Eg fall for freistinga;)

Eg syns dette hjartet passa så fint utanfor døra mi:) No gler eg meg til å handle inn blomster til krukkene som brukar å stå utanfor, men kanskje er det berre påskeliljer som overlever enno... Lilla og gult er ikkje så verst ilag!

Dugnad!

Det skal vere noko heilnorsk over dugnadskonseptet. Eg er ikkje sikker på om det er berre her i landet vi har ein ide om at det er ok å hjelpe kvarandre.

Systra mi er i innspurten av husbygginga, og no er det kun kort tid att til ho kan ta med seg mannen og veslejenta til det nye huset. Men fyrst må det vaskast ein god del... Hjelpe meg, så mykje støv det er i slike nybygg! Vi var der nokre timar, og fekk fjerna ein god del av støvet:) Det er ikkje tomt, men det er i alle fall nokre rom som er ok! Huset vert stilig, og eg ser fram til å kome på besøk:)

Odin, som er ein diiiger riesenscnauzer, har tenkt å prøve å vere sjef i huset. Men han klarer det nok ikkje;) Han kan få vere sjef over nokre kvadratmeter under trappa...

Mitt fyrste strikka møbel:)

Familien vekslar mellom å smile overberande og le rått. I alle fall nokre av dei... Men no har eg altså strikka ein puff, også kalla Puff Daddy. Oppskrifta fann eg hos Pickles.com og sidan dei meir eller mindre anbefalte å bruke akryl eller bomull, gjorde eg det. Eg brukte det utgåtte garnet Fiesta, som er ei blanding av bomull og akryl. Puffen skal strikkast med tre trådar på pinne 15:) Mest som kosteskaft. Sidan garnet mitt vart henta i ei restekasse, hadde eg ikkje 18 nøste. Dermed brukte eg ein tråd Lerke i ca samme raudfarge, og vart veldig godt fornøgd med det. Då vart det litt melert.


Bilda er tekne med den nye mobilen min! Ein lekker blank tingest, Nokia 6700 Classic. Dessverre er ikkje fargen på puffen heilt korrekt, men det skal ein kanskje ikkje kreve av eit mobilkamera? Eg må nok teste det litt meir etterkvart. Fargen er i alle fall ganske fin, ganske mørk raud. Og den passar flott som fargeklatt i stova mi, saman med mørkraude gardiner og bilete. Nesten så det kan verke litt gjennomført;)

Det ser ut som Musikanten set pris på den nye dingsen på golvet? Han likar stort sett det meste som er mjukt å ligge på... Men kven gjer vel ikkje det?

26 grader ute og 24 grader i kjøleskapet...

Herlig! På den varmaste dagen hittil i sommar får kjølehjørnet feber. Det jobbar for fullt, men klarer ikkje å kjøle. Dermed måtte eg springe tulling og ringe fleire instansar før eg fekk kontakt med ein reperatørmann. Han ville ikkje kome før han hadde snakka med leverandøren som henviste meg til han... og samtidig sprang eg opp på loftet og sette i kontakta på det gamle kjøleskapet som eg ikkje har kasta ut. Der er det i alle fall plass til litt av det som bør ha det kjøleg i desse dagar.

Gubben var litt skuffa då han kom att frå fotballtrening i kveld, og fann ut at pilsen hadde blitt igjen i varmeskapet;)

Eg ventar i spenning på om det kjem til å ordne seg med reperatør eller nye delar før helga. Truleg ikkje... Og om vi får det på garantien? Det er nemlig ikkje fyrste gong det skjer slikt, og det er jo alltid på dei varmaste dagane.

I dag har eg debutert i kommunestyret også. Eg er 2. vara, og har klart å unngå å møte før. I dag var det til og med sommaravslutning, med rømmegraut midt i møtet. Det var ein fin kveld, eigentleg, men eg skulle gjerne ha brukt kvelden ute i det herlege veret.

Forresten er det sikkert like bra at eg måtte gå inn, for eg kjenner at eg solbrent på venstre side av begge beina! Eg sat litt for lenge på stranda og såg på borna som leika seg i vatnet. Litt merkeleg at dei ikkje syntes det var kaldt, for eg meinte det absolutt var for kaldt til å bade skikkeleg. Vasse er ok, men når vatnet når til midt på låret, då skal du ha takk. Eg er nok ei skikkeleg pyse....

Kom Mai, du skjønne, milde!

!. mai! Skulle kanskje gått i tog, med paroler og kamprop. Eller så skulle eg latt dei bondske genene slå ut, og spreidd litt møkk i hagen :) Men eg gjorde ingen av delene...

I dag har eg kosa meg, slappa av litt i sola, laga middag og lite anna på kjøkenet. Det vi har brukt mest tid på, er å innreie barneroma. Eldstemor har flytta frå eit soverom til eit anna, for å gje minstemor eit rom sjølv. Det er veldig stas for begge to. Og ganske mykje arbeid for oss som skal gjennomføre flyttinga. Prinsessa hadde veldig lyst på familiekøye, der ho skal sove oppe og lese kveldsboka nede. Det er ein god plan, for eg elskar å ligge ved sida av ei av jentene og lese bok eller Bamseblad.

Det har blitt nokre sensurerte gloser i dagens løp. Det er ikkje alle produsentar av flatpakka møblar som er like dyktige og gjennomførte som t.d. Ikea. Det er eigentleg mykje som kan gå gale når ein står der med fjøler, skruar og trepluggar, og ei litt knapp monteringsanvisning. Men det gjekk rimeleg bra, med unntak av at det mangla ei fjøl... Jammen klarte gubben å ordne det!

Berre sjå kor herlig det er å få ny seng! I morgon skal vi på tur og handle meir småting til romet. Eg har lyst på puter i friske fargar til å legge i underkøya, og så må vi vel ha teppe på golvet. Det står att ein del anna også, men det fungerer.

Elles har eg laga eit nytt smykke. Det er kjekt med makrame!!

Vårreingjering, heilt lokalt:)

Eg har ikkje for vane å sette igang store vårreingjeringar. Men då eg pakka til hyttetur i påska, kom eg på at eg skulle rydde litt i boda. Det var svært nødvendig, for å seie det som det er.

I ettermiddag og kveld har eg kosa meg med å romstere rundt på boda, gå gjennom litt julepynt, redusere talet på kasser, plukke saman påskepynt og lage ei lita kasse til det. Mine gamle seilarstøvlar fekk marsj-ordre, dei har uansett ikkje vore i bruk på mange år. Dei gamle stolputene til kjøkenstolane sameleis... Og kvifor skal eg ta vare på alt mogleg rusk, som eg eigentleg ikkje kjem til å bruke nokon gong??

No er golvet synleg igjen. Hurra!

I morgon skal eg kanskje gå vidare på neste rom?

Lang strikkebukse og kjøkenutfordring:)

Eg har blitt utfordra av Annika om å vise fram noko eg likar på kjøkenet mitt. Eg er veldig glad i kjøkenet mitt, så eg kan vel vise fram noko av det:) For eksempel er magnet-knivlista kjekk å ha. Det er praktisk og enkelt, og det likar eg! I tillegg ser du her flisene over benken, som eg også er ganske fornøgd med... Syns dei er litt stilige, rett og slett!


Så er eg veldig glad i kjølehjørnet mitt. Det var eit av dei sterkaste krava eg hadde då vi planla hus for 7 år sidan. Det har vore "for lite" eit par-tre gongar, men berre når vi har hatt konfirmasjon og to barnedåpar. Så i det daglege er det rikelig plass der:) Eg har også sansen for skapet med frosta glasdører. Det er litt fint med lys der!

Oppvaskmaskin er stas, særleg når du har budd i ei leiligheit uten oppvaskmaskin i 12 år. Då er det herlig å kunne stappe ting inni maskina og så er du kvitt problemet;) Det blir rett og slett ryddig på benken i løpet av kort tid....

Er det dumt å like golvet sitt? I alle fall er det stilig med skifergrå fliser. Om det er smart? Det er ikkje sikkert. Alt som ramlar ned vert knust, nesten uten unntak. Så det vert litt utskifting av glas i heimen... Men der vi budde før var det grønmønstra belegg på kjøkengolvet. Det viste ikkje om golvet var skite, men det viste heller ikkje om eg hadde vaska og strigla!

Utfordringa om å vise fram kjøkenet ditt vert herved sendt vidare til Ronille og
Solveig Vis fram noko du likar på kjøkenet ditt!

Eg har blitt ferdig med ullbuksa til prinsessa. Det er hovudsakleg eit resteprosjekt, men eg har meir restar, så det kan bli ei bukse til minstemor ved eit seinare høve. Kanskje. Akkurat no er eg lei av å feste trådar!

Ein god dag å vere inne på!

Det er rett og slett innever. Ikkje nokon med vitet i behald vil synest at dette veret er brukande utever! Jaja, gubben var ute og jogga, men han er litt sprø:)

Eg har meldt meg på lue-alongen 2009, det betyr at eg skal strikke ei bestemt lue kvar månad heile året. Det kan bli mange spennende små prosjekt, det!
Denne heiter enkelt og greitt the boy hat. Eg har brukt 40 gram tweedmelert Smart. Dette vart ca passe til ein gut eg er tante til. Litt for liten til vaksne, men det er berre lengda som avgjer det. Det er god passform på grunn av ribbinga, så den kan gjerne strikkast litt lenger og passe til eit større hovud.I dag fekk vi plukka ned siste rest av jul i heimen. Det er ikkje berre praktisk å ha julestjerna hengande så høgt, men det er jo litt stilig, da! Gubben må nok få seg ein teleskopstige snart, for no må vi flytte kjøkenbordet bort til vinduet, og sette gardintrappa oppå bordet. Dermed vert det ikkje gjort før vi har tenkt på det ei lita stund;)Sjekk om Pus er skeptisk! Det er Gullungen som er fotograf, eg trudde faktisk ikkje at ho ville klare å ta eit skikkeleg bilde... Det var mange bilde av beina mine, golvet og andre ting på høgde med ein to-åring. Og så eit par bilde av Pus.
Slik ser vi katten ofte. Han likar å ha oversikta, og det har han i vinduskarmen. Av og til ser eg at han fyl med på kva som skjer ute, og då er det gjerne ei kråke eller ein måse på besøk i hagen. Elles er det hans jobb å passe på alle oss andre i huset. Så han har det travelt, det ser du vel:)

Dagens utfordring

På Hobbyboden vart vi utfordra til å vise fram noko gammalt som betyr noko for oss, eller som vi ikkje klarer å kvitte oss med. Det eg umiddelbart ser, er vakkert:)
Eg har arvegods i stova. Skåla har eg arva frå mormora mi. Den er rett og slett nydelig, og gammal.
Skåla står på eit møbel som er arva frå mannen min si gamletante. Det betyr farmora hans si syster, som ikkje hadde born sjølv. Dermed vart farmora hans si familie hennar næraste familie.

I tillegg har eg liggande ein hekla duk på kvart av desse skapa. Det er farmora mi som er mester for heklinga her på garden:) Eg har nokre av dei hekla dukane, dei fleste er små, nokre er større. Og felles for alle er at det er nydelig handarbeid.

Møblementet består av spisebord med 6 stolar, ein speilbuffet og eit mindre skap. Vi måtte bygge hus med plass til det;)

Nytelsesfull rengjøring

Er det eigentleg mogleg? Forfattarane av denne boka påstår det er gøy å vaske. Tja... Eg er med på at det er fint at det er reint, og det gjev ei god kjensle at huset er reint og luktar ok. Ikkje så mykje grønsåpe lenger, men det kan lukte bra av andre ting også:)

Boka vart innkjøpt ved ei tilfeldigheit på salg ein gong. Og eg har vel sett i den nokre gongar, men ikkje klart å bli ein ihuga husvaskar likevel.

Men nokre av poenga er bra. For eksempel at du bør starte med å rydde ut og vekk (les:Kaste eller gje vekk) det du ikkje treng. Færre ting å flytte på, færre støvsamlarar, færre teppe som burde rensast, færre lause nøklar eller andre ting som slenger overalt. Skåler, bokser, kasser.... Jada, det er berre å leite dei fram!

Og innimellom er det pepra med små glimt frå 1950:

Ukerengjøring dekker stort sett samme sysler som den daglige rengjøringen, bare med den forskjell at det gjøres grundigere. Man er for eksempel mer nøye med gulvene, tørker av panelovner og vinduskarmer og pusser vinduer hvis det trengs.

Hmmmm. Mine vindu har vel ikkje hatt behov for vask, dei? I alle fall ikkje slik at eg har teke det med i den omtale ukerengjøringen dei siste 10-12 vekene....


Men eg har vore bra flink i dag: Eg er heime med sjuk prinsesse, og har nytta høvet til å vaske gardinene på soveromet. Eg har også rydda på loftstova, og pakka inn nokre julegåver. Det er ikkje ille, vel? Og så har vi mala, ete popcorn, støvsuga 1. etasje og fyrt i omnen heile dagen. Det er nemlig snøver ute i dag. Ei god dag å vere inne!

Litt godsaker?

Det er godt med haust. Det er høljregn ute, og vinden hyler rundt hushjørna. Sjølv i vårt ganske så nye hus er det litt kaldt av og til, kanskje fordi vi ikkje vil skru opp den vassborne varmen i golvet meir. Det er langt meir økonomisk å ha termostaten stilt slik at det er ok, men ikkje varmt i huset. Så då vert vi frista til eller minte på å fyre opp. Slik varme er så god:) Og gratis!

Wow! Innpakka gåver! Det er alltid spennende:)


Trur du at det er jula eg har starta å tenke på? Nei, det kan vel ikkje vere det... For eg er ikkje klar til å gjere gåveinnpakkinga heilt enno. Faktisk trur eg at det vil ta lang tid før eg er klar;) Men noko har eg pakka inn i kveld!


Jauda, det var gevinstar til barneturn-gruppa. Og når gevinstane skal vere verdt ca 20 kroner, er det liksom ikkje så veldig mange spennende ting å kome på. Sjølv likar eg ikkje veldig godt å kome heim med små dillesaker som eg ikkje anar kvar eg sette/legge/bruke. Då er det lettare med noko som vert ete opp, ikkje sant? I tillegg er det jo godt, då!


Dette er berre for å minne deg om kva du BURDE ete... For sjokolade er ikkje sunt for deg! Eller meg...


For tida vert det mindre tid med strikkepinnane. Det er litt for mykje anna som skal gjerast. Men eg held på med ein gensar til minstemor, i Rauma Finull.

Interiør

Eg ser at andre bloggar har vakre bilde av interiør og dekor. Eg har ikkje så mykje sånt, men eg kan godt vise fram nokre punkt som eg likar:)

Eg er ikkje veldig flink med symaskina, men eg har i alle fall klart å sy meg laaange panelgardiner av lin:) Dei er nesten 4 meter høge!

Og dette vevde teppet har hedersplass på veggen. Eg fekk det i gåve av mi kjære mor, det er ein tidlegare kollega som har laga det. Imponerende arbeid, og fargane er fine:)

Og så er det lampen vår:) Denne er vel litt kul?

Ikea, ja?

Det vart jo Ikeavarer på meg likevel! Min kjære fann ut at veret var så kjedeleg at han like gjerne kunne køyre til Trondheim og handle. Så det gjorde han forrige veke. Han starta kl. 06.30, var i Trondheim kl 12.45 og foretok ei handlerunde som kunne imponert kva som helst slags luguber gerilja. Eg hadde utstyrt han med liste, og han fullførte med glans:) Alle varene på plass i bilen, sjekktelefon heim til sjefen (meg), og så kunne han suse heim.

Han var heime igjen kl 21.30. Det er vel ny rekord... Det vart nokre mil!

Og etterpå har vi brukt nokre timar på å skrue saman flate pakkar.

Det er imponerende kor gode Ikea er på å lage bruksanvisningar! Sjøl mor får til:) Dessverre. For det vert lite tid til strikking!

Som ikkje det var nok med Ikea-montering, har eg handla eit lite akvarium i dag. Bilde får kome når det er litt meir klart. I kveld har eg vaska grus, fylt akvariet med vatn og litt planter etc.
I morgon må eg handle ei skøyteledning, og om nokre dagar skal fiskane få flytte inn i nytt hus. Då slepp dei å leve i fare for katten. Han er litt ivrig rundt gullfiskbollen av og til...

IKEA til Sunnmøre NO!

Eg vil ha IKEA hit, som mange andre sunnmøringar:)

I ferien var vi i Trondheim, og la turen innom ein av magnetane: Ikea... Vi har planlagt kva vi skal ha, og har enda med Ikea fordi det er vanskelig å finne bjørk andre stadar.

Vi treng mellom anna skohyller og hattehyller til vaskerom og gang. Dette er nesten slik at det er litt desperat, det er lett kaos på vaskeromet og vi treng å få orden på det. Elles vert det familieterapi;)

I tillegg skal vi ha skrivebord til Musikanten, og ein kommode til han.

Og for å rydde til på loftstova: 2 skjenkar som skal passe under skråtaket. Der skal mor få sette alle bøkene sine bak dører, så ser det litt meir stilig ut:)

Så vi troppa opp på Ikea, mest for å sjekke at varene er slik vi trur dei er. Det er jo mogleg å gjere det slik når ein er i nærheita!
Og vi vart storleg fornøgde med det vi såg. Vi fekk bekrefta at for å få sendt varene til Sunnmøre må vi legge inn bestilling på nettet og så betale ca 2800 i frakt.

OK, vi skal ha så mykje at det er einaste moglege måte å gjere det på. (Så mange varer i ein alt full bil, det går jo ikkje!)

MEN: Kva er det eg møter på nettsida? Av ein eller annan idiotisk grunn er det ikkje mogleg å bestille skjenken Bjursta i bjørk, berre i dei andre fargane. Har du høyrt på makan? Eg ringde til ei hyggeleg dame og fekk absolutt ingen hjelp, berre sympati... Dermed vert det for dyrt, relativt sett, å betale så mykje frakt for dei andre varene.

Så eg får ikkje orden på huset! ÅHHHHH!!!!

Vi kunne jo berre ta ein ny tur til Trondheim, med tom bil. Men då kan vi nesten ikkje dra med oss borna, då er jo bilen full. Og eg kan ikkje reise uten minsten, for ho vil jo ha puppen i nærheita.
Ergo kan eg ikkje ordne dette uten at eg overtaler mannen til å køyre åleine til Trondheim og handle. Kjedelig er jo berre fornamet....

Jaja, det var dagens sukk.

Den einaste lilla døra her?

Fins det andre lilla dører i bloggverda? Eg veit ikkje om andre i regionen her, i alle fall. Eg syns den er litt kul...

Vi fekk spesialprodusert døra til vårt nye hus, det er no 4 1/2 år sidan. Tida flyg!

Og bildet er teke no i dag, for nokre minutt sidan. Er det nokon som ser at det er sol på delar av bildet? På nyheitene er det mykje snakk om regn og flaum i søraust-Norge, og her har vi det tørt og fint. Livet er urettferdig, men eg skal ikkje klage:)