Dvaletilstand, nesten koma;)

Det er berre å innrømme det: Eg har visst blitt litt lei av å blogge. Det ser ein jo for så vidt av manglande oppdateringar.... Men eg er i live, det er berre det at livet er andre stadar enn på nett. Eg strikkar i vei, har laga både det eine og det andre, men eg kjem ikkje på å fortelle om det her. Det er ikkje det viktigaste heller;) Men eg kan alltids legge ut eit skikkeleg skrytebilete, av Musikanten min som var med i storbandet til Stjernekamp på NRK forrige helg. Vi sat sjølvsagt godt plassert i sofaen, heile familien. Det var stor stas å sjå storebror på tv!

Han var med som student på NMH, det var der dei henta musikarane til programmet. Stilig?

Sommarferie-resyme:)

Det er jammen fint med litt ferie! No har vi enno ei veke att av ferien, så det kan vel skje fine ting også etter i dag, men eg kan skryte litt av det vi har fått med oss til no. Som oppvarming kan eg vise at vi har hatt sol her heime også, dette biletet er frå slutten av juni. Det var ikkje badetemperatur, men det er nydeleg på stranda her likevel! Jentene likar å grave i sanden, erte bølgjene og leite etter minikrabber.

             

Så måtte vi ut og farte. Vi har sett Danmark, i fleire konstellasjonar.

Vi starta åleine i Frederikshavn, og etter eit par dagar der dro vi vidare til Vejle. Der kom systra mi og familien hennar og var ilag med oss. Kjekt for alle partar å ha selskap, ikkje minst i Legoland. Der var det forresten så mykje folk at det hadde vore like greitt å vere heilt åleine. Det er jammen ikkje lett å halde saman når det er tusenvis av andre menneske alle plasar. Lange køer for det meste, og ikkje heilt fantastisk ver. Men det var kjekt likevel! Eg var godt fornøgd med å gå ilag med minstemor, vi kosa oss med dei små karusellane og rolege aktivitetar. Ho likar ikkje dei som går fort og bratt:) Prinsessa fekk halde seg ilag med syskenborna og køyre full fart, og det passa henne bra. Flott å kunne dele seg! 

Om du er i nærleiken av Hirtshals, bør du vurdere å legge inn eit besøk i ørnereservatet. Det var stilig å kome så nær ørner og falkar! Denne sat på ein stolpe rett ved sida av meg. Kult, eller?

Frå den eine ytterligheita til den andre:) Vi besøkte Givskud Zoo. Absolutt ein park verd eit besøk. Der vekslar ein mellom å gå og å køyre bil inne i parken, og ein får sett mange dyr på nært hald. Løvene er kanskje mest imponerende, men denne krabaten på ca 6 veker er ikkje så dum heller!

Vi avslutta turneen i København. Flott utsikt frå toppen av Vår Frelser Kirke. Litt nifst å gå opp til toppen, vi møtte ei som var nesten vill i blikket og ba alle om å snu ned att. Vi gjorde ikkje som ho sa... Eg var ikkje redd, men det kilar jo litt i magen når du går i utvendige trapper på veg opp til toppen av tårnet.

Sommar er ein fin ting!

Det er jammen deilig med sommarferie!
Forrige veke hadde eg ein lekker kombinasjon av jobb og fri, då eg avspaserte nokre dagar og hadde med nokre "nye-i-Norge-born" på aktivitetar andre dagar. Og når eg kan velge, tek eg noko som er kjekt for meg også;)
Ein dag var vi på Barnas Lekeland i Spjelkavik, Ålesund. Det er eit fantastisk konsept! Borna leikar seg i vilden sky, i sikre omgjevnader, og eg kan site roleg og sjå på:) Eg hadde tilfeldigvis med meg strikkesaker....

Ein annan dag var vi på tur på eit ørlite fjell, og steikte pannekaker på primus. Deretter besøkte vi ei badestrand, såpass at borna vart våte og skitne:)

Men det beste var sjølvsagt at eg hadde lagt avspaseringsdagane mine til dei dagane det var finast ver. Så mot slutten av veka var det avslapping i sola!
Sidan pc-en har teke kveld, og kameraet ikkje heilt vil vere på lag med reserveløysinga, blir det dårleg med bilete. Synd, for eg skulle gjerne dokumentert kor fint det var fredagen, då det var "Opplev Hareid" her. Tivoli og boder i sentrum, sol og godt humør, gode tilbod i butikkane, det er ikkje så verst her då!

Minstemor gjorde seg ferdig med barnehagelivet forrige veke. Frå hausten er ho skulejente. Vi håper at brevet med klasseinndeling og slikt ligg i postkassa i morgon, så vi får sjå det før vi legg ut på ferie.
Tysdag morgon reiser vi i retning Danmark og Legoland. Det høyrer med, når ein har born i rett alder!
Men det er lettare å pakke klede til to veker i Tyrkia, gitt... På ferie i Norge og omkringliggande strøk kan vi jo risikere både det eine og det andre på verfronten!

Det er ikkje umogleg at det kjem livsteikn frå meg seinare i sommar:) Nyt sommaren der du er!!

Sommarfestar i rad og rekke og rad og...

Sjå, kor nydelig! Barnehagen til minstemor hadde sommarfest i dag, og dei framførte ein sjarmerande versjon av Kardemomme By. Sommaren let vente på seg, det var iskald vind og 8 grader, men vi vart varme på innsida av å sjå dei flinke småtrolla våre synge og lese replikkar, og framføre eit slags skodespel;) Tusen takk til dei vaksne som gjer dette mogleg! Etter at spelet var ferdig, fekk vi pølser med brød og suppe. Smart, og enkelt for oss. Ingen middagskoking i dag!

Litt vemodig at det er slutt på barnehagelivet for familien. I dag var minstemor på førskule også. Ho var veldig fornøgd med den opplevinga.

 

Svigermors drøm;)

Eg må vise fram det nyaste tilskotet i familien! Medan eg var i Trondheim forrige helg, kom Musikanten heim ein tur, og for fyrste gong hadde han med seg Julia. Heldigvis var dei her eit par dagar etter at eg kom heim også! Eg har ikkje heilt tenkt å titulere meg som svigermor, men det nærmar seg vel definisjonen?? Hmm, eg syns det høyrest gammalt ut.... Men samtidig er det heilt ok å vere svigermor til ei så søt jente! Perfekt:) Her er nokre bilete frå Lundeura på Runde, der gjengen fekk sjå store mengder lundefugl på veg inn for natta.

Eg har ikkje vist bilete frå helga før heller, det har ikkje vore tid til å styre så mykje med blogging. Men her kjem eit utsnitt av ei fin helg på Skei, inkludert besøk i Fjærland. Kan absolutt anbefalast! Det var koseleg å vandre i bokbyen Fjærland, der det er antikvariat i annakvart hus:)

Oppdatering, kanskje?

Hei! Det er visst ikkje så ofte eg er innom og oppdaterer. Men det er jo fordi det skjer så mykje IRL.

Forrige innlegg avslutta eg med å fortelle at kronprinsparet skulle kome på besøk dagen etter. Det vart ein kjempedag! Eg var svært stolt av Musikanten min, som spelte nydeleg på trompet, heilt åleine på scena. I tillegg var begge jentene med, den eldste med skulen, den yngste saman med dei eldste i barnehagen. Det var rett og slett ei fin stund.
Bildeserie i Vikebladet.

Etter at eg hadde fått av bunaden og rydda vekk bunadsølvet, måtte eg pakke for kortur til Trondheim. For rett etter jobb fredag gjekk vi i Hareid kammerkor ombord i ferja, og på andre sida stod bussen klar og venta. Det er kos å køyre buss ilag med andre, og dei tre yngste damene i koret sat heilt bak i bussen og strikka mesteparten av vegen:) Kjekt!

Trondheim er ein fin by, heldigvis hadde vi sol og varme:) Den store streiken i kommune og stat var ganske ny enno, så det var ikkje mykje søppel å sjå heller. Det vart verre etter at vi reiste...


Vi budde på Rica Nidelven, som fleire gongar har fått pris for Norges beste frukost. Det er nok med rette, for vi kosa oss med eit enormt utval og svært høg service. Trur at eg kjem tilbake, ja.


Hareid kammerkor song i gudstenesta i Nidarosdomen 1.pinsedag. Det var ei flott oppleving. Men det var kanskje enda flottare å synge i Vår Frue kirke søndag kveld. Det er fantastisk klang i slike gamle steinkirker!

Her er bilete frå Nidarosdomen etter gudstenesta, og under frå konserten om kvelden. Det var faktisk ein god del menneske der, og vi sette sjølvsagt stor pris på å ha publikum:) Ikkje alle var kjenningar heller...

Det var fint å reise heim att også. For Musikanten min kom heim medan eg var borte, og han hadde med kjærasten sin også. Det aller fyrste besøket hos "svigerforeldra" var sikkert skummelt. Men for ei flott jente! Både på utsida og innsida:) Jentene vart glade i henne med ein gong, det var tydeleg.

Håper du kjem att snart, Julia!!

Bursdag igjen!

Tenke seg til, eg har blitt eit år eldre:)
Heilt greitt, alternativet er langt verre!! Faktisk tenker eg at det er litt "kokettering" å sukke og stønne over kor gammal ein har blitt. Det er klart at vi blir eldre, det er vel ein konsekvens av å leve?

Eg har hatt ein flott dag, i alle fall. Etter å ha venta lenge på vår, sol og varme, har det skjedd noko merkeleg her på Sunnmøre: Det er nesten full sommar! Det kom så brått at vi nesten ikkje forstod kva som skjedde. Den eine dagen gjekk borna med ullunderskjorter i barnehagen, den neste var det t-skjorte;)

Så i dag har vi hatt kaffigjestar på verandaen. Dei fekk servert mykje godt, utan at eg har gjort så mykje for å få det på plass. Heldig med mor og svigermor som tek med karamellpudding, riskrem og anna godt, og eg kjøpte ei marsipankake. Sjølvsagt burde eg ha laga til meir sjølv, men akkurat denne veka er det heilt fullt i timeplanen.

Sist helg var vi på hotelltur i Skei, Jølster. Det var ikkje nokon spesiell grunn til turen, anna enn at det er kjekt å få litt luftforandring. Jentene kosa seg inderleg i eit varmt basseng, og vi besøkte ein isbre og bremuseum i Fjærland. Flott!

I morgon kjem kronprinsparet til Hareid! Alle mine tre born skal vere med i program: Musikanten skal spele trompet åleine. Prinsessa skal synge ilag med 400 andre barneskuleelevar. Og Minstemor skal synge ilag med dei eldste barnehageborna. Min jobb blir å stille i bunad og hjelpe til med ei av klassene på skulen. Og så skal eg nok synge litt ilag med dei:)

Dette biletet har eg henta frå VG. Kanskje kan vi ta bilete av dei sjølv i morgon?

17.mai 2012

Det vart ein våt nasjonaldag i år også. Det er ganske vanleg... Men det var ikkje så mykje regn at vi var HEILT nødt til å bruke paraply medan vi gjekk i toget, berre nesten;)

Eg fekk lov til å vere med ilag med alle 2. og 3.klassingane ved Hareid skule, då dei song nasjonalsongpotpourri både på "friluftsfesten" (som vart flytta innandørs) og på folkefesten i hallen. Dei er så flinke! No har vi øvd ein heil del, det skal vi innrømme.
Og dagens opptreden er nesten som ei generalprøve å rekne, for om ei veke er det kronprinsbesøk her! Då skal alle elevane ved alle barneskulane synge det samme potpourriet. Eg har ikkje fintelt, men eg gjettar at vi snakkar om 400 born. Sjølvsagt er det ikkje alle som stiller på ettermiddagstid, men eg trur det blir bra trøkk likevel:)

Nokre glimt frå dagens tog:

Prinsessa bar fane for klassa eit stykke, og då vi kom til stadion var det leikar for små og litt større. Minstemor måtte ha ein smule hjelp for å gå på stylter, men det vart jo premie uansett:)

Heldigvis kunne vi gå inn i aulaen på ungdomsskulen og kjøpe is, kake, pølse og kaffi. Alt som høyrer med:)

Før vi gjekk ut i dag, såg vi forresten på barnetoget i Oslo, og leita etter Musikanten. Han dirigerer Vinderen Skoles musikkorps i år, så vi hadde ein rimeleg sjanse til å sjå han på veg forbi slottet. Vi klarte ikkje å sjå han, men vi får tru at han var der;)

Cantus på besøk:)

For ein dag:)

Etter ein rask vinter i går, vart det heldigvis ein strålande vårdag i dag. Vi har sykla på tur til Brandal og endeleg besøkt retrokafeen Flo og Fjøre. Det er ei lita perle, og eg kan gjerne anbefale dei som er i lokalområdet å svinge innom. I dag var det koseleg å site utanfor i sola med kaffe og te, og vi kunne ha kjøpt heimebaka kaker om vi hadde lyst til det. Og dei hadde til og med potetball til middag! Det er ikkje plass til mange gjestar på ein gong, men det er så sjarmerande:)

I kveld har eg vore med på ei stor musikalsk oppleving: Konsert med Cantus, Jan Magne Førde og Hareid kammerkor. Cantus er eit damekor frå Trondheim, dirigenten deira heiter Tove Ramlo-Ystad og er kjent for Hareid kammerkor frå før.
Vi, som mange andre, har leigd henne inn til øvingshelgar, for ho er ei av dei ypperste kordirigentane i landet. Vi skulle gjerne hatt henne på besøk igjen, ho er så levande, engasjerande og spennande:) Jan Magne Førde var også med, og Cantus song fleire songar han har laga, der han også bidrog sterkt på flygelhorn.

Heldige oss fekk synge ilag med Cantus på to songar, deriblant Bruremarsj av Jan Magne Førde. Herlig å vere med på slikt!

 
 Her er eit klipp der Cantus framfører Safari, skrive av JM Førde. Kult:)

Vi i kammerkoret når ikkje opp til knea på dei andre på denne konserten, men vi får prøve å sjå på at vi har vore deltakarar i ein flott konsert:)
Heimesida til Cantus kan gje deg meir informasjon!

Sov du vesle spire, ennå er det vinter....

Det vart kvitt i dag!
Fotballaget til Prinsessa skulle på fotballturnering i dag, og vi var litt skeptiske då vi vakna og såg at det snøva ute! I går var det vår, i dag var det 2-3 grader og snø... I tillegg til ein liten kuling. Herlig... Eg og minstemor skulle uansett ikkje vere med, særleg med tanke på at eg måtte hente henne i barnehagen midt på dag i går, fordi ho ikkje var heilt i form. Vi pakka med varme skift og prøvde å sikre at turneringa skulle bli så behageleg som mogleg i drittveret! Det kom etterkvart beskjed om at heile cupen var avlyst i dag, så Prinsessa og pappaen tok same ferja heim! Fint for huset, for i slikt ver var det berre husvask som kunne gå an:)

Eg hadde tenkt å vaske vindu ute. Gubben hadde tenkt å klippe plenen. Det slapp vi i dag!

Katten har teke livet med ro i dag. Ser du at det er snø på vinduet mitt? Eg trudde våren var her, men det var nok litt optimistisk.

Minstemor har leika seg i trappa:) Det er visst mykje kjekkare å site der. Ho sit så godt, dinglar med beina og syng sjølvdikta songar medan ho puslar med dei små leikene sine.

Eg har stor sympati for dei i nabokommunen som feirar konfirmasjon i dag! Det er nok mange som fekk litt meir innandørs akvititet enn dei hadde tenkt. Tenk om det hadde vore bryllup denne helga i staden for forrige! Vi var visst litt heldige med veret likevel:)

Eg håper du har litt finare ver der du er!

Heldigvis ser det ut til å lette no, utpå ettermiddagen. Kanskje blir det betre i morgon? Det kan ikkje bli verre, i alle fall;)

Bryllup!

Ei stor helg går mot slutten:) Det er ikkje så ofte vi er i bryllup, og jentene har aldri vore brudepiker før! Dei har aldri vore hos frisøren for å få satt opp håret heller;) Dei vart nydelege, nesten like pene som bruda! Bruda er minstesøstra mi, 14 år yngre enn meg. Rart at det ikkje verkar som så stor aldersforskjell no som for 20 år sidan....

Eg må berre vise fram kor nydelege dei fire brudepikene vart:

Det er 4 av 6 tanteborn av bruda som er brudepiker. Dei to andre er for store. Forresten, eg trur ikkje Musikanten min hadde passa inn i kjolen... 
Mine to er dei to midterste i storleik på biletet.

Eg kan vel vise fram systrene også. kanskje. Her ser du bruda i den eine enden og meg i den andre, med dei to andre systrene mellom oss.  Og så eit lite glimt av brudepikene på veg inn i kyrkja, og hårsveisen til Prinsessa;)

Fine damer, kva?

Takk for ei fantastisk helg!

Edit: Musikanten min påpeiker at det er heilt ok for han at han ikkje vart valt ut til å bli brudepike. Elles var han medverkande på mange måtar gjennom dagen. Han spelte trompet i kyrkja, spelte til songane under middagen, og hadde ansvaret for musikken til dansen om kvelden. Kanskje like greitt å ikkje ha på seg kjole då.

Mamma, eg vil ha slike!

Minstemora drog meg bort til hylla til ei anna jente i barnehagen i forgårs. Mamma, eg vil ha slike pulsvarmarar, sa ho. Og ho fann sjølv fram garn i korgene her, slik at alt skulle ligge til rette for rask produksjon. Då er det berre å strikke i veg, sjølvsagt:) Det er ikkje akkurat tidkrevande heller, og eg fekk brukt litt restegarn som eg har liggande for mykje av... Pulsvarmarane er superenkle, med hol til tommel som den einaste "utfordringa" i heile prosessen. Og dei vart ferdige i løpet av ei lita kveldsøkt, så dei låg klar på stovebordet til minstemor stod opp i dag:) Ho godkjende dei!

I tillegg har eg strikka eit par sokkar i eit sokkegarn frå Nille. Heilt ok garn, og eg reknar med at sokkane vert gode å ha etterkvart. I dag har det vore sol, såpass at vi kan tru at våren er her. Men det er berre før vi går ut;) Jentene tok på seg varmedress då dei gjekk ut på ettermiddagen. Då hadde dei vore ute før, og oppdaga at det var kaldare enn det såg ut til!

Elles har eg brukt ein god del pengar i dag... Ikkje på garnhandel, men på bryllupsgåve, sko og strømper, ny bh og denslags. Det er berre ei veke att til Det Store Bryllupet, minstesystra mi skal gifte seg!! Det blir nok ein fantastisk dag:)

Påska 2012 i bilete

Vips er påska fryktelig nær slutt... Det er rart med slike feriedagar, sjølv om ein har mange, er det altfor få;) Neida, det er ok å kome tilbake til kvardagen også, men eg trur det blir slitsomt å få opp både meg og jentene i morgon tidleg! No har vi kosa oss heime i heile påska, med små turar hit og dit, og mykje leik og kos utover kveldane. Då er det vanskeleg å snu, sånn heilt utan vidare. Kva har vi gjort i ferien?

Eg tok ikkje bilete av dei fyrste kveldane i påskeferien, då spela vi Dominion fleire gongar ilag med systra mi og den komande ektemannen:) Eg hadde lyst til å skrive "brettspelet Dominion", men det er ikkje heilt rett. Kortspel på bordet, kanskje?

Musikanten min kom heim og hadde lyst til å lage middag til resten av oss! Hurra, sa eg, og vi handla inn nødvendige ingrediensar til mozzarellafylt kylling, pakka inn i baconskiver, med potetbåtar og salat. Til og med salaten var ny for meg: Paprika, avocado og cashewnøtter. Enkelt, og nydeleg godt!

Eg hadde ikkje med kamera i badeland heller, så de får berre tru meg når eg seier at det var rett godt å få bade skjærtorsdag, sjøl om det var mange andre som også hadde tenkt det samme....

Langfredag tok vi turen til Bondalseidet. Minstemor og eg tok stolheis for fyrste gong. Vi overlevde;) På toppen gjekk vi ein tur på langrennski medan dei fleste andre i flokken sto på slalomski. Vi rakk også ein matpause før vi to tok stolheisa ned att:) Dei andre brukte skiene på veg ned, men så langt strekk ikkje minstemor sine skiferdigheiter....

I dag avslutta vi ferien med ein tur til Flø. Om du ikkje har vore på desse kantar, er det på tide:) Og er du på Sunnmøre, er det svært fint med ein tur til Flø, enten i sommarsol eller i storm og styggever. Der er naturen nær, storhavet er rett utanfor! Og du kan finne Moods of Norway sin kule butikk, og eit skikkeleg ambisiøst kunstgalleri. Jentene digga den rosa traktoren til Moods, og vi lurer no på om vi skal male den gamle raude traktoren her på garden rooosa:)

Skogstur med grilling!

Stormen Dagmar tok ansvar for ein del "skogrydding" i jula. Det vart ein god del arbeid til gubben og svogeren vår, i skogen som høyrer til garden. Dei har vore der mange laurdagar, og i dag tok vi ein heil storfamiliepiknikk der:) Det har jo kome ein heil del snø dei siste par dagane, og det var tildels fint ver i dag. Nokre snøbyger har det jo vore, men det var kjempekoseleg i skogkanten!

Vi hadde med oss appelsiner og Kvikk Lunsj, grillpølser og marsmallows, vi kokte kaffe på bålet, og minstejenta som var med, eit tantebarn på 2, sov ei økt under granene. Ho hadde det ganske fint, på liggeunderlag og med teppe over seg:) Nesten så ein skulle ha prøvd sjølv!

I dag var vi: mormora og morfaren, tre store døtre, to ektemenn, og 5 born i alderen 2 til 21... Rett nok hadde vi lånt ei jente, men ho passa fint inn i flokken.
Jammen er det fint å vere heime i påskeferien!

Påskekyllingar IRL

Hareid barnehage er ein god barnehage, der gullungen min no er inne i sine siste månadar. Vi er så heldige at vi har dyktige, kjekke vaksne damer som arbeider der, og eit par foreldre med høner:) No har barnehagen fått låne nokre egg, og ei rugemaskin, "tilfeldig" plassert ut rett før påske. Borna har lært at egga skal rugast på i 21 dagar, og så kjem det forhåpentlegvis ut ein kylling av egget. I går hadde dei to fyrste kyllingane streva seg ut av egga, og i dag har dei fire neste blitt klekt. Borna er yre av begeistring, og eg må inn og sjå dei små mirakela kvar dag;)

Det er vel kanskje ein liten auke av større sysken som blir med for å hente barnehagesyskena også.... Ikkje så rart, for dei er såååå søte, desse små!

Barnebursdag:)

Prinsessa i huset har fylt 9 år! Det måtte sjølvsagt feirast, i fleire omgongar. Til barneselskapet inviterte vi alle jentene i klassa, og nokre få i tillegg. Det vart ein livleg gjeng:) Det var veldig morsomt og litt slitsomt...

I slike samanhengar er det ikkje vits i å stille med bløtkake. Her er det muffins som er tingen, og så sjokoladekake, sjølvsagt. I år laga vi cupcakes med blåbær i. Det vart godt! Jubilanten sjølv var sjef for dekoren. Nydeleg:)

Sommarfuglar i vinterland

Eg har to kreative småjenter i heimen. Dei har det av og til veldig kjekt ilag, og her ein dag hadde dei god tid til å kose seg. Då kom dei som sommarfuglar begge to. Det er storesøstra som har mala begge to, men dei er likt dekorerte, så vidt eg kan sjå:)

Dei ville ikkje vaske det vekk før dei måtte, for dei syns nok at det var ganske stilig!

Rask visitt i Oslo

Eg har vore ein rask tur til Oslo sist veke. Flaks å bli beden om å reise på konferanse i Tigerstaden, så eg kan kombinere med besøk:)

Eg overnatta hos ei venninne frå gamle dagar, det var skikkelig stas å få tyte nokre timar! Og så besøkte eg Musikanten i kollektivet hans før eg reiste heim om kvelden. Det var imponerende å sjå og smake kva den eine karen i kollektivet laga til middag. Nydelig godt, rett og slett! Store mengder grønsaker, scampi, svinekjøt, saus og krydder, til saman ein fantastisk wok-rett. Eg kunne gjerne hatt denne herren buande her i ei veke eller to:)
Det er ikkje kvar dag det er fint ver her på Sunnmøre, så eg må syte for å dokumentere at det skjer av og til...

Lykke er to kaniner i nytt bur:)

Endeleg har Trampe og Line fått flytte inn i nytt bur! Det har teke litt tid å få det ferdig, men det vart jammen bra også. Buret er høgt under taket, og eg ser at dei hoppar og sprett der inne... Dei har hems med "trapp" opp, og litt meir plass til å leike seg, ete og kose.

Pappa har teke seg av snikringa, men han har hatt god hjelp frå to ivrige jenter. Dei har vore der mykje, særleg minstemor! Og då buret skulle malast, var borna i full aktivitet.

Så får vi tru at kaninene set pris på kvarandre også når dei skal dele bur heile tida.... Vi har sett at dei likar å vere ilag, og eg trur at når buret er nytt, vil det vere lett for dei å dele plassen. Det hadde vore langt verre å sette ei kanin inn i ei anna kanin sitt domene.