (Snakk om upassande kallenamn forresten... Han er ikkje akkurat nokon Trille, sjølv om han legg på seg som berre det! Til vår og helsesøster si store begeistring :)

Her på fanget til fysiotante :)

10 dagar og i vekseform!

I dag er det runddag i Toppetasjen! Vi feira med ein vektkontroll på sjukehuset, og jammen har vi vore flinke med amming og diing! Allereie passert fødselsvekta :) Det har vi feira - med meir mat ;) Mette og nøgde tok vi oss ein prat med farmor og farfar på Skype, i tøffe nye klede vi fekk frå Ladeprinsessa då ho var her på barselbesøk på onsdag :)

Det er ikkje så lett å slenge seg med på fakkeltog og slikt enno merkar eg, men vi har tent lys heime. Det blir sagt så mykje fint og klokt i desse dagar, og blant mine favorittsitat finn du det ei AUF-jente sa i intervju med CNN:

Når éin mann kan vise så mykje hat, tenk då kor mykje kjærleik vi kan vise saman!

I tillegg til å minnast ofra og støtte dei pårørande frå dei grufulle handlingane på fredag, har eg i dag eit personleg behov for å minnast ei god venninne og nabojente frå oppveksten. Ho ville ha fylt 30 år i dag viss ho hadde vore her fortsatt. Du lever fortsatt i aller høgste grad i minna våre kjære deg! Gratulerer med dagen!

Vi er heime!

Den 15. juli kom Lille Trille styrtande :) Ein liten, herleg, nydeleg krabat som vi er heilt betatt av og utruleg glade i! Vi fekk god hjelp av flinke folk i to ekstra dagar på barselavdelinga (tusen takk!), men på onsdag fekk vi endeleg lov til å ta med den skjønne guten vår heim til Toppetasjen :) Vi kosar oss i kvarandre sitt selskap her heime, med amming, soving, bæsjing, besøk av slekt og vener, og massevis av kos.
Så vi har det bra, midt oppi tragedien som har råka landet vårt i desse dagar. Vi må halde fast ved Kongen sin bodskap i talen sin:

Jeg holder fast ved troen på at friheten er sterkere enn frykten.
Jeg holder fast ved troen på et åpent norsk demokrati og samfunnsliv.
Jeg holder fast ved troen på våre muligheter til å leve fritt og trygt i vårt eget land.

Eg har enno ikkje funne noko god løysing på korleis eg skal begrense bloggtilgangen (tips vert teke imot med takk!), så enn så lenge veljer eg å vere litt restriktiv med tanke på kva eg legg ut.

Redebygging

Eg tek til å forstå kva min kjære fysiokollega meinte med "berre vent til du kjem i redebyggingsfasen!" No er eg der! I dag har eg brukt masse tid på å sortere alle barnekleda vi har fått frå dei gode hjelparane etter størrelse, eg har strikka på babyteppet, vi har gått tur i området eg ser for meg blir hyppig brukt til komande trilleturar, og - vi har kjøpt vogn! Endeleg har Lille Trille ein plass å sove når han finn vegen ut :) Magekjensla mi seier at eg er nøgd med valet. Vi endte opp med ei Simo kombivogn, og valde å spare masse pengar ved å kjøpe ei brukt ei. Den er brukt i litt over eitt år, og vi kjøpte den til ca halv pris. Då fekk vi med både stelleveske, diverse tilbehør og ei andedundyne :) Fin ja?
Når det gjeld farga så er det det nedste bildet som stemmer med røynda. Utelyset har nok spelt meg eit puss på det øvste. Vil du vere med oss på trilletur?

Nasjonaldagsfeiring hos svigers

Det har eg faktisk ikkje gjort før, så det var på tide! Det regna godt frå morgonen av, men akkurat i det vi kom til byen for å sjå på barnetoget kom sola og skinte på min skatt ;)
Og på endå ein skatt også, for den saks skyld!
Og deretter vart dagen så fin at vi til og med kunne ete grillmaten utandørs! Svigers diska opp med mange sortar, så både tobeinte og firbeinte gjestar kunne kose seg lenge og vel. Tobeinte og firbeinte fekk trimma litt i hagen også, så den ekstra pølsebiten gjorde ikkje store skaden trur eg ;)
Ei fin langhelg på austlandet vart det på oss, før vi i går ettermiddag nok ein gong vende nasen heimover. No er det 15 arbeidsdagar att til frua går ut i permisjon... Kva kan eg seie? Hipp hipp hurra!

Påska 2011

Jada, eg veit eg heng etter, men no har eg fleire innlegg i hjernen altså! Eg vel å ta ting i kronologisk rekkefølge - systematisk som eg er ;)

Det vart Romsdalspåske i år, saman med heile familien på mi side. Med tolv stykk i stort og smått (utanom Jepsi og Lille Trille) under samme tak, vart både aktivitetsnivå og lydnivå eit litt anna enn vi er vande med her i Toppetasjen... Det er ikkje ofte at alle saman er på heimtraktene til same tid, så det er jo mest koseleg trass alt :) Med det véret vi fekk var det jo muleg å vere ute også - som seg hør og bør i påsketider! Ikkje alle er så heldige å ha besteforeldre med eigen gapahuk og bålplass berre ein liten spasertur ut frå huset, men det har denne gjengen. Med pølser og pinnebrøddeig i sekken kunne to prinsesser og ein keisar i fri utfoldelse kose seg i sauebeitet saman med foreldre, besteforeldre, tanter og onklar denne flotte aprildagen.
Prinsen sov seg gjennom heile utflukta, og kosa seg heller godt utkvilt med den litt skumle men like fullt kule onkelen innandørs etterpå.
For vi var jo innandørs også altså. Mat, brettspel, besøk av slektningar vi sjeldan ser, påskequiz og krimlitteratur er noko av det vi brukte fridagane på. Og ein tur til fadderbarnet vårt i Ålesund; ein stor liten tøffing det også :)
2. påskedag kunne vi vende nasen nordover att, fylt med ein solid dose familiesamver, ny skiboks på bilen, og dette skattkammeret i bagasjerommet:
Og DET skal du få ein nærare kikk på i neste innlegg ;) Sekken vart nemleg nøye gjennomgått i kveld, etter ein nydeleg 1.mai-dag på balkongen.

Glimt frå Krakow

Vi har vore på vinterferie! Vi fann ut at dette var tida for å besøke studentsvogeren min i Krakow, sidan vi truleg har anna å henge fingrane i til sommaren. Eit godt val, for vi hadde fine (om enn litt vindfulle) dagar i denne flotte byen sør i Polen. Eg deler nokre glimt her.
Dragen Smok står fortsatt framom hola si og sprutar eld for begeistra turistar med (u)jamne mellomrom. Han er nok litt bitter for at Wavel vart bygd akkurat der han budde vil eg tru, men personleg syns eg det er greit ;)
Wavel rommar mellom anna denne katedralen, som Krakow sin store stoltheit (den førre paven) passar godt på. Gjennomført stil er vel ikkje stikkordet for dette byggverket, men det i seg sjølv har jo sin sjarm. Det er mykje historie i veggane!
Vi besøkte saltgruvene litt utanfor Krakow også. Med tre timar guiding, 4 km vandring og 800 trappetrinn fekk vi sjå 1% av gruvene... Dei har eksistert i mange mange hundre år, og arbeidet her var forbunde med så mykje fare at dei som jobba der bygde kapell overalt for å ha stader å be. Dette er det største og flottaste, og så vidt eg forstod blir det halde gudstenester, konsertar etc her innimellom. Noko for Kammerkoret Aurum? ;)
Som du ser er mykje av dekoren laga av salt og saltkrystallar. Det er naturlegvis mykje salt i tak, veggar og golv også, og guiden vår sa det var inkludert i billettprisen å smake/sleike på veggane. Skulpturane var det ikkje lov å sleike på ;) Gruvene blir også brukt helsefremmande for til dømes astmatikarar og allergikarar pga klimaet i gruvegangane. Guiden bad oss stadig om å puste djupt og godt for å bli godt konservert, og hevda at ho sjølv hadde vore guide her i 300 år ;)
Vi vanka sjølvsagt ein god del i gamlebyen, Rynek, med tøyhallen midt på torget. Gamlebyen i Krakow vart ikkje bomba under krigen, så mykje er bevart slik det var. Enno kunne vi nok brukt timar og dagar på å utforske alle smågatene rundt i gamlebyen, men ein kan ikkje rekke alt på ein liten vinterferie. Eg syns vi rakk over mykje (eg har fortsatt nokre hundre bilete på harddisken), og noko må vi jo spare til neste besøk også! Eg kan iallfall anbefale Krakow. Det er til dømes ikkje overalt ein reiser ein får ete treretters middag med god drikke for under 700 kroner for tre personar til saman på landets finaste restaurant! Kjekt for oss at vi har nokon vi må besøke der dei neste åra ;)

Mitt søskenbarn Mowgli

Så var endeleg dagen komen! Endeleg sat eg der på Chat Noir og såg søskenbarnet mitt slenge seg inn på scena i ei liane, som om det var det mest naturlege i verda. Så til stades, så flink og naturleg. Han sang, klatra, dansa og var Mowgli på ein måte som kunne gje inntrykk av at han aldri har gjort noko anna ;)

(Bildet er lånt frå NRK)

Ingen tvil om at han elskar å stå på scena nei! Trykk på linken, og sjå sjølv :) Det er muleg hormona mine spelte ei rolle, men eg var iallfall rørt til tårar mange gonger i løpet av forestillinga! (Det var nok at han kom inn på scena...) Også har han jo vorte ei verdsvant stjerne; han blunka til og med til Ladeprinsessa i det han gjekk av scena etter applausen ;) Stor stas - både for ho og tanta trur eg :)

Nye sjansar for dykk alle å sjå han i aksjon 2., 12., 13., 18. og 23. mars, samt 2. og 10. april. Inhabil eller ikkje - eg anbefalar! (Men det er ikkje sikkert at du er like heldig som meg og får komme backstage og helse på Sturla Berg Johansen! Det er ikkje sikkert du får ete middag med sjølvaste Mowgli etterpå heller :P )

Sånn halvveis

Årets hyttetur på Venabygdsfjellet er vel overstått. Eller altså, litt uvel må ein vel rekne med av og til. Litt sjukdom både blant to- og firbeinte (der sistnevnte faktisk endte i dødsfall...) og biltrøbbel (som gjorde at heimreisa var eit par timar forsinka, at vi ikkje turde å stoppe motoren på veg heim, at vi frykta ei skyhøg verkstadrekning og at humøret vart litt deretter) er sånt ein ikkje kan gjere så mykje med. MEN vi har da hatt det fint likevel!
Veret blir berre flottare og flottare for kvart år vi er der oppe, så ikkje veit eg kvar det skal ende! 17 minusgrader er likevel litt for kaldt for skitur for ei forkjøla frue, så eg heldt meg til kortare fotturar og hyttekos denne gongen.Mellom veterinærturar og sjukepleie fekk våre hundevenner også tid til eit par turar med flokken sin. Det ser jammen ikkje så verst ut!Mannen fekk seg eit par skiturar, og det gjorde det tredje paret i gjengen også. Dei har eg dessverre ikkje turbilde av, men Mannen testa ut sine kunstneriske ferdigheiter med kameraet innandørs.
Tja... Eg har vel sett både betre og dårlegare bilete... Men modellane er bra iallfall :) Og det var omgjevnadane også.
Så om helsa og bilen og humøret og slikt var sånn halvveis, er menneska og naturen heilveis! ;)

Forresten er eg også halvveis no. Halvgått svangerskap i går, på sjølvaste morsdagen :P
Tida går fort, og eg innser at det er diverse som skal ordnast. I dag kom iallfall tørketrommelen på plass, så slepp vi å ha tørkestativ i alle rom i all framtid ;)
Og for dei som lurer; Jepsi har hatt det fint på ferie, og vi slapp den frykta verkstadrekninga. God alle-hjerters-dag til dykk alle! :)

Vekene flyg avgarde!

Eit kjapt blogginnlegg mellom slaga! Det er mange som spør etter meg, og det er jo kjekt :) Kvifor det ikkje har skjedd noko her på ein månads tid har eg inga unnskyldning for. Eg er i fin form (bortsett frå forkjølelsen eg har akkurat no), og det har skjedd mykje. Urframføring med Aurum i Nidarosdomen, strikkeframgang, tett avløp på badet, veksande mage og det eine med det sjette!
Her er fruen 19 veker på veg, og har for få dagar sidan vore på ultralyd og konstatert at alt står bra til med Lille Trille :) Magen tek til å visest såpass at andre enn Mannen og eg sjølv ser han, og det er jo kjempestas!
Og ja, frua strikkar. Akkurat no strikkar eg eit nytt par kattesokkar, som ei venninne fekk "gåvekort" på frå meg til jul ;) Sjølv fekk eg alpakkagarn i denne nydelege farga frå ei anna venninne, og noko av det har vorte til denne lua frå Garnstudio. Stilig ja? Den er kanskje litt romsleg, men vi får sjå kva som skjer etter ein vask ;)
Eg veit ikkje om eg kan seie at babykledeproduksjonen er i gang eigentleg, for denne vesten var i utgangspunktet tenkt til sonen til ei venninne... Tingen er at nevnte son voks fortare enn eg strikka... No har eg berre att å sy i knappar på skuldrane. Fadderbarnet vårt på Sunnmøre fekk ein lik ein i dåpsgåve. Så gjenstår det å sjå om eg beheld denne sjølv eller gjev han frå meg!

Kva meir? Jo, sidan eg nevnte tett avløp på badet... Mannen trudde eg nedkom i badekaret då eg for nokre veker sidan sette i eit skrik som skremte han opp frå sofaen og ut på badet. Der fossa vatn opp frå sluket etter at eg tok proppa ut frå badekaret... Heldigvis var det ikkje verre enn at vi fekk fiksa det på eiga hand! Og når eg seier vi så meiner eg naturlegvis han!
Sjå på denne herlegheita han fiska opp! Tusen takk! Kva skulle eg ha gjort utan deg!? Sannsynlegvis kasta opp utover heile badegolvet :P (PS: Bildet er arrangert, og alt mageinnhald heldt seg der det skal vere!)

Kva meir kan eg seie? Kvardagen ruslar og går nokonlunde som normalt. I helga skal vi på vår etterkvart så tradisjonsrike vinterhyttetur med gode vener, og i den anledning skal Ladeprinsessa vere barnevakt til Jepsi. Det trur eg ho klarar med glans :) Og for dei som lurer; Jepsi er fortsatt ein liten sjarmør, sjølv om alderen har teke vekk ein god del av sjarmørstripene på hovudet. Eg trur nesten han gler seg litt til å bli storebror også!
Også skal eg altså prøve å ikkje la det gå like lang tid til neste oppdatering! God helg! :)

Det kjem, det kjem!

Som nevnt i kavalkaden er både fotoarkivet og bloggarkivet tynt dei siste månadane av det siste året, og eg skuldar mellom anna på variabel helsetilstand. Mangel på overskot er kanskje eit betre uttrykk. Men noko har eg då gjort på gode dagar :) Desse sokkane har vore i bruk eit par månader no, og har hausta mykje skryt rundt omkring.
Kva er det som er så fantastiske med desse, spør du kanskje. Blå og kvite striper er vel ikkje så spesielt? Nei ikkje i utgangspunktet, men det som fasinerte meg, og dei som har skrytt av dei, var dette:
Ein kattepus med lang krøllete hale :) Alice's illusion socks er strikka i ein teknikk som gjer at du ser mønsteret kun frå enkelte vinklar, og det var ikkje vanskeleg å få til heller :) Oppskrifta finn du her - på engelsk.

Og viss du vart bekymra for helsetilstanden og energinivået mitt kan du berre slutte med det altså, for det kjem seg no, og legen har presisert at dette ikkje er ein sjukdom ;)
Men det spørs om strikkeprodukta framover kjem til å ha meir fokus på h*n som kjem i juli ;)

Tante Ragnli?

Eg veit at tante, altså eg, har hatt kjekke dagar på besøk i Votloheimen saman med tre søte tantebarn og foreldra deira.
Eg trur prinsesse Gullhår syns det var koseleg at tante kom på besøk og vart med på Putti Plutti Pot, adventsfest, Y-klubb, pepparkakehuspynting, leksearbeid, lesing og diverse. Og eg trur keisaren elskar tante Ragnli (altså tante Ingeborg, altså meg), og at ho var med på pusling, lesing, bursdagsfest i barnehagen, å sjå Ole-Brum-film og diverse. Og eg trur prinsen, som er 9 månader gamal, har lært å seie tante. "Th-th" høyrest iallfall ut som tante i mine øyre ;) Det er uansett heilt sikkert at han seier "teeeeei" når tante har sagt "tit-tei" først :)
Og at svoger syns det var artig å servere smalahove til gjesten er eg heilt sikker på. Godt var det også, sjølv om det var litt arbeid å finne kjøtet ;)

Takk til alle på Votloheimen for denne gong :)

Tante brillefin

Oversøster med familie er i byen! Dei campar hos storebror, men har vore innom her eit par gonger også. Det er veldig kjekt å vere tante altså, særleg når dei er så høflege og behjelpelege. Skulejenta hjelper gjerne til på kjøkkenet til dømes, og då kjem 2-åringen også. "Kan eg bære? Tusen takk!"

Tante med prinsessa og prinsen.
Keisaren ville heller sjå på gamle bilete av mamma og onkel enn å bli tatt bilete av sjølv...
...men minsteprinsen stiller velvillig opp :)
Prinsesse Gullhår også. Og gliset er som det skal vere på ei ekte skulejente!

Slenger med eit bilete av meg med nye briller til slutt... Brukte lang tid på å bestemme meg, men trur eg er sånn passe fornøgd med valet. Kva syns du?
Ser ganske intellektuell ut her? ;) Burde vel ha hatt dei på då eg heldt innlegg på konferanse om psykisk helsearbeid tidlegare i veka - berre for å framheve fagleg styrke ;P